Товнда ныланава’’ яляхана Няръяна маркана хуркари’’ мероприятия’’ ӈока’’ ӈэвась’ пэрӈа’’. Нумда ӈод’ сава ӈэвась мэнарха’. Ӈодьбянда мякнанда нёда’’ сы’’ӈадю’’, ныланавась март’ тарпыда’’.

Сямянд’ нерде хэтгув’. Этно-культурный центрхана манзарана’’ нина’’ сидда’’ «Сава сём’» нюбета фольклорный фестивалькана ӈате’’. Яндахат’ товы’’ хынокад’ нина’’ ӈани’ сё’’ мэ’’манзь’ ма’’лэйдаць. Фестивалькана мядондина’’ ӈод танеӈгу’’. Ӈока’’ едэй сём’ намдгуда’’, несэй хынокад’ хибяри’’ торомдаӈгуда’’. Турӈада’’.

Тикахад’ тамна ихиня сомбой сер’ танеӈгу. «Юность Севера» ансамбльхана тарана’’ ӈацекы’’ ӈарка концертм’ хамадаць. Таняна ӈод’ сававна нылаӈгуда’’, ныхыдамда нерня манзарава’’ е’’эмня ма’’лаӈгуда’’.

Мэта си’’ивна пудана яляхана хусувэй по’ танеда сер’ ваераӈгу’’. Тикы пилибт’ вадетадо’ буранхана ӈэдалёрма’’. «Буран Дэй» тюкумэвахана невхы тиртя’’ ӈано’’ ӈамдолава яхана ваераӈгу’’. Тюкумэвахана тарця ялян’ товы’’ мядонда’’ маркана ӈока ӈэӈгу’’. Хибя’’ буранхана ӈэдалёрман’ сырман’ харвабнанда таняюв’ тоя’’.