Вы здесь

Ӈэ’’ли ӈая тар’’

Лимбя ирийна тетимдей’ яӈганя яляхана тарпвы’’ газетана « Ӈэ’’ли ӈая тар’’» сюдбабц нюртей’ пелям’ толадаць’’. Сюдбабц яб’ ӈэ’’нив’. Тюку яля’ тамна ӈопой’ пелямда толада’’.

Тикаринда’ӈо’’ ваӈгари я’’мана пыди сюрбаяха’. Тайнани’ хунанани’ тёрсавэй’’ Сюдбя ирини мят’ тюдамнё: - Ирикэхэюн хадакэхэюн мэкацядамди минредамзь, хади’’ни поӈгад  ӈэдараӈахаюн, ӈахакавахана ниванӈгабяха хань.

Ирихи’’ нялиди’ няӈгары’’: - Ханьевнов, ханьевнов, тедари’ нюдякоцяен нинав’ ӈа’’, ханьевнар ӈэдарабта’’. Тикаринда ӈод’’ Сюдбя вэсако пано’’ ӈэсомана яӈэсь панэцида ти сяръяда, пирин пяда. Тарпотаванда сер’’ мамбата масьнё’’: - Ӈавнахавани си’’ив яляхана хэвы тэворцетыдм’, теда’ хэвыкоехэва’’ ӈамгэди’ таня. Вадада пуда.

Неяни няна мань хаядамнё’’. Товами манэць нея май’’ ни’’им’: - Еванзадаков ӈарамгаявэн.

Едм’ ханя пире’’. Ӈавормани сер’ неяв масьнё’’: - Еванзадаков, техэдм паӈгадм пыдар вунир тенев’’. Ӈая тарт пыдар нин ӈа’’. Ӈавна хунанда Яво’’ тэта’’ танявы’’. Итя ӈабтене’’э’ яв’ хэвувна пили’’ мюсярмы’’. Тэхэвада тэдо’ луца’ ю’’ ёнар’’ ӈэвы’’. Неда танявы, няхарм; потакода нанакода нюда, нюда танявы. Хэваханандо’ сидя маӈгабада Мандо илевэхэ’. Ӈули’’ маӈгабавэхэ’. Яв’ тэтахаданди’ подерпади мэцетавэхэ’, ханяӈэхэна ӈамзако ханя’ ӈа’’. Ся’’ны ӈэбта ӈод’’ Нюдя Мандор некаханда тарем’ мамы: -  Ӈабцата ӈод’’ тэтами хадами, луца’ ю’’ ёнар мани’ тыни’ ӈэӈгу’’.

Нябир мамы ӈэ’’нив’: - Тэтами савасянё’’, ханя’ хадаӈгуми’? Нюдя Мандор няхар’’ яля выктавы, няхар’’ ӈэсоӈгана яля’ ӈэсоӈгана Ӈарканд Мандонд хавода есьмакы’’ ма’’нив’: - Ет’ ӈо’’ хадаӈгодакэми.

Мандокохоюд пи’ сава еркана мядм’ талавэхэ’, тэтанди’ ӈэва’ ет’ тойсумбавэхэ’, сыӈго яӈговы, ӈаво’’ пирка’’на Яв’ тэта’ не вахалъй’’: - Тэтанди’ пэӈада ханюй, ӈаха’’на хаясь. Тарця вади намдахава пэвдя’ помна хадом’ сюртевэхэ’. Тэтанди’ яд’’мам’ ханяди’ ху’’. Итя ӈабтене’’э яв’ няю’ пилибт’’ пявэда.

Тиканда сидя Мандор тайна хунанди’ тэтамди’ яв’ маран’ манэ’’мэди’, тамна мякы тоётавы. Сянанд’ хунанд’ нёдавакэди’ ӈани ибэй ид’ тяха’ пилибт’’ ӈэдарабтавэди’. Тамна тарем’ мамэхэ’: - Ӈудасяда и’’ харта хадаӈгуда. Тиказавахад сидя маӈгабада луца ю’’ ёнарм’ мяканди’ танавыди’, немда ханавэхэ’. Сыӈгарё’ сусамахад яв’ тэта я’ няю ххэвы, макананда нанакомда нюмдя тамна минармэда. Ӈэрёй ӈэвы’’, нумда ипикако, ханя’ хаерако ӈэвы. Яв’ тэтар мара’ ни’ ханараравы’’. Хане сарвоёрмандо’ сер’’ няхар’’ Ӈая тар’’ ховэдо’ ӈэ’’ нидом’, та’ хадавэдо’. Макаданда ӈацекым ховы’’. Ханя’ мэкадако’ ӈэвы. Няхар’’ Ӈая тар’’ помнандо’ тарем’ мамы’’: - Тюкохов нена’’ мэкадаконё’’, нядана’’ мэхэва’’, вадаӈгу’’ ни’’вам’. Тикы ӈацекэця пыдар ӈэ’’ нинав’, сит вада’’мадо’ ти’’. Ӈэ’’ли ӈая тарм’ ӈадьбят нюте’’ӈан. Сюдбя’ не ню Нея падарм’ пада, няни’ тада мамбата масьнё’’: - Сяхари’ параӈодан’ тэвриб’’нанд тюку падарм’ ӈадимдиӈгунава, ёльце сававна лэтрамбъир. Нер’’ тоб’’нанд сидя ябта Ӈацьм’ ӈэдаранаси’’, тикэхэюд сидя маӈгабада Мандохоют нюху’. Тикэхэваха’ серти’ӈули’’ яӈгу, мара’’ ӈэдаравэхэюд, ир лата ӈэвы. Яханд тэванан ӈэбат сидя Мандомд ханзели’ мэхэюн, тедахав вэсэймахама ӈод’’, ялэди’ хая’’. Тыд, харт тыд тэхэбид мэн’’. Вади’’ни валак’’. Тад нерня’ си’’ми ӈани’ нин хоӈгу’’, нема юдэхэна нини хомбахани’.

Малда ни’’ӈа’’.