Пилю’’ ирий хасуюдимдей толырта ӈарка яляӈэ’ таславы яля. Я’ тиӈгэвна хуркари’’ тенз’’ мэта ненэцие’’ е’’эмня  таславы’’ яля’. Ёнар’’ хасуюёнар’’ хасуюр’’ тетимдей по’ ӈарка пэвдэй’ ирий сидя ю’’ няхарамдэй яляхана ООО Генеральный ассамблея’ тарем таславы.

День коренных народов мира – ёнар’’ хасуюёнар’’ хасуюр’’ тетимдей по’ пилю’’ ирий хасуюдимдей яляхад’ мэ’’ӈава’’. Тикы поход’ нертеймэвна Международное десятилетие коренных народов мира мэ’’ӈаваць, тикы ю’’ пом’ ёльцеваць. Ю’’ по’’ ямбан ӈэрм’ тенз’’ ненэця’’ е’’эмня хуркари’’ сава сер’’ таняць. Россияна илена’’ хибяри’’ ӈод’ тарця ялям’ мэ’’ӈадо’. Россиянана тет юкад’ вата хуркари’’ тенз’’ мэта’’ толырто’ тянё’’ ненэця’’ ханярина иле’’. Ӈэрм’ яхана ӈод’ тарця ненэця’’ тянё вуни’’ӈа’’. Хуркари’’ тенз’’ мэта хибярина харто’ илесь ядо’, хусувэва харто’ вадамдо’, культурамдо’ мэ’’ӈа’’. Иринато’, хадунато’ минревы’’ паӈгу’’ тенесь иле’’.

Сидя ёнар’’ тетимдей поход’ тамна ӈопой ю’’ пом’ мэ’’ӈаваць. Нертей ю’’ по’’ ямбан пэрмы серуна’’ нерня тасламбинаць. Таӈок по’’ ямбан маниесь: ханярина илена’’ ӈэрм’ тенз’’ мэта ненэця’’ илевадо’ савумдана пяда. Ханярина  манзаясяда хибярина тянёркаӈэ’ хантана’’; ненэциена ханярина харто’ иламдо’ тасламбидо’. Невхы’’ похо’’на тыбэртя’’ ненэця’’ колхозхана манзарась тыдо’ пэрӈаць. Теда ханяӈы’’ тыбэртя’’ кооперативхана манзаранаӈэ’ толы’’, ханяӈы’’ ненэця’’ тыдо’ семейно-родовой общинахана пэръядо’. Тикы несэй ӈадимы’ сер’’.

Ӈэрм’ тенз’’ мэта ненэця’’ хуркари’’ ӈарка ма’’лёвидо танесеты’’.  Ӈарка ассоциацияна ма’’лёвахана хусувэй тет по'' ваерась Москва маркана ма’’люрцеты’’. Таняна ханярид’ товы’’ хибяри’’ харто’ серуто’ нямна лаханасьты’’. Нерня манзаравамдо’ ӈобкана таслабсетыдо’. Тикахад’ мел’’ ненэциена’’ ӈод нисьтыдо’ юрбю’’. Ханярина пыдо’ сертавы ӈамгарито’ выставка’’ танесеты’’, ярмарка’’ сертабасьты’’. Юкад’ вата по’’ ямбан хуркари’’ яхад’ товы’’ хибяри’’ харто’ манзаидо’ Москван’ тэврабсетыдо’, тарця ӈарка мар’ выставочный комплексхана манэ’’лабтабасьтыдо’. Тюку по’ ӈод хибяри’’ таняна ма’’люрӈаць.

Ӈэрм’ яхана ӈод’ ханярина культура’ нямна ӈэда’’ манзая’’ миӈа’’. Хусувэй тенз’’ мэта хибярина харто культурамдо’ нерняри’’ пэрӈадо’. Маня’’ яна’ тер’’    нина’’ ӈод тарця серкад’ нисьты’’ хадю’’. Нянэй ненэця’’ харто’ культурамдо’ манэ’’ лабтавась  ӈани’’ яха’ ӈэдалёрцеты’’. Норвегияхана, Финляндияхана нянэй ненэцие’’ ӈока намдурцетыдо’. Маня’’ илесь’ яханана хуркари’’ ненэцие’’ культура’ нямна ӈарка манзаям’ этно-культурный центрхана манзарана’’ нина’’ сертамби’’. Нянэй ненэця’’ ӈод культурамдо’ нерняри минредо’. Тюку по’ нара някуна «Сава сёва» ваерась, ненэцие сё мэта хынокад’ нина’’ ма’’люрӈаць. Нерняна товнда ирийхана «Янава мюд’» фестиваль’ ваераӈгу’’. Няръяна март’ мядондина’’ ма’’лаӈгуд. Тикы ёльце сава, тарана  сер’. Товы’’ нина’’ манзаи’’ манэ’’тава’’, пыдана’’ манэ’’лабтаӈгува’’.

Пудана’’ сян’ юд’ мян по’’ ямбан  ӈэрм’ тенз’’ ненэця’’ вада’’ ханяримна мэёвна сосьты’’. Нина’’ депутат’’ поӈгана таня’’, округна администрацияхана ӈэрм’ ненэцие’’ серу тасламбада’’ нина’’ манзара’’, ассоциациява манзаямда нерня минреда.  Коренных народов мира яля’ ханярина илена’’ ненэця’’ тамна ӈопой хэбидя яля’. Тарця ялям’ сава ихиня мэцьтыва’’. Няръяна маркана тюку по’ ты’ яля’ няюв мэ’’аваць.