Раиса Яптунэ Таймыр’ яхана соявы не, харта яхананда нянэй вада’ нямна маля пон’ манзара. Маня’’ телевиденияна 25 поданда хая’’. 89 похона сертавы, мань’ тикана сидя ю’’ по’’ манзарадм’.

Нюртей 94 похона, ты’’ ниць ирыхана тодамзь. Тамальӈгана художественный редакцияхана манзарадамзь’. Ӈаркая передачи’’ сертабасьтыва’’, мань’ нянэй вадам’ сертабидамзь’. Сидя вадам’ мэцьтыва. Тыбэртина’’ ила’’ нямна лаханамась, тыбэрти’’ падбидамзь. Тарця манзаями’ ехэравась, мань’ учительӈэ 23 по’’ манзарадамзь, школа директорӈэ’ тарадамзь.

2007 по’ реорганизациям’ сертаць. Тамальӈгана радиовна тет’’ вадавна передачи’’ пэрцетыва’’, телевидение харад харта яхананда ӈась. Тикахад ВГТРКӈэ’ тад хаява’’. Ӈули сидна’’ малӈэ ӈобт’ мэ’’. Манзаранина’’ тянёма’’. Ӈопой редакциям’ серта’’, пудана юн’ сертабадаӈэ’. Едэй товы мун’ пэрӈава’’, ялянда тет ю’’ минут’’. Нянэй вадавна юн’’ минут’’ субботана ӈадиберӈава. Ти’, тарем’ теда манзарава’’.

– Няръяна мар’ няна мэвами’ ӈоб яӈгу’ нив. Тарем’ ӈод, теневана нини’’ таняна таня’’. Иб ӈод ненецкий округан’ тован’ харва нидум. Тарем’ еримбнанда, ӈани’ товнда похона нидм’ тут’’. Едэй по’ това’ сер, Ненэцие’’ округхана, Няръяна маркана илена’’ ненэцяӈга мададм’ : товы по’ ӈока сава юнм’ яханда тэврая, ненэциеда’’ сенз’ ӈэя, выӈгана мюсерта’’ ненэциеда’’ тэкоцидо’ сававна лэтамбая’’, ямдо’ сахарамбая’’. Нюда’’ нянэй илеван’ тохоламбида’’. Ӈэрм’ яхана иленаӈэ няха’’на ненэцие’’ ватовна тэвормава таняя.