Ваеравы си’’ивхана округна’’ губернатор’ манзаям минрена Юрий Бездудный Харутан’, Хорейверан’ ӈэдалёрӈась. Хоседа-Хардской, Хорей-Верской сельсовет’ социальной объект’ манэ’’сарӈась, таняна манзарана’’ хибяри’’ лаханакурць ня’’ӈась.

– Сидя ӈэсым’ манэ’’ӈаваць, ханзер’’ хибярина’’ тикахана иле’’, хурка сер’’ таслась тара, манэ’’ӈаваць. Харутахана культура хардадо’ саць невхы, едэй харад’ сертась тара. Ханяна едэй хардадо’ нуӈгу’, яда’ таславы. Аукцион’ пуд таславы ӈэӈгу хибя’’ таняна манзараӈгу’’, – Юрий Бездудный мась.
Харутахана садик’ сулурпава манзая’’ миӈа’’. Галина Беляева садикандо’ ервота манэ’’лабтадась, ханзер’’ миртя’’ манзара’’, хурка манзаи’’ мале сертаць. Пыда вадавнанда, тюкумэвахана манзаи’’ сертамбада’’ ивъер’ манзара’’, ӈокаюв’ пеляда мале сертавы. Хор’’ ирий’ нертей яля’ ӈэсонд манзаидо’ ёльцеӈгудо’. Тикахана маня’’ несэюмдавы садикан’ тюӈгува’’. Тикым’ маня’’, тюкохона манзаранаӈэ, саць пон’ ӈатева’’. Ӈацекына’’ ӈод’’ ӈатена’’.
Садик’ сулурпавахана миртя’’ манзаравам’ округна’’ губернатор Юрий Бездудный манэ’’ӈадась. – Садик’ сулурпава’’ манзая’’ миӈа’’, ӈокаювда мале сертавы. Хор’’ ирий’ нертей яля’ ӈэсонд манзаидо’ ёльцеӈгудо’, ӈацекы’’ едэй садикан’ тута’’.
Садикхана манзаи’’ сертамбада’’ фундамент’ тю’’у и’’лаць, пиняд’ харад’ несэюмдадо’. Теда’ мюняна сертамбада манзаидо’ ёльцемби’’, валакада отопительной системамдо’ сертаванзь лапцеӈгуд. Галина Беляева вадавна: – Сулурпава’’ манзая’’ нерня’ сававна миӈа’’. Есям’ тикы е’’эмня округна’’бюджетхад хоць.
– Теда’ ӈэсыхынана’’ садиква’’ несэюмдавы. Тикахана харвабнанда ӈацекына’’ ӈод’’ ӈокамда, – садик’ ервота тарця вади’ хэтась.
Харута’ пуд’’ округна’’ губернатор Хорей – Веран’ тэвыць. Таняна ӈод’’ школан’, садикан’, лекарь’ мят’, лавкан’ тюӈгась. Ӈэсыхына илена’’ хибяри’’ ня лаханакурӈась.
Хорей-Вер’ ӈарка, паской ӈэсы. Ӈэсынандо’ хусувэй по’ ӈацекы’’ сояӈга’’, тюку по’ синдтет ирий’ ямбан няхар’’ ю’’ ӈацекэця сояць. Ӈэсыхынандо’ садик’ яӈга хардада яӈгу, сян’ лохом’ школахана мэ’’ӈа’’. Хорей-Верхана садик’ таравам’ детской сад’ ервота Алла Чупрова округна’’ нерм’ пэртян’ хэтадась. Тарця серм’ таслабӈгудо’.
– Ӈацена’’ ӈока, едэй садик’ тара, – Алла Ивановна мась. – Хусувэй ӈэрё 10-15 ӈацекы’’ садикан’ тосеты’’. Тюку по’ сиднтет ирий’ ямбан ӈэсынана’’ няхар’’ ю’’ ӈацекы’’ сояць. Пыдо’ 1,5-2 по’ ваерась садик’ тута’’. Несэй группам’ нэсь тараӈгу. Ханя’’ ӈацекы’’ ня’’амгуна’’.
Хорей-Вер ӈэсы’ ервота харто’ ӈацекыто’ нямна ибедорӈа’’. Ӈэсыхынандо’ ӈацекыдо’ ӈарка, едэй школахана тоходана’’, хусувэй ӈамгэдо’ таня, сававна сертавы’’. Тюку ялян’ хэтась школадо’ едэй тохолкова пон’ хамады. Вэба ирий’ нертей яляхана ӈацекы’’ тоходанавамдо’ пяӈгудо’.
Хорей-Верхана маркад’ товы’’ делегация’ тамна больницан’ тюӈгась. Больницадо’ едэй, таняна сидя ю’’ хибяри’’ манзара’’, станционардо’ тане. Тарабнанда хибяридо’ таняна савумдабидо’. Михаил Соколов ервотадо’ таняна сидя по’ манзара, пыда вадавнанда – манзаравандо’ е’’эмня хусувэй ӈамгэдо’ тане.
Юрий Бездудный маркад’ товы’’ нита’’ ня’ тамна культура харадм’ манэ’’ӈаць. Самляӈг по’ тяхана таняна едэй харад’ сертавы’’. Валакада тикахана манзарава’’ серта яӈгу’’. Теци’’, мюняхад тарахаӈгу. Нерняна товнда похона культура харадм’ сулурпаӈгудо’. Тикы е’’эмня есям’ Заполярный районхад хоць.