Сидя ю’’ самляӈг по’’ тяхана ӈэрм’ яхана илена’’ ненэця’’ ассоциации’’ ӈадимдебиць. Сямянд’ нюрте тарця ассоциациямдо’ Ханты-Мансийский округхана илена’’ толырто’ тянё ненэця’’ сертаць, пудандо’ хэвхы округхана илена’’ ненэциена «Ямал потомкам» ассоциациямдо’ ӈадимдець.

Тюку по’ носиндалава ирийна пудана’’ яля’’ пиркана таняна илена’’ нина’’ ассоциацияндо’ ӈарка ялям’ мэ’’мась ма’’лэйдаць. Округандо’ хусувэй районхад’, хусувэй маркад тэравы’’ делегат’’ тоць, ӈокханда няхар’’ юкад’ вата хибяри’’. Тикы’хавна яндахат’ товы’’ мядондидо’ таняць. Тюку ялян’ таслахая, сидя ю’’ самляӈг по’’ тяхана ассоциациям’ сертабавы’’ ӈокаюв’ ненэця’’ маля ӈармбэй хибяри’’. Ӈарка ялямдо’ мэ’’махана мядондидо’ Тюмень, Москва, Тобольск маркад’ таняць. Тикы’ хавна хэвхы округхад товы’’ хибяри’’ таняць. Сян’’ яля’’ ямбан таславы серудо’ тянё ниць’ӈа’’. Тикы нямна падвына’’ тамна танеӈгу’’.

Пудана сян по’’ ямбан «Ямал потомкам» ассоциация’ манзаям’ нерня минренаӈэ’ Эдман Неркаги тара. Пыда няюв тарця лаханакурмами’ танясь, Эдман Хосевтевич тарця вади’’ хэтась: – Няхар’’ ю’’ ня самляӈг по’’ ассоциациява таня’’, пэртя’’ серуна’’ ӈока’’ма. Тамна нерня серуна’’ сертабаӈгуна’’ма’’. «Газпром’ ӈэдакы, халява’’ сусана’’, тына’’ вынхалы’’, ӈацекына тохолкова’’ тохолку’’, тикарина манзаядамдо’ хось я’’ама’’. Манзаядамдо’ хобнандо’ мядудо’ яӈгу’’. Нисянадо’, небянадо’ ӈэсына мэ’’. Тикы проблема’’ ӈоб таня’’, ӈоб тикан’ сырӈава’’, ибедорӈава’’: ханзер’’ таслась.

Корр: Районный отделениида ханзер’’ манзара’’, пыдо’ нядаӈгодида’’?

– Ханяда. Тайна ӈокамбой ненэць’’ иле’’ нив. Тыбэртя’’, халям’ хадабада’’ мал’’ тикана иле’’ ним. Саля’ хардахана ӈамгэ? Ервари’’ тикахана мэ’’. Тикаривна тайкуй нид’’ сава серу’’ сертамба’’ тальня’’ вадам’ мэт’’ ним’’. Тикы вадам’ мэць Саляхардахана тамна нерня мэт’’ нивам. Ти’, тарем’ манзарава’’.

Корр: «Ямал потомкам» ассоциация, пыдара’’ пуданда’’ ӈацембой ненэця’’ миӈа’’?

– Тедахова’’ ӈули’’ ӈоб вадавнани’ манзь, ӈацекы’’ мэбе’’ӈа’’, индо’ ӈу ӈока’’ма’’, харва’’ ним’ тикыд’ манзараван’. Ӈацекына сава’’, хуркари’’ нися’ манд’ нива’’: тарця ӈацекэн’ харвадм’.

Ассоциация «Ямал потомкам» тюку ялян’ лаханась: ӈэта’’ ниня’’ сатавна ну’’, сава нядаӈгодадидо’ хусувэй районхана манзара’’. Ненэця’’ общественный манзаямдо’ таросяда манзаяӈэ’ нидо’ мэс’’. Есям’ тикы е’’эмня нибнандо’ нямарпю’’ ӈод харто’ нидо’ хуркари’’ серкана нядабидо’. Ӈацекы’’ нидо’ ӈод ӈарка ненэцието’ манзаям’ маниесь харто’ манзаравадо’ таня. Молодёжный отделениедо’ тюку по’ самляӈг яӈганя помда мэ’’ӈась. Тикы ӈани’ «Ямал потомкам» манзая’ ӈэ’’нив.

Тюку яля’’хана маня’’ округна ассоциация ӈарка ялямда мэта’’. Тарця ялян’ тэвась хэвхы округна ассоциация’ нерм’ пэртя Эдман Неркаги тарця вади’’ хэтась: – Вадами’ сава ӈэӈгу: сава сёнзя’ ӈэя, нерняку’’ ӈэя, илда сава ӈэя, тыдо’ илея’’, халядо’ таняя’’. Ӈацекыдо’ нёя’’ хаӈгур’’, манзаямдо’ пэрӈая’’, няха’’на тэворкава’’.