Вы здесь

Няхар’’ Хэно’ папа

Сидя хасава нёхова харва’’ пырдариюв’ сюрахалъяханё’’. Миё’’ма минанди’ ӈанокомди’ ти’ хатамлади’. Мань няюни тидахалъяха’. Я’ хэван’ тидахалкава, ӈано’ мю’ вэ’’лими модм’. Сидя хасава тяханяюв’ си’’ми вэхэраӈаха’. Тарем’ сырпа’’ни хасаваха’ сейди’ ӈули’’ пина’’, ӈуда’’ ледре’’, пан’’ ледре’’. Яха’ лаӈган’ тэвавана сер’ сидя хасава ӈэти’ хадари’’ мядоти’ няна хая’’. Ӈадяда мядо’ няюв’ янамбавна ял’’ ни’’ивам’. Юд’ мяд’ вэн’’ вадо’’ маларихи’’ си’’ми ядабта’’. Вэно’’ мадарихи’’ еркы мякад нё пахабтэй. Ӈарка’’я не, марцьте’’э не, парисе’’э не, парисе’’э не пин’ тарп’’ ни’’им’. Тарпа’’ма минанда нянани тонё’’. Няби тюхудани еркы мяд’ ня’ си’’ми валаӈанё’’. Мят’ тю’’махадани’ манзь ханаӈада: – Не ӈацекы, ёховы нен’ евэйкодада ми’’мы ӈэя.

Не ӈацекы евэйкодами ӈули’’ тянёвна хыдя’ мю’ вабта. Ӈули’’ нив’’ мале’’. Ӈарка’’я не ӈани’ тарем’ ма: -Не ӈацекы, ёховы нем’ нёра’’ пэр’’, пуна мыӈгаданда хась пиртада.

Ту’ хэвахана ӈамдёдарихини хонараривэв’’. Нема вэхэра хувы’’ ӈэвы’’. Ӈарка’’я не сидёдаӈэ си’’ми манэ’’лись хэвахани то. Манзь ханада: – Ёховы не ӈуда’ маядярт, ӈа’ маядярт ӈэридабтав?

Мань ӈани’ мадм’: -Ӈа’ маядяртм’. Епадя тудами пюрӈадм’. Марцьте’’э не ӈани’ тарем’ ма: -Епадя тухувм’ ханарахананё’’. Техэ паӈгамд намдарихивава.

Мань вахалъяв’’: -Техэ паӈгами енар’’ ни’’ӈа’’. Няхар’’ Хэно’ папам’ тэри нюбе’’ӈадм’.

– Няхар’’ Хэном’ хани’ намдахана намдарисетыдм’. Ӈарка’’я не мят’ та’ илелъяв’’. Тет си’’ивахана ӈамзами мив. Ся’’ны ӈэбто’ ялей’’ ӈэвы’’. Ӈарка’’я’ не’ ня’ тэхэ’’на мэвэни’.

Ӈарка’’я не ӈули’’ нямбара хибяри ӈэвы, ӈамгэ тикы’’мана тэри лаханаку. Нями ӈани’ ма: – Ёховы не – няхар’’ Хэно’ папа тай’ сыркар’’. Ты’ варувна париденя тёня ти санабарта. Ӈамзи’’ ӈэт ниня тэвариб’’нанд ханя сава ӈа’’.

Ирими ядэрӈа: « Ӈавахаванани’ ябтабэй ябту си’’ив салте’’э то варувна тад нёдалпа’’ни тэвасетынанё’’. Париденя тёням’ хортанакэв.»

Тикаринда ӈо’’ нянзавэй’ мадм’: -Я’’амба’’ни ӈо’’, хортанакэв.

Ты’’ вар’ ня’ варцядтев. Париденя тёня си’’ми манэ’’лись тартрем’ пу’’лэй. Пон’ нив нёда’’, паё’’ неру’’ понд’ пакалтанаханда пуй ӈэхэданда таль’ нэкалӈав. Та’ хадав. Ӈарка’’я не ёлида теклы. Пыда тарем’ма: -Ёховы не ян сюдбян. Тад ӈо’’ ӈэсь ӈо’’ хад’ нехэртан’ ӈэбтав’? Хасавахаван нинякэн ӈа’’? Маня’’ тюку яханана’’ харан’ харвана ненэцяма’’ нива’’ ӈа’’. Си’’ми неданд мы’’. Мань ӈани’ мадм’: – Мара пыдъюл нехэртан ӈэбтав’’? Хасавахаван нинякэн ӈа’’? Ӈари’’ маньзяван сёбям’ нидм мэс’’, ненэсяри недм’.

Тарць’’ харахана ӈарка’’я не вадам’ ни соя’’. Хуркаси’’ – хараси’’ мякани’ хаяни’. Тикы мякани тэвамахадани’ ӈарка’’я не ӈоб’ тёрибтей’’: – Ӈэсы’ ӈацекы’’, сёбям’ мэтаӈэ, таӈы яляхана тосяда ханим’ нида’’мсету’’. Сыркарӈада’’, ёховы не ӈамзи’’ ӈэта ниня тёням’ тэвась.