Хусувэй сидя по’ ваерась Няръяна маркана «Сава сё» фольклорный конкурс’ танесеты. Тюку по’ хынокад’ ненэциена ӈани’ ма’’лаӈгуд. Теда ханярина илена’’ хынокад’ нина’’ тарця яляха’’ хамяку’’.
Хонгурейхад’ «Сава сёхона» Надежда Аркадьевна Канюкова хыно’’манзь’ ятна, пыда сёмда ӈока ныдсетыва’’. Конкурсан’ ив’ер хамяку. Пыда няюв’ лаханамась: – Мань Нельмин Носхана соямась, Няхар Бугры я’ танясь ӈань таняна вадымась. Школа интернатхана тоходанамась, хаюпа хэ’’мяхадан’ Хонгурейхана илем’. Ӈэлов’ маля тет ю’’ поӈэ’ ханта ханзер’’ таняна илем’. Вэсаков’ илеванда ямбан тыбэртяӈэ’ манзара, пыда саць сававна харта вадавнанда лахана. Поӈгнани’ пилибт’ ненэця’’ вадавна лаханасьтыни’. Ханяӈы вадида тамна мань’ ехэрасьтын’. Нюртей по’ ся’’ня илесь’ пябни’, тарця сер’ танясь. Стол’ тяна ӈамдыва’’, сяйӈава’’. Мань мам’: педак’ тахаркарт. Пыда ма’’нив’: ӈамгэм’ теда ваде’’ӈанда? Мам’: – Педак’ тахаркарт. Тикахад’ манэ’’лабтав’. Пыда ма’’нив: тикы педак’ ни’’ ӈа’’, тикы лебя’’. Хада’ савав хэвханан’ ӈамды, ти’ письӈа… Ма’’нив: ӈопой яхана иленар’ мада – педак, нябиюм’ яхана иленар’ мада – лебя. Ти’, вадава хурка? Тарем’ илевани’ ямбан харни’ вадавнани’ лаханани’, мань’ ханяӈэна хыноцетым’. Пыда ӈани’ инзелесьты. Теда мань’ «Сава сён’» хамякум’ ӈани, няхан масьтым’: хэхэни’ ӈобкана клубан’, сим’ нядабагун’. Теда вэсаков’ тобакоцяхана сянакосьты, мань’ хыноцетым’. Тарем’ нибнан’ хынос’’, вэсаков’ сим’ нядабасьты, хэтсетыда: ханзер’’ собнанда тара’’. Невхы хынс’ мэ’’мась хамадабим’.
Корр: Надежда Аркадьевна, пыдар маля сян’’ «Сава сёхона» хыноцетын’, тюку по’ ӈод тарця ялян хамякун’. Ханяхад’ ӈавнанда сём’ минрен’, ханяхад’ тухусан’ хыноць?
– Мань’ нюдяком’ ӈэбнан’ Нельмин Носхана хибяри’’ тамна тандая хойхад’ хардан’ илевась тэвотыдаць. Ханяӈэна не’’ ӈопой’ хардан’ ма’’ласьтыд’, сэдъидо’ мэсьты’’, тэнком’ мивась тэврасьты’’. Тад’ ма’’лаӈгуд’, лата ни’ ӈамдаӈгуд’, ӈопойдо’ хынота, ӈани’’ ӈани инзелесьты’’. Тикым’ саць сававна тенев’, мань’ ӈод инзелесьтым’, ихинян’ саць савархась.
Тикахад’ мань’ ӈод харн’ пирувнан хыноцетым’. Тянякунана вэсакоця илесь. Мань’ тикы ирикоця’ хэван’ хэсьтым’, масьтым’: ириӈэй’, инзеле’’ӈэй, мань’ теда хыно’’там’. Ти’, пыда ӈамдсеты, табкында, инзелесьты. Мань’ тэри’’ хынотам’. Ирив’ масьты: со’’ ӈэй хыно’’ӈанэй. Ихинян’ ёльце саварха ӈэсьты. Самляӈг пов’ ӈэвакы тамальӈгана. Ири’ сяхарт’ нисьты пилимбю’’, тэри’’ сим’ савута. Ӈацекы хыно’’ӈа.
Масьтынё: ханяӈэр’ хойхана илеванда ямбан илеӈгу, сёда ни’’ хайнаӈгу, ни’’ хынот. Сё’’ мю’’няд’ мимбнанда нив’ тара. Ихинян’ масьтым’: ненсянда ӈод’ тарця ӈэван’ хабе. Теда ӈод’ пилибт’ хыно’’ман’ харвам’, ихинян’ саварха’ ӈэсьты сём’ ханабнан’.
«Сава сёна» хыноцетыдм’. Тюку по’ таневнда «Сава сён» сидя по’’ ямбан янамбовна хамякум’, мэм’’нда хынсан’ хамадабим’. Нись’ хамякось, ханзер’’ сценан’ тарпгун’?! Маньзьван’ тарем’ таслабив’: сёр’ мюняхад’ мимбнанда тара, тикахана хайнаӈгу. «Сава сём’» ӈатев’, ив’ теда маля няркна: ханзер’’ ваераӈгу, ханзер’’ хынотам’. Ханяӈэна, тад’ пи немав’ ханта, ив’инда «Сава сё» нямна ядэрцеты. Ханяӈэхэна таленарка хыноцетым’. Тасалкодам’: ханзер’’ саварка ӈэбнанда, ханзер’’ вадид’ мэць саварка ӈэдарха’. Хибяхарт’ нибнанда ман’: ванзер’’ хыно’’ӈа’’. Инзеледа’’ хаваха’’на’’ сава ӈэбнанда.
Тюку по’ «Сава сё» сидна’’ Няръяна маркана мэта’’ ирийна пудана яляхана ма’’лаӈгу’’. Хибя’’ ханяхад’ тута’’, хурка несэй сё’’ тэвраӈгу’’ мал’’ тикым’ маня’’ ӈатева’’. Хынокад’ нина’’ ӈани’ тарця конкурсан’ ханярина хамяку’’. Надежда Аркадьевна ӈод’ товнда «Сава сёхона» сёда’ сававна хайная. Сейхананда сава сер’ нянда маймбцом’ тэврая’’!
Тюку по’ таневнда «Сава сён» Ямалкад’ хынокад’ ненэця’’ товась ятна, поӈгнанда теневана няхаюна Татьяна Лар, Елена Уфимцева. «Вы сей» группамди’ тэвравась мэ’’ӈаха’.
