Мордовияхана’ хуркари’’ яхад’ товы’’ мядонди’’ ядабтавась’ хамады’’. Саранск’ маркана Россияхана илена’’ финно-угорский тенз’ мэта хибяри’’ ма’’лаӈгуд.

Таняна вэба ирий’ пудана’’ яля’’ мальӈгана финно-угорский тензхад’ перена’’ ӈоб’яӈганя регион’ тер’’ национальной движение самлязимдей отчетно – выборный съезд’ ваераӈгу’’. Тикы яхана ваеравнда ма’’лёян’ манзаравась няхар юр’’ мян’ хибяри’’ товась’ ятна’’.

Мордовия еркы март’ хуркари’’ яхад тэравы’’ делегат’’ ма’’лаӈгуд. Сян’ яля’’ ямбан ма’’лёйкана таславы’’ серудо’ маля ӈока. Финно-угорский тенз’ мэта ненэцие’’ вадам’ нерня минревам’ манэ’’сарта’’, культура серу’ нямна тасалкода’’, невхы ил’ нямна лахарёдо’ таняӈгу’’. Мордовияхана илена’’ хибяри’’ харто’ вадамдо’ нерня сававна минредо’, ӈацекы’’ нюдякодандо’ хари’’ вадавнандо’ лахана’’, школахана вадамдо’ тохоламбидо’. Культура, традиция серудо’ ӈод пуняна ни’’ мий’’. Ӈодьбянда тикы республика’ съезд’ манзарава е’’эмня тэравысь. Тикы яхана таня’’- ӈамгэм’ манэць.

Финно-угорский тенз’ ненэцие’’ ма’’лёван’ хуркари’’ тенз’ мэта хибяри’’ товась мэ’’, поӈгнандо’ удмурт’’, мариец’’,ӈысма’’, саам’’, хаби’’, манси’’, энец’’, вепс’’, нянэй ненэця’’ таняӈгу’’.

Маня’’ округхадана делегация’ ханта, таняюв’ хэвндя поӈгана Ангелина Ардеева, Людмила Пашкина, Павел Рочев, Алексей Ардеев. Нянэй ненэцие’’ культурам’ Саранск’ маркана тюку’ мэвахана «Илебц» нюбета театрхана сянакода’’ нина’’ манэ’’лабтабаӈгудо’. Мордовия яхана ваеравнда «Финно-угорский транзит» международный фестивалькана ненэця’’ вада’’ ӈод’ соӈгу.