Саля’хардахана Елена Тимофеевна Пушкарёва иле, нянэй не, харта тензда Лапцуй. Илеванда ямбан ненэця’ вадам’ тю’’у минрена не’, ненэця’ фольклорм’ ма’’ламбада. Ма’’лавы’’ манзаида книгаӈэ’ сертамбида. «Пухуця нюи» лаханаком’ нябакоданда падвэдась, нюртей’ пелямда толара’’.

Харта’ ямда’ мэневы, харта’ илевамда’ нерня тидхалембавы хасава, падтаӈгода ненэць’ Николай Апицын Индига’ ӈэсыхына илесь’. Тиман’ выӈгана мюсермы’ ненэця’ ню. Несяда, небяда илеванди’ ямбан хойхана илеӈахась, таняна хасава нюкцяди’ соясь.

Округханана Выучейской нювм’ нюбета ӈэсыкоця’ таня’’, ниня’’ ӈарка ӈэсы’. Ӈэсынандо’ юр’’ вата’’ хибяри’’ иле’’. Ӈокаюв’ хибяри’’ тикы ӈэсыхына со’’ямахадандо’ пилибт’ иле’’, тикахана манзара’’. Хибяри’’ харто’ ӈэсымдо’ ёльце’’ мэнедо’, тикада хусувэй серкана ӈади’’.

Параӈода’ не манзарана’ мякана илекари сер’’. Сита ӈавламби, пин’ хан’’ла. Илеванда сер’’ ӈобо’’ манзеты: - Параӈода’ солдат няхар’’ нядахава нядэйнась. Ӈобкартадо’ нись ха’’. –Ӈули’’ сиякан. Ӈобкарт ядэро’’мар яӈгусянё’’. Харад’ поӈгана етри’ лаханакурӈа’’: - Сидна’’ ӈоб’’ ябта сер’’ луца нядабись. Хыбяхартава’ нись ха’’. Нерде хэб’’на’’ мэкада сэр’’ юнось. Нябимдей’ париденя юнось. Няхарамдэй няръяна юном’ мэ’’ӈась. Хыбя ӈэдакы?

Хусувэй по’ пилю’’ ирий пудана яля’ мальӈгана округна еркы’ маркана тохолкоди’’ ма’’лёва танесеты’’. Тюку по’ ӈод тарця конференция’ маркана ваерась. Округна тохолкода’’ ма’’лёй’ манзаямда пилю’’ ирий’ сидя ю’’ си’’ивумдей толыркана пядась.

Та ер’’ яля’ пуд няби яляхана ЛИТО «Заполярье» нермпэртя нян едэй книгам’ тась. Книга тарем’ нимдевы: «Неян вабц’ вада’’». Юнета профессор’ М. Я. Бармич падбэй нив ӈа’. Минханда Санкт-Петербурган’ мобилкавна Мария Яковлевна ня’’ лахана пяв, юндалтамбив. Пыда нян тарем’ мась: «Тикы словарюв  ӈахэт падбивась. Книгаӈэсь Мария Афанасьевна Рачинская тюку по’ сертадась. Пыда, «Алмаз-граф» издательство’ ерв, теда’’ хэвханан ӈамды. Едэй сертавы саць ӈарка «Русско-ненецкий словарюв» та.  «Неян вабц’ вада’’» книгам’ небян нюм’ яляхана нян тюледась. Пыда соя’’махаданда юр’’ по ваера.

Хабте’’эдо’ подерпи’’, паныдо’ серопи’’, палыдо’ силпи’’. Тикыдо’ мале’’мяхадандо’, пон’ нись мы’’, ӈамгэ яндо’ ед’ тидахалпато’ ӈод’’ пилибт’’ ӈэдалэйд’’. Тикы хэни манэць, Вано савар талерка харад’ помна хая. Параӈода’ не манзарана ӈоб’’ ехэра. Харад’ варан’ тэвахава ӈоб’’ парахалъй’’. Ябта сэр’’ луцаӈэ хая. Сэр’’ юнода хэвувнанда то. Мирбида, паныда нинянда хуры’’. Хабте’’энда маха’ни’ ӈамды’’. Ябта сэр’’ юнода тю’’уцей’’ танэй’’, тобарида мяры’’. Танянандо’ хунанандо’ параӈода’ солдат’’ тамна пиня’ мимы’’. Солдат’ ӈэван’ тёрей’’.Ервадандо’ та’ таралъй’’. Я’ сяд’ ӈыл’ пыдо’ ха’’мыд’’.