Маня’’ яханана хусувэй ӈэсыхына тохолкода’’ харто’ манзаидо’ минре’’. Нянэювна нюдяко’’ ӈацекы’’ тохолабдина хусувэй ӈэсыхына таня’’. Холгов’ ӈохона манзаидо’ теневана’’, мэнена’’ нина’’ ӈацекыдо’ тохоламби’’.
Ӈокаювдо’ ӈока по’’ ямбан’ тикы ӈэсыхына манзара’’. Хусувэй тохолкода ӈацекы’’ тохолабванда’ хавна харта’ ӈод илеванда ямбан’ тоходансеты. Ёльцянда’ тэвась е’’эмняндо’ хамадавы курсха’’, семинарка’’ ӈэдалёрцеты’’. Ӈацекэхэна’’ тохолкова’ сер’ мэкад’ ӈэва’’ е’’эмня несэй манзаи’’ тохолкода’’ пюрцеты’’, торомдабсеты’’.
Ненэцие’’ вадам’ пэртя’’ тохолкодина’’ ӈод харто’ манзаидо’
нэсеюмдабсеты’’, пыдо’ ӈод хусувэй по’ Няръяна маркана ма’’люрцеты’’. Нерня манзаравидо’ ӈобкана ма’’лась таслабсетыдо’. Пудана’ мэвна ненэця’’ вада тохолкода’’ ӈарка пэвдэй ирийхана округна еркы’ март’ тэворӈаць. Тамальӈгана семинар’ хавна тамна ненэцие’’ падвана сер’ е’’эмня хамандавы конференцияхана манзараць. Тамальӈгана тохолкодина’’ няюв лаханакурӈамась. Краснойхад’, Нельмин’ Саляхад’, Омахад’, Несьхад’, Индигахад’ товы’’ нина’’ таняць. Бугрино’ ӈэсыхыд’ тюку’ мэвахана Раиса Михайловна Ного товысь. Пыда’ сита манзаравито’ нямна хонрамбивась. Нямбар’ тохолкода харвась лаханась.
Ного: – Мань’ Бугриноход’ томась. Тохолкоди’’ семинаран’ томась. Школахана сидя ю’’ си’’ив по’’ манзарам’. Ӈопой яхана манзарам’. Холгов ӈохона Бугрино ӈэсыхына. Пилибт’ тикы ӈэсына манзарам’. Институт ёльце’’-махадан’ таня’ хаямась, тарем таняна хаим’.
Ленинград’ маркана Герцен’ нювм’ нюбета институтхана тоходанамась.
Корр: Пыдара ӈацекыда ханзер’ тоходана’’, вадамдо’ мэ’’ӈадо’?
– Маня’’ ӈацекына ӈобтарем’ ни’’лахана’’. Теда ненэця’’ вадан’ ӈацекы’’ тохолабава серкана манзарась саӈго’’воӈа’’. Тарем’ ӈэбнанда’ ӈод, янамбовна ненэця вадава нерня’ пэрӈава’’. Хусувэй яля’’ намдурта вади’’ ӈацекы’’ теневабнандо’: нянь’, юр, небя, нися…
Тохолабда’’ ӈацекына ӈока ни’’ӈа’’. Мань’ теда си’’ив ӈацекым’ тохолабим’, ханяӈэна толырто’ самляӈг’яӈганя ӈэсонд’ вадюсеты. Школахана тет тохолкода’’ манзара’’. Лариса Клавдиевна Чибичик школана директор, Ольга Александровна Большакова, Раиса Афанасьевна Копатева. Теда тамна сидя тандая тохолковамди’ ёльцевы некоцяха’ манзаравась школахана тоӈахась, тикы Ольга Ивановна Варницына, Антонида Николаевна Ледкова. Маня’’ ӈацекына, Ольга Ивановнам’ мань’ тохолабивась. Теда пыда школаханана ӈобтарем’ тохолкодаӈэ’ манзара.
Корр: Няръяна маркана хурка серу’’ тасламбида’’?
– Маня’’ едэй стандарт’ пэрӈаваць.
Корр: Тюку яля круглый стол мэ’’ӈаваць, ханяна ненэцие вадава нерня минрева серу’’ тасламбиваць, вадана нерня танева нямна лаханаваць. Пыдар’ ихинят хурка ӈэдараха’ вадава нерня илевнда?
– Валентина Артемьевна Ханзерова ма’’нисяв’: – истокхад’ минзь’ тара. Ненсямбой’ тарця ӈэдараха’. Вадава и’’илба, минресь семьяхад’ тара. Вадам’ ехэранам’, сяхарт’ вадам’ нивы намдурмы ӈацекым’ книгавна тохолабась – ханяр’ тохола. Валакада саць со’’ ни’’ лаханаӈгу’’, ниня’ тарем лаханаӈгу.
Корр: Холговхана малӈэ’ иленаӈэ’ нянэй ненэця’’, ӈамгэ’ таняна тарця илан’ тэвыда ӈацекыда теда лаханаван’ ни’’ харва’’?
– Мякнандо’ (семьянандо’) тарця. Небя’’, нися’’ ни’’ лахана’’. Хаданадо’, иринадо’ ханяӈы’’ яӈгумбэй, хуний тамна савовна лаханаць. Ханяхад’ ӈацекы’’ харто’ вадамдо’ мэтадо’? Вадам’ намдурць’ тара, лаханась, тикахад’ тохолабась. Иб’ ӈод школанана тохолабина’’. Хардахана вадамдо’ нидо’ намдур’’, ӈэсынана лаханана’’ тянё’’. Ӈодьбянда тарця ӈэдакы.
