Округна школахана тоходанна’’ ӈацекы’’, ненэця’’ вадам’ пэртя’’ тохолкода’’ тюку по’ мядонзэйӈэ’ Р.И.Канюкова падвы « Ненэця’ вада» ненецкий язык 2 класс учебной пособием’ ня’’амаць. Ёльце’ сомбовна сертавы манзая, хуркари’’ материал’’ мюнянда ӈока. «Хобцокунда» лаханаком’ толада’’.

Пэвсюмбы ӈаворо’’махад хибяри’’ нылана. Марина Тайбари ебцотаханда хобцоку мэ’’ӈа. – Вэй! Мань хэбцокомей! Стёпако, хобцокоми ход! Сидя меӈга: няби меӈга ёря, няби меӈга тора.

Стёпа ибедоркава ибедор’’ нив’’, валакада хобцоко’ хобцом’ хось я’’амада. Мехалкан сырӈа – няда мунзи. Хаврян’ сырӈа – някада ванерабты. Марина харта нядаӈго пяда, ма: – Ебцотаков’’, еванзадаков’’, сяймана’’ мальӈгана пыдар хаданд ӈудаха’’на хобцокони’ хобцом’ маниерась. Тикар ӈамгэ? Хасава ӈацекэця хадаханда сылы’’. Хадада мунзипой’ хыд халтамби. Стёпа хыдяха’’ сырць тёрей’’: -Теневадм’! Тикар хумка!

Дарья хада ӈопой ӈудаханда хумкам’ ня’’ма, няби ӈудаханда педакм’ мэ, ебцотахандо’ вахалъй’’: – Пэдаван, хобцоко’ хобцом’ хор. Ненэсянда ӈо’’ хумка сабряв, педак нялпуй, ёря ни ӈа’’. Марина ӈоб’ тяха’ пэрӈада, ма’’нив’’: – Та, тикар педак, сяй’ хыдя. Педак тора, сяй’ хумка – ёря. Вэй. Ӈани хобцоков: НЯӈута пухуця’ не нюда няръя, нум’ няӈэн’ ладарӈа, нюда париде, нумд’ ядэрӈа. Тикэр ӈамгэ? Хобцокони хобцода мяд’ мюня ӈа. Стёпа ва’’ав’ ниня ӈамдё янда’’амна сырӈа, ёӈгана. Хавря Степан’ хасабарць ма: – Нён ёӈгана’’, нерняку’ пыянд ӈыл’ сыр’’. Стёпа хобцоко хобцом’ минханда сэвтеда, манэ’’ӈада, мяд’ хоран’ сырць ма’’нив’’: – Тикар хор, тамна ту. Хусувэй мякана таня. Марина нюмда саву’’ӈа: – Похобэн, саван! Тикэр хор. Лэйнан ту – не нюда. Ту няръя. Нюда ӈани’- париденя якэ, тю’’у нумд хан’’ӈа. Едэй хобцоков хось минханда пиртар, хусувэй хибярихина тикар таня. Вэй, хобцокомей: Сидя хэхэ хан табор’’ еде’’ӈаха’. Хобцокон хобцода хурка?

Стёпа ӈани’ ёӈгана пяда. Мякана мэна’’ няхата сырӈа. Мехалка сэвда хаё’’ла, лябо’’лаю Еӈгора нянда яӈгэйбтёсеты. Сандрако сепанда мюд сядобэрцьм’ тюхулӈа. Стёпан’ сядобэрцьм’ мипи, ма’’нив’’: -Сядобэрцянд’ сыр’’, хобцоконд хобцом’ минханда манэтар. Нюдякоця Стёпако сядобэрцякон’ сырӈа, минханда хамадада, минханда санэй’’, маймба тёрей’’: – Теневадм’, теневадм! Мань сэван таборм’ ни’’ мэне’’. Хобцокона’’ хобцо – тюку сэв’’!

Стёпа сэвда манэ’’лабтаби. Ебцотахандо’, сямянхат нюдя няхандо’ сырць малмбоё’’ маймба письлыд’’. Нисядо’ нюда мание янавна вахалъй’’: – Еванзадаков, пэдаван! Иӈудота ӈацекэн ӈэвэн.Хобцоку мал’ тензибтеяд. Теда’ хонёва’ ёльць тэвы’’. Хуняна тэтнава ялява’’ тута.

Р.Вэрэйко