Саля’хардахана маля самляӈг юкад’ вата по’’ ямбан Елена Михайловна Талеева иле. Пыда паӈгуда маня’’ яхадана миӈа’’, харта тензда Паханзеда. Таӈок по’’ ямбан Я’малкана илесь, манзарась Елена Михайловна сяхарт’ харта со’’явы ямда нисьтыда юрбю, харта ямда пилибт’ сейхананда лэтбида.
Тамна юкад’ вата’’ по’’ тяхана, пир’’манда мальӈгана, пыда хусувэй по’ Няръяна март’ турцеты. Ханяна мядоманзь’ перенита’’ хэван’ тосьты, ханяӈэхэна минрена’’ манзаида тюкон’ тэврасьтыдо’. Округна еркы март’ тобнанда пыда Нельмин’ Салямда нисьтыда юр’’. Сян ялякон’ ӈэбнанда ӈод’ таняюв’ хэсьты. Саля’хана ӈока’’ теневана’’ нида’’ иле’’, таняна пыда’ вадюданась, таняна небя’ хасада манзарась. Тикы ӈэсыхына вэсако’ хасанда переня’’ теда ӈод иле’’.
Елена Михайловна Талеева маня’’ округна Нюдя’ яхана ёнар’’ хасуюёнар’’ няхар’’ ю’’ самлязимдей по’ хор’’ ирий’ юдимдей яляхана соявысь. Саӈговота’’ сайнорма’ по’’ мальӈгана Саляхана вадюданась, хануй не’ ӈацекы ӈэвысь. Школамда Няръяна маркана ёльцедась. Елена Михайловна вадавна: - Тамальӈгы похо’’на’’ школа-интернатхана манзаямдо’ мэнена’’, теневана’’, хой’ ӈацекы’’ нядабада’’ тохолкода’’ манзараць. Директорӈэ’ манзаравы Авенир Торков хусувэй ӈацекым’ школамда ёльце’’махад’ тамна нерня’ тоходанвась табадабсетыда. Тарем’ ӈод Елена Михайловна директорта’ ватовна Ленинградан’ тохолкодаӈэ’ тоходанвась’ ӈэдалавыць. Тамальӈгана енавакы: сян’’ по’’ ваерась харта яханда манзаравась тута’’, небямда нядабаӈгу’’. Валакада ил’ӈани’ сер’ сертада. Институтм’ ёльцесь, Няръяна март’ тось, Елена Ледкова округхананда манзаядамда ниць’ хо’’. Тикахана, маля я’’авлада пирибтяко, падарм’ Саля’хард окронон’ ӈэдарась. Сян’ ялякоця ваерась, хэвхы округхад’ телеграммам’ ня’’ама, пыда сита’ педучилище’ тохолкодаӈэ’ Саля’хардан’ ӈате, билетанда мир’’ есяха’ ӈэдаравы. Тарця серт’ маймбась, ӈацембой некоця чемоданкомда ня’’амась Я’мал няюв’ ӈэдалэяць. Таняна мятамда ня’’амась, педучилищена ненэця’ вадан’ тохолкодаӈэ’ хэвндя хибяри’’ тохолабись. Самляӈг’ яӈганя по’’ ямбан ӈока сава тохолкодам’ тохолась. Ӈокаювдо’ теда ӈод’ Елена Михайловна мят’ маймбась тюӈгсеты’’, ихид’ миндя’’ вадидо’ тэврабсеты’’.
Тикы’ пуд тамна самляӈг’ яӈганя по’’ ямбан Окружком’ партии мякана манзарась, тикахад’ округ’ музейхана манзаравада танясь. «Ямал-Регион» ТРК мякана консультатӈэ’ тараванда мальӈгана ӈарка манзаям’ сертабись. Манзараванда мальӈгана Я’мал ям’ малӈэ’ сюртедась, ӈока хибярим’ серкана нядась. Теневана’’ хибярида ханярина иле’’.
Тюку по’ Елена Михайловна Талеева сиднтет ю’’ помда ядтась. Ӈарка со’’яма ялянанда ӈока’’, сейхана лимбяка’’ вади’’ намдась. Сава ихиня яндахат’ товы’’ нида’’ ядабтабись.
