Тамна ӈопой’ вадам’ мэта Лариса Тайбери. Тикы некоця Саля’хардахана иле, мутра’ манзаям’ пэртя’’. Тюку яля’ округна хибярихи’ тарця вади’’ хэтби’’.

– Пэ’ тяхана илена’’ нянэй ненэця’’ нина’’, нянда’’ торова ӈэя! Тад’ товнда похона, сензва’’ ӈэхова’’, тыбэртита’’ тыдо’ сенз’ӈэя’’, няновна тикахад’ илдо’ нив’ ӈа’’. Ты’’ илӈгана иленар’’, вадамда мэ’’ӈа’’, нюкцида вадан’ тохоламби’’. Мань’ нянэй илӈгана илена’’ нина’’ ёльце саву’’ян’, пыдо’ вададо’ мин’’ӈа’’, вададо’ нерня миӈа’’, нюкцидо’ тохолаби’’. Тиканда хардахана илена ӈод, ӈани нюмда тохола пир’’ӈадава хадри’’, ӈодь вадамдо’мякнанда мэ’’ӈамдо’. Намдуртада ӈацекы, манд’ нив: вадами’ сава ӈэвынё. Тэри’’ таремӈгова, вадам’ тохолава пява мальӈгана. Вадам’ теневаӈгур, тад’, харт вадам’ падаркана тохолаба пяӈгур ӈани’’,тикы вадар’ ӈоб ёльце’ саварха ӈэвы’’ ӈэнгу. Сямянхат’ тоенана’’ вадава, нянэй вада. Хуркари тасерада таненакы, грамматикада тоенава.

Ӈацекыдо’ невхы илӈгандо’ табедабӈгудо. Иринато’ ила хурка ӈэвам’ ваде’’ӈая’’, хурка манззая’’хана манзаравы’’. Тикахад тюку илӈгана хурка манзая’’ таня’’, нюкцидо’ ӈани тикан’ табедабидо’.Нюдо’ тохолкова няюв’ ӈоб пэръядо’. Мань’ теда нюхуни’ тарем маньзьтым’: нерняӈы илра’’ харта’’ мэмндара’’, мань ӈани’ сидда’’ нядаӈгудм’ тарця илӈганда’’ тэва’’, сямбирувна пир’’ӈава. Масьтыдм’: тюку тохолковар’, нерня ӈэвар’ харт’ нянанд тараӈгу. Хибя’’ небя, нися ни’’харва’’, нюда савовна тохолкоя, савовна илея, нюта нюкця’’ пуна маймбаӈгу’ нив’’.

Тикахад’, яханана саць нёя тецю, мюсерма ёльцяӈгана сава ӈгува. Хадхава сер’’ нинакы’ ӈа’’. Илеванда’ сер, ханяримна таняримна ӈэдалёрман’ харвада’’, ӈани ям’ манэ’’ӈада’’. Маня’’ ярива, мюсерта’’ ненэцяӈэ ханяна илева’’ ,я’ тикаривна вуни’ сусаӈг’’. Ӈани’’ я’’ тане’ ним, манэ’’ӈада, ханяна ненэця’’ ханзер’’ иле’’. Россиява’ ӈэя’ ӈань, тарця я’ ним’’ таня, маня’’ нядана тамна вэвовна илена’’, тикым манэ’’тан’, манд’ нинув’: илми’ няно’’ вэвохова нивынё ӈа. Илеван’ харвабцора’ таняя’’.