Сенз’ ӈэва’ сер’’ яля’’, ирий’’, по’’ мер’’ ваераӈга’’. Нись’ ӈахакуна тамна мэта’’ пова ядтавась хамякуваць, теда маниесь’ маля пудана’’ яля’’хата’’ тэвотына’’. Едэй сидя ёнар’’ самлязимдей пом’ ядабтамбива’’. Хусувэй ӈарка яляхана няха’’на сейхад’ миндя’’ вади’’ мэцьтыва’’. «Ясавэй» ассоциацияд’, округна администрация ӈэрм’ серо’ тасламбада управленияхад’ тарця вада’’ нянда’’.

Округна хибяри’’!

Ӈэлов едэй по’ тута. Тикы ед’ Ассоциация «Ясавэй» манзаям’ нерня пэртя’’ нина’’ Советхана, ӈаромбэй хибяри’’ хусувэй ненэця’ хибярин’ сава вадам’ ӈэдарамби’’. Ена’’ –ханзер’’ мал манзараӈгуда’’, масьтёдада’’ тарем серона’’ нерня минда’’, илебцава сава ӈэӈгу’’.

Нерняӈы’ илевахана хусувэй мякана, хусувэй хардахана хибярина маймба илея’’, сенз’ ӈэя’’, нюкцидо’ сава хибяриӈэ’ вадюданая’’; явнана хадырта’’ тына’’ ӈока’’ ӈэя’’! Ява’ лэтбась, сахарамбась; нина’’ нядабась яханана илехова’’. Хусувэй танеда’’ серуна’’ ӈобкана таслабхана’’.

Едэй товнда, сидя ёнар’’ самлязимдей яӈганя пом’ сава ихиня ядабтара’’!

Маня’’ сава нина’’!

Тамна ӈопой по’ ваера. По’ ямбан яханана хуркари’’ сер’’ таняць. Вэвко’ сер’’ поӈгана савада ӈокаркась, тикы маля ихиня сава. Нерняна товнда по’ ӈод тарця ӈэӈгу’’ нив. Хусувэй округна хибяри’’ еная’’, илевава’’ вэва ни’’ӈэӈгу’’. Ӈодь’ хусувэй хибяри’’ сенз’ ӈэя’’, манзаяда таняя’’, нюда’’ харвась’ тоходаная’’, харто’ культурамдо’ теневая, вадамдо’ мэ’’ӈая’’. Яхананда тад’ нерня ябда иледа’’, хаярэко’ ява ябимдамбая, сава юн’ хусувэй мят’ тэворӈая’’, тына’’ таняя’’.