Нюдя’ пэвдэй ирий сидя юдимдей’ толыр’’ маня’’ округханана хэбидя яляӈэ’ таславы’’. Оленно-транспортный батальонхана сайнормы’’ ненэця’’ тен’ яля’. Тикы яляхана ӈэрм’ няна сайнормы’’ хибярина тензебтеванзь маля сян’ по’’ ямбан памятник’ хэван ма’’люрцетыва’’. Тарця яля’ ед таславы Закон’ маня’’ округханана сидя ёнар’’ нябимдей’ яӈганя поход’ манзара.

Тюку по’ ӈод оленно-транспортный батальонхана сайнормы’’ хибярина’’ юрвы’’ ниць’ ӈа’’. Нюдя’ пэвдэй ирийна сидя юдимдей толыркана саць мерця’, хад’ ялясь, ӈодьбянда хэбидя ялява ӈани’ ян’ тидхаледонзь. Мурманск’ мар’ няна’’, Карельский фронтхана сайнормы’’ ненэциена тензебтеванзь’ мэта’’ си’’ивна нябимдей яляхана ма’’люрӈаваць. Памятник’ хэван’ товы’’ хибяри’’ ӈокаць. Хибяри’’, хуний нисянадо’, ирийнадо’ пудана ӈарка сайнорман’ округхадана хаяць. Ханяӈы’’ хибярина харто’ сайнормы нито’ сидяӈг’’ тэвраць, хусувэй товы ӈудананда ӈамдэд’ ня’’амбись.

Сайнормы’’ хибярина тенейна’’, пыдо’ сяхарт’ юрвы’’ ни’’ӈэӈгу’’. Маня’’ яхадана хэвы’’ сайнормы ненэциена ед’ вада’’ митингхана соць. Округна ӈэвахана мэнахад’ вадам’ мэ’’мы … Ильин, Заполярный районхад’ Алексей Михеев лаханась, маркы нерм’пэртя вади’’ тэвравы Елена Ляпунова, округна депутатхад’ Ольга Каменева лаханась. Краснойхад’ товы’’ ӈацекэця’’ таняць, ӈацекы’’, хуний сайнормахана мэвы’’ хибярина илм’ тохолаби’’. Тарця ӈацекы’’ нерня’ пэртядо’ пэдова.  

Тюку по’ я’сяр ниня’’ илена’’, хуркари’’ тенз’ мэта’’ хибяри’’ пудана ӈарка сайнорма ёльцевам’ ты’’ ниць ирий’ хасуюдимдей’ толыркана мэ’’ӈадонзь’.Тарця сава юн’, Победа ялям’  си’’ив ю’’ по’’ тяхана хибяри’’ саць ӈатедонзь’, маймбась ядтадонзь’. Тет поход’ вата яля’’ ямбан’ сайнорма’ сер’’ яханана миӈаць. Ханярина илена’’ хибяри’’ ӈока’’ маям’ манэ’’ӈаць, ӈока’’ хибяри’’ илм’ ханась,  сайнорма ӈока’’ ӈацекы’’ евакоӈэ’ хаесь.

Великой Отечественной войнахана маня’’ яна’ тер’’ ненэця’’ сайнорӈаць.Ӈэрм’ яхад ӈэдалавы’’ хибярина, хуркари’’ яхана ямдо’ сахарамбиць. Мурманск’ няна, Карельский фронтхана хойхад’ тэсавэй, венековасэй, ханудо’ ханась ненэця’’ ӈэдалэйдаць. Ёнар’’ хасуюёнар’’ тет ю’’ нюртей по’ нюдя, ӈарка пэвдэй ирий’ ямбан округна ӈэсыхыт’ самляӈг юр’’ мян хибяри’’ сайнорманзь’ хаяць. Маня’’ нина’’ ямдо’ ныхыдо’, пыдадо’ нись’ сяй сахарамбидось. Сава нядаӈгодаӈэ’ тэкоця’’ тараць. Ты’, хуний хуркари’’ явна фронт’ е’’эмня тарана ӈавори’’ ядэлаць; пенделевы’’ ненэцие’’ сайнорма яхад’ нэкалпавы.

Ёнар’’ хасуюёнар’’ тет ю’’ нябимдей по’ тось округхадана сайнорма ян’ мат’’ ёнар’’ ты’’, ёнар’’ сидя юр’’ хан’’, мат’’ юр’’ тыбэртя’’ ненэця’’ хэбнандо’ тарась. Ненэця’’ си’’ив оленно-транспортный эшелонхана хаяць. Тикахад’ саю’’ по’’ ямбан’ выӈгад’

сян’’ хибяри’’ хэвакы’’; сян’ тым’ ханавакы’’ … теневава’’ маня’’ нина’’ ханярина сававна сайнорӈаць, пыдо’ Победа ялям’ тэвраць. Сайнормахана мэвы’’ хибярихит’ маня’’ теда илева’’. Тюку яля’ ед ӈока хибярина сайнормахад’ ниць’ ту’’. Тарця нина’’ ед’ ӈэвна’’ ха’’аврамбива’’.

Сайнорма по’’ юрбада’’ ни’’ӈа’’. Сайнормахана мэвы’’ ненэциена’’, ӈэвдо’ пильзяда сайнормахана масьтевы’’ нина’’ ихиняна по’’ ямбан илевнда’’. Тад’ нерня вэвко сер’ ехэрась илевана’’ е’’эмня, ӈацекы’’ сайнормав’ ехэрась вадюданбато’.