Сидя ю’’ самляӈг по’’ тяхана ӈарка пэвдэй’ ирийна нябимдей яӈганя толыркана Няръяна маркана ӈока’’ ненэця’’ ма’’-лэйдаць. Округна хусувэй ӈэсыхыт’ товы’’ хибярина таняць, ӈани’’ яхат’ товы’’-мядондина таняць.

Тамальӈгана округна еркы маркана ӈэрм’ тенз’ ненэця’’ ӈарка ма’’лёямдо’ мэ’’ӈаць. Тамальӈгана «Ясавэйм’» нюбета ассоциациява соясь. Тарця общественной организация’ ненэцие’’ нядабава е’’эмня ӈадимясь. Сидя ю’’ самляӈг по’’ тяхана хусувэй тенз’ мэта ненэця’’ несэювна илан’ сырць пядось, хибяхартан’ нись ена илевамдо’ нерня минре пядось. Харто’ ныхыно’’ енась. Тарця серкана нидо’ нядабадаӈэ’, нерня ӈобкана танеда серудо’ тасламбава е’’эмня ассоциациява манзара пядась. Тамальӈгана ваеравы ма’’лёйкана ӈадимы ассоциациява «Ясавэйӈэ’» нюмдеваць, Советхана манзаравнда ненэциедава тэраваць, нерня манзарава нямна план’ сертаваць. Ӈадимдевы’’ ассоциацияна нерм’ пэртяӈэ’ Ангелина Ардеевам’ тэраць. Теда сидя ю’’ самляӈг помда ядабтавась хамякува’’. Ассоциацияна ӈарка ялям’ мэ’’мась тюку ирийна нябимдей’ яӈганя толыркана ма’’лаӈгуна’’. Таӈок по’’ ямбан манзаравам’ таслаӈгува’’, ассоциациява нядабавы’’ ненэця’’ сава вади’’ намдаӈгу’’. Ханзер’’ ассоциацияна сидя ю’’ самляӈг пом’ мэ’’ма нямна падвына ӈани’’ танеӈгу’’, яндахат’ товы’’ нина’’ хэтувнда вади’’ нянда тэвраӈгуна’’.