Я’ сяр ниня’’ хуркари’’ тенз’’ мэта хибяри’’ иле’’. Хусувэнд’ харто’ вададо, харто’ лаханакудо’ таня’’. Маня’’, нянэй ненэцяӈэ’, хари’’ лаханакуна’’ тянё вуни’’ ӈа’’. Ханяӈэхэна луца’’ мэкад’ лаханако’’ ненэця’ вадан’ сертабасьтына’’. Мария Яковлевна Бармич «Пыря табековна» лаханаком’ тарем’ падвэдась. Тикы лаханако’ пелям’ толара’’, тикахад’ лаханаковна падтавэм’ сертада’’. Манзаида’ някуна’’ ӈэдараида’’.

Ся’’ны ӈэбта ӈо’’ вэсако илевы. Пыда няхар нюда танявы: сидяди’ иӈудотаха’, няхарамдэй ӈани’ – са’’лакоця Емеля ӈэвы. Сидя ӈаркаюмха’ пили’’ манзараӈаха’, Емеля ӈани’ яля’ ямбан’ луца хор’ ниня ӈамды, ӈамгэхэртм’ тене ни харва’’.

Ӈобӈгуна няхаюда базаран’ хаяха’, не’’ ӈани’, мея’’, сита ӈэдарамба сэкта’’:

- Емеля, итадава’’ хосая хань’’!

Пыда ӈани’ хор’ нид лахана: - Нидм’ харва’’…

- Емеля, хань’’ма, няхаюд базархад салтыхы’, нянд мядонзэдамд нихи’ тат’’.

- Ет’, ӈэёв…

Емеля хор’ нид ха’’мы’’, пибида сера, ембай’’, иде’’ ед ня’’ма, тубкамда хана, яха’ няю’ пяда. Нермя’ сим’ яха’ салабахана си’’ӈа, иде’’ ед панда, ӈабтэйда, харта ӈани’ нерня’ син’ сырӈа. Емеля нермя’ сихина пырям’ манэ’’ӈа. Ханзеркава пырям’ ӈудахананда ня’’ма хорӈада: - Ти, ӈамнялада евэй ӈэӈгу!

Лэркабт’ пыряя нянда ненэй ненэця’ вадавна лахана пяда: - Емеля, си’’ми ит’ ӈэдара’’, мань нянанд тараӈгудм’.

Емеля ӈани’ письӈа: - Пыдар ӈамгэ нянан тараӈгун? Ниӈэ, хардахан сит мине ханаӈгудм’, меякун евэйм’ пиреӈгу’’.

Пыря ӈани’ хынумба пяда: - Си’’ми ит’ ӈэдара’’, ӈамгэм харваӈгун, мань мал’ сертаӈгув.

- Ӈэёв, тандаяри’ манэ’’лабтад, си’’ми нин не’’эльтембю’’? Тикана сит ӈэдараӈгудм’.

Пыряя сита хонрамби: - Емеля, Емеля, ман’’ – пыдар теда’ ӈамгэр тара?

- Иде’’н ед харто’ хардан’ ядалпато’, идедо’ ниб’’нандо’ тялду’’…

Пыряя нянда ма: - Мань вадини тензибтен’’: сяхаӈгава’’ ӈамгэн’ харбелаб’’нанд валакада тарця вади ман’’: «Пыря’ табековна, мань харвабцовнани».

Емеля лахана: - Пыря’ табековна, мань харвабцовнани – ид’ ед’’ харта’’ хардаханда’’ миӈада’’!

Валакари ма, ид’ ед’’ харто’ ӈо’’ хой’ ни’ хая’’. Емеля пырямда нермя’ син’ ӈэдарада, харта ӈани’ ид’ ед’’ пумна ядалй’’.

Иде’’ ед’’ ӈэсы’ помна яда’’, ненэця’’ пыса’’, Емеля ӈани’ пумнандо’ яда писецюмби… Ид’’ ед’’ харад’ мю’ тю’’, харто’ нубцяӈгандо’ нулъяд’’. Емеля ӈани’ хор ни’ танэй’’…

Ненэй вадан’ М. Бармич падвэдась