Вы здесь

Невхым’ тенена’’

Округна музейхана манзарана няваʼʼ

Тюку по’ округва сиднтет ю’’ самляӈг помда ядабта. Ӈарка ялява мэта’’ ирийна сидя ю’’ нюртей толыркана мэтава’’. Округна еркы март’, Няръяна март’, яндахат’ мядонда’’ тута’’. Сиднтет ю’’ самляӈг по’’ тяхана Ӈэрм’ яхана сямянд’ нюртей ӈадимы округ’ – маня’’ илесь ява’.

Тены’’ по’’ илеван’ таслась – округва ӈарума, ӈэсына ӈока, хуркари’’ манзарась’ мэта’’ харад’’ ӈадимя’’ луца’’ вадавна хэтась – учреждения’’. Ӈопой тарця харад’ – округна краеведческий музей. Тюку по’ округна хибяри’’, музейхана манзарана’’ нина’’ ӈобтарем’ манзарась’ хардандо’ со’’яма ялям’ мэ’’ӈаць.

Округханана ёнар’’ хасуюёнар’’ няхар’’ ю’’ тетимдей похона ненэця’’ харад’ танясь, тикы харадхана музей’ танясь. Сиднтет ю’’ по’’ тяхана вэба ирий’ маттамдэй яляхана округна музей’ таняюв’ турта’’ хибяри’’ е’’эмня нюртей нёмда нэдась. Тикы яляхана выставкам’ нэць ханяна ӈэрм’ яхана вадюданна’’ ӈамдэд’ манэ’’лабтабиць. Тикы яляхат’ музейва манзара. Таняна манзарана’’ хибяри’’ яна’ историям’ ма’’ламби’’, тохолаби’’, лэтби’’. Сиднтет ю’’ по’’ ямбан ма’’лавэдо’ ӈока. Нина’’ манзаяханандо’ хуркари’’ яля’’ таняць. Манзарась сава хардадо’ пон’ яӈгусь, музейва хуркари’’ лохокохона сы’’ӈадысь. Тарем’ ӈэбнанда ӈод’ таняна манзарана’’ хусувэдо’ минрена’’ серканда саваривна сырцеты. Музейна архиван’ ма’’лавэдо’ тянё ни’’ӈа’’. Тюку ялян’ лаханась, округна музей харта’ хардада, маля сян по’’ ямбан паской хардахана манзара. Таняюв’ округханана илена’’ хибяри’’, мядондина’’ харвась ядсеты’’. Тюку ялян’ хэтась: музейва’ – культурно-просветительской центр’. Маня’’ музейна экспозицияхана, фондхана няхар’’ ю’’ си’’ивхад вата ӈавори’’ лэтби’’, хуний яханана илена’’ хуркари’’ тенз’ ненэцие’’ илм’ ваде’’ӈа’’.

Музейхана выставка’’ танесеты’’, манзаранидо’ хуркари’’ экспедицияхана тэворцеты’’, научно-исследовательской манзаидо’ книгаха’’на, буклетха’’на манэ’’лабтабасьтыдо’. «Сокровища Ненецкого краеведческого музея» нюбета диск’ хамадаць.

Теда музейхана тет ю’’ самляӈг манзаранадо’, хусувэдо’ харта манзаямда минре. Таняюв’ турта’’ хибяри’’ е’’эмня экскурсии’’ сертабасьты’’, конференции’’ хамадабсеты’’, проект’’мана манзарасьты’’.

Округна краеведческий музей – сиднтет ю’’ пода паны. Музейхана манзарана’’ хибярина тянё ни’’ӈа’’, хуркари’’ отделкана манзаидо’ минре’’. Этнографической отдел’ ӈод манзара, ханяна ӈэрм’ тенз’ ненэця’’ илам’ манэ’’лабтаби’’. Тарця отделна серм’ нерня минренаӈэ’ Лариса Прокопьевна Талеева тара. Манзаямда харвабтана нява харвась манзара. Округна ӈэсымна ӈэдалёрцеты’’, таняхад’ музейхана манэ’’лабтабава е’’эмня тарана ӈавори’’ тэврабсеты’’. Манзараванда ямбан маля Холговхана, Вижасхана, Хорей Верхана мэвысь. Нерняна сертавнда манзаидо’ ӈока. Округна музейхана манзараван’ харвана’’, манзаидо’ мэнена’’ хибяри’’ манзара’’. Тад’ нерня ӈод тарця манзаи’’ пэртя’’ нина’’ сававна илея, манзаяхандо’ хусувэй яля’ харвась’ турӈая, хибярина ӈод’ харвась’ музеян’ ядая’’.