Теда мадабада пова’яханана культура поӈэ’таславысь. По’ ямбан ханярина, маркана ӈэя, округна ӈэсыхына культурахад’ перена’’ сер’’ ӈокаць. Тикым’ маня’’ маркана иленаӈэ’ маниеваць, ӈока ваеравы мероприятияхана мэвава’’ танясь.
«Ханебцём’» нюбета фольклорный группахана сянакода’’ нина’’ маля няхарамдэй по’ ямбан ӈобкана ма’’лы’’. Пыдо’ малӈэ’ Саляхана соявы, вадювы, ханяӈыдо’ тикы ӈэсыхына март’ товандо’ нерцю ӈока по’’ ямбан манзараць. Малнӈэ’ пыдо’ вадамдо’ мэ’’та’’, ненэцие’’ культурам’ теневана’’, невхы хой’илм’ тенена’’. Пыдо’ паӈгудо’ хойхад’ миӈа. «Ханебцёхона» хыно’’тина нянэювна невхы сё’’ мэта’’, тикы’ хавна ӈани’программыдо’ таня’’. Ханяӈэна март’ товы мядондина’’ядабтабсеты’’, хуркари ӈарка ялян’ хамандавы программы’’ нэбсеты’’. Нись ӈахакуна «Ясавэй» ассоциацияна сидя ю’’ самляӈг пом’ мэ’’махана пыдо’ ма’’лёвава нэмбидось. Хамадавы’’ вадидо’ яна нямна ӈаць, нерня сававна илева нямна нина’’ сававна лаханаць. Тикахад’ носиндалава ирийхана ненэцие’’ культура, ненэцие’’ паднава серу’’ таламбава ялуна мальӈгана нянэювна хари’’ тенз’ хибярито’ культурам’ теневана нина’’ тарця яля’’хана ив’ер манзараць. Хари’’ культурава, вадава нерня танева’’ е’’эмня мал’’тикым’ теда вадюданна’’ ӈацекэхэ’ вадець тара, теневанамд’ манэ’’лабтабась. Ӈацекы’’ вадамдо’ намдурць лаханаван’ харвялаӈгуд. Тарцям’ хамадамбая, хынокад’нина’’ ӈацекы’’ няюв тэворцеты’’. Культура’ ялуна мэ’’мана мальӈгана пыдо’ ӈани школа-интернатан’, санаторной школан’, евако ӈацекы’’ хардан’ тэворӈаць, сертавы манзаидо’ ӈацекехэ’ манэ’’лабтабиць.
«Венок дружбы» ма’’лёвахана Саляхад товы нина’’ харто’ яндо’ нямна стенд’ хамандаць, харто’ ӈэсындо’ историям’ ваде’’ӈаць. Хурка ӈарка хибяри’’ тикы ӈэсыхыд’ тарпыдаць. Тюкумэвахана ма’’лёван’ товы’’ хибяри’’ Юрий Выучейский нямна вади’’ намдаць, тикы ненэць илеванда ямбан Ханты- Мансийск’ маркана хибяри савумдабвысь. Роза Ивановна Канюкова теневана нява, пыда ӈод Саля’тер не. Пыда падвы манзаида тэвравыць, образование серкана илеванда ямбан манзарана няндо’ манзаи’’ нямна ӈока сава вади’’ хэтаць. Роза Ивановна тюку по’ ӈадимы манзаита нямна лаханась.
Ӈарка пэвдэй ирий маттамдэй яляхана культурно-деловой центр мякана «Ханебцё» ӈани’ танясь, нина’’товнда пом’ ядабтавась нянэювна хамады’’. Мэкадувна ембдёсь, ненэцие’’ едэй по’нямна лаханаць.
