Тюку по’ паднана Пеля Пунух , Тимофей Петрович Синицын юр’’ сидя ю’’ помда ядтаваць. Тикы ӈарка, теневана паднана. Ӈацекы’’ е’’эмня падвы манзаида ӈод’ таня.

«Ири няби нюда ню» лаханаком’ падвысь, тикы лаханако’ пелямда теда толара’’. Ненэця’ вадавна Роза Ивановна Канюкова’ хэтвы.

Якляко Лаптандер небяси’’, нисяси’’ иле. Нись ӈаха’’на хадада яӈгумы. Якляко Ефим ирикэнда ня’ сидяӈэ илеӈаха’. Ефим’ вэсэй сырэй ханесэйда: Явы варко, вэбарка, ӈарти, тивтей, няк, нохоко нися’’ам ӈа’’. Та’ мальӈгана ябтом’ хадасеты, ёрцеты, сар’’ню ма’’ламбсеты. Якляхава ирикэнда пумна пили’’ ядэрцеты. Си’’ив по’ ямбан’ тарем’ пыди’ илеӈаха’. Ирикэ Яклямда ханесь, ёрць тохоламбасеты, вадаку, лахарё хэтбасеты, хыноцеты. Якля иринда хусувэй вадан’ пунры. Пыда иримда саць мэнедась. Ирида ӈо’’ пыда сита мэнесь. Сидтэхэ’ тамна хаерм’ саць хамзӈаханзь. Февраль’ нюртей’’ ялуда миӈа’’. Хусувэй хув’ Якля ирикэнда ня хойко’ ниня ӈамдё хувы ялумдад’ няӈэн’ сырцетыхы’. Хаер’’ тарпвам’ ӈатесетыхы’. Ефим’ ирикэ’ вада’’амна хаер’’ пыди’ сити’ тотрев’, ненэй хибяридарев’ пэдаӈга. Ӈадьбята хой’’ тяха’ хонёванзь пакалцеты’’. Ӈани ханяӈэхэ’’на пон’ хонёсеты.

Якля иринда вадаха’’ пунры. Хаерци’’ илеб’’ вэва. Ямгана хамба’’ ни’’ со’’. Я’ сармикэця’’ хоны’’. Вэнекохорт, хибярихирт понкурка’ хонёван’ харва. Хаер’’ сидёва сер’ мал’ сидёда’’. Сидёвы, юрквы хаерм’ ядабта тара. Якля ирикэнда ня’ хаерм’ сямянхат нюртейӈэ ядабтаван’ харвади’. Хов, ӈатена яляди’ тованонда. Няръяна ялумд’’ сырам’ нярмра. Ям’ ялумдамбада хаер’’ нюртей’’ иняко’’ ӈадимя’’. Ефим вэсако Якляко’ ня’ ӈэти’ ни’ санэйха’, маймба тёрырӈаха’. Вэсако манзьты: – Тоӈов! Ӈадимёв! Хаерэцями’ сидыӈэй! Хаерэцями’ юркыӈэй!

Якля ӈобтарем’ ӈарка’’евна ирикэнда пумна тёренасеты: – Тоӈов! Ӈадимёв! Хаерэцями’ сидыӈэй! Хаерэцями’ юркыӈэй! Ненэсянда ӈо’’, февраль ирий ненэцие’’ вато’’омна ярэй ирийӈэ таслабэй. Хаер’’ вынд’ яраӈга, нюртей няръяна инякуда вынд’ ха’’аврамби.