Сян яля’’ ваерась едэй пом’ ядабтаӈгува’’. По’ пудана’’ яля’’ха тэвась, хусувэва тасалкосьты: хаёвнда по’ хурка ӈэса? Ӈамгэ савада танясь, хурка сер тоенась миӈась? Сидя ёнар’’ тетимдей яӈганя по’ вэва нись’ ӈа.

Яханана ӈока’’ сава сер’’ таняць, ненэциена манзаито’ минрева сер’ ханяримна ӈэдалёрӈаць. Хусувэй манзаям’ пэртя хибярина ӈоб’ нерня миӈаць. Тарем’ ӈод тохолкодина’’.

Округна ӈэсыхына илена’’, манзарана’’ тохолкодина’’ ӈацекы’’ тохолабавандо’ хавна тамна харто’ манзаидо’ хуркари конкурсхана манэ’’лабтабасьтыдо’. Ненэцие’’вадам’ пэртя нина’’ӈод пудана’’ сян’’ по’’ ямбан Москва маркана ваерана тохолкоди’’ конкурсан’ тэворцеты’’. Тарця конкурсан’ тохолкодина’’ хамандабвахана центр образования мякана манзарана нява, методист’ Людмила Яковлевна Талеева ӈарка манзаям’ сертамби. Яханана хусувэй по’ ненэцие вадам’ минрена’’ тохолкодина региональный конкурс’ мэцьты’’, тарця конкурсхана нердевы’’ тамна нерня ӈэдаласьтыд. Людмила Яковлевна тохолкодина няюв’ манзарасьты, тикахад Москвахана нида’’ нядабасьты. Маня’’ округхадана пудана сян по’’ ямбан Москвахана ваерана конкурсан’ маля сян тохолкодава тэворӈаць, мань’ тенебнан’ Полина Александровна Большакова санаторно-лесной школана тохолкода, тикахад’ Елена Гавриловна Хатанзейская Красной ӈэсыхы школахана манзаранава небой по’ таняна манзаямда манэ’’лабтабись. Тюку по’ ӈод Москва мар’’ ӈани яндахат’ товы’’ тохолкоди’’ ма’’лабись. Маня’’ яхадана тохолкоди’’ конкурсан’ сидя тохолкодава тэворӈахась. Татьяна Юрьевна Давыдова Индига ӈэсыхы’ школахана ненэцие’’ вадам’ пэртява, нябиюм’ Парасковья Ивановна Выучейская Красной ӈэсыхы’ школахана технология’ предметм’пэртява. Носиндалава ирийна сян яля ямбан конкурс’ миӈась. Россияна еркы март’ мат’’яӈганя регионхад’ сидя ю’’ ӈопой мэбета’’ тохолкода’’ ныхыдо’ хормась ма’’люрӈаць. Ӈобкана ма’’лавы’’ тохолкода’’ манзаито’ нямна мэёвна лаханаць, ваде’’ӈадось: хурка тоенана сер’ хари’’ вадам’ нерня пэрма серкана таня’’, ӈацекына ханзер’’ вадамдо’ теневадо’. Тикахад’ хусувэй тохолкода харта янда нямна презентациям’ хамадавысь, хари’’ яндо’ нямна сава вади’’ ӈани’’ я’тер’’ няхато’ хэтбиць, нянэй ненэця’’ хурка паской паны’’ мэ’’ӈа’’ манэ’’лабтаць. Поӈгнандо’ пирдыр’’мы’’ тохолкода’’ мал’’ саваць, ныхы’’ӈаць. Таӈок тохолкодахат’ сямянд’ нердевыдо’ тэрась сибиць нись’ӈа. Вадам’ минрена’’ тохолкодахат’ сямянхат ныхыта тохолкода Хакасияхана иле, манзара. Конкурс’ Гран-при таня ӈэдалэй. Маня’’ округна тохолкодаха’ ӈани савахась. Татьяна Давыдова няхарамдэй местам’ ханась, пыда яхана РФ Министерство образования диплом тэврась. Парасковья Ивановна ӈод дипломсавэй’ тось. Тохолкодахаюна пэдоваха’, маня’’ тарця серт’ ив ер маймбива’’. Ӈоб нерня тарем’ ӈэя, ӈоб нерня тохолкодина хусувэй конкурсхад’ сава юнм’ тэврамбая’’.