Этно-культурный центрхана манзарана’’ нина’’ ӈарка манзаям’ сертамби’’. Таняна манзаранина’’ хуркари’’ тенз’ хибяри’’ культурам’ нерня минревахана тарана серу’’ таслаби’’. Тикы’ хавна «Заполярьем’» нюбета ЛитОбъединение’ паднаван’ харвана’’ хибярина няюв’ манзара.

Тамна этно-культурный центр мякана манзаранина’’ маля ӈахэт’ ӈацекы’’ е’’эмня журнал’ сертаби’’. «Пунушкам’» нюбета журналкоцям’ нюдя пэвдэй’ ирийхана ӈани’’ ня’’амаваць. Тарця журналкана ӈэрм’ ненэцие’’ культура’ нямна падна’’, тикахад’ хари’’ вадавна падвы’’ танесеты’’. Ӈацекы’’ харто’ тенз’ ненэцието’ культурам’ торомдаби’’, харто’ вадавнандо’ падвы толаби’’. Пудана’ тарпвы журналкана  ӈока мэкад’ ӈамгэм’ хоӈгуда’’. Тюкохона ӈахэт’ паднана’’ нина’’, тикахад’ тандая’ паднась’ пявы’’ хибярина стихм’ луца’’, ненэця’’ вадавна толаӈгуда’’. Хынокад’ ненэциена пуданамэвна ваеравы «Сава сё» конкурсхана мэмы’’ ханяӈы сё’’ ӈани’’ тикахана хоӈгуда’’, мел’’мана хыно’’мы’’ нида’’ тензебтеӈгуда’’. Хаювы по’ ты’’ сие ниць’ ирийхана теневана ненэць Филипп Никитич Ардеев си’’ив ю’’ пом’ ядтаваць. Пыда со’’ямы ялянда ед’ этно-культурный центр’ мякана выставка манзарась, тарця выставка нямна хамандавы материал’ журналкана хоӈгуда’’. Тандая’’ едэй товы’’ сидя ёнар’’ маттамдэй’ яӈганя пова’ ядабтава’’, тикы сер’ нямна вади’’ ӈани’ толаӈгуда’’.  

Нянэй ненэця’’ пилибт’ мел’’мана сэдорана’’ хибяри’’. Ханзер’’ маня’’ хибярина невхэна сэдораць, тены’’ похо’’на ненэця’’ ембдяродо’: мальцидо’, паныдо’, пибидо’ сэдбидо’ тикы нямна падвы вади’’ ӈани’’ хоӈгуда’’.

Ӈацекы’’ ӈод харто’ е’’эмняндо’ ӈока мэкад, тарана ӈамгэм’ хоӈгу’’. Ненэцие’’ падтаӈгода Нина Валейская теда Москва маркана иле. Хаювы по’ пыда си’’ив ю’’ пода панысь. Мэбэта падтаӈгода няна нямна лахарё таняна толава’’ пир’’. Хусувэй хибяри’’, хуний нянэй ненэця’’ культура’, вада’ нямна несэй ӈамгэм’ намдван’ харвабнанда «Пунушка» журналм’ хусувэй номер’ манэ’’ӈада’’, ӈока’’ нянанда мэкад’ таняна толагуда’’.

Ӈацекы’’ журнал’ ӈадимберма серт’ хусувэхэна ӈока ныхымдо’ Валентина Зганич, Любовь Царькова, Ольга Латышева масьтеби’’, пыдо’ таня паднана’’ хибяридо’ ма’’лаби’’. Округна хибяри’’ ӈод’  харто’ падвыдо’ таня’’ ӈэдарабидо’. Маня’’ округханана ӈацекы’’ е’’эмня сертабада’’, « Пунушкам’» нюбета журнал’ теда товы’ похона ю’’ поӈэ’ ханта’’ ханзер’’ яханана ӈадиберӈа’’. Ю’’ по’’ ямбан ӈарка манзая’ сертавы’’, ӈока’’ хибяри’’ таня’’ паднавы’’.