Вы здесь

Сава юн’ тэвравы’’

Мел’’ нина’’ яхана’’ ӈока мядонзэйм’ тэвраць

Ты’’ сие ирий сидя ю’’ сиднтетимдей яляхад’ ты ниць ирийна нябимдей’ толыр’’ н ӈэсонд’ Москва маркана «Сокровище Севера» нюбета выставка-ярмарка манзарась. Тюку по’ тарця ма’’лёва «Сокольники» нюбета’ конгрессно-выставочный центрхана ваерась.

Россияна ӈэрм’ яхад товы’’ хуркари’’ тенз’ мэта хибяри’’ харто’ яханандо’ иле’’вамдо’ манэ’’лабтаць, ӈамгэм’ пэрӈа’’, ӈамгэм’ сертаби, хурка ӈавар’’ ӈаворӈа’’. Хусувэй яхад’ товы’’ товы мел’’ хибяри’’, падтаӈгода’’ ӈобкана ма’’лэйдаць. Пыдо’ харто манзаидо’ манэ’’лабтабиць. Международный выставка-ярмарка сян’’ яля’’ миӈась. Тарця сер’ нямна ненэця’’ маля ӈока по’’ ямбан ма’’люрӈа. Таняна манзаравы выставкаха’ ӈока хибяри’’ турӈаць, хуркари’’ яхад’ товы’’ ненэця’’ тэвравы’’ манзаи’’ манэ’’сарӈаць; нянандо’ таранадамдо’ тэмдабиць.
Таӈок яля’’ хуркари’’ сомбой сер’’ ваераць: мирдатна’’ тэвравы ӈаворидо’ мирдапиць, ӈудидо’ мэта’’ хибяри’’ няхататто’ тоходанаць, товы’’ хибяри’’ е’’эмня мастер-класс манэ’’лабтабиць. Тикахад’ тараванзь’, сё’’ мэ’’манзь’ товы’’ хибяри’’ харто’ хамандавы программыдо’ манэ’’лабтабиць.
Тарця сер’’ поӈгана хуркари тоходанва’’ таняць, круглый стол’ мэ’’ӈаць, ханяна н ӈока тарана серу ваде’’ӈаць. «Северное стойбище» ӈани танясь, таняна ӈэрм’ ненэця’’ харто’ мядоду мярвыць, таняна мядонди ядтабиць. Нянэй мяд’ӈод Ямалкад’ товы’’ нина’’ тэвравыць.
«Сокровище Севера» выставка-ярмаркахана маня’’ округна хибяри’’ ӈод’ манзараць. Маня’’ яна харта экспозицияда хамадавысь, таняна манзаравы’’ нина’’ округана нямна лаханаць, тэвравы’’ манзаидо’ манэ’’лабтаць.Тюку по’ Москва маркад’ маня’’ нина’’ ӈока диплом’’, мядонзэйм’ тэвраць, ӈока ихиня сомбой вади’’ намдаць. Лилия Тайбарей Краснойхад’ «Изделие из кожи и меха» номинацияхана нертейӈэ’ хаясь, тикахад’ Александр Ледков манзая’’ «Лучшее произведение национального искусства» конкурсхана нябимдей местам’ ханаць. Галина Артеева тарця конкурс’ «Возрождение утраченных традиций» номинацияхана нябимдейӈэ’ нюмдедонзь, Тарця конкурс’ «Национальная игрушка» номинацияхана лауреатӈэ’ н ани маня’’ нява’ хаясь – Наталья Латышева Несьхад’. Пыда тамна «За развитие и продвижение сувенирной продукции» диплом участника ня’’амась.
«Шитье и бисероплетение, текстиль» номинацияхана «Лучшее произведение национального искусства» конкурсхана лауреатӈэ’ Ольга Явтысая хаясь, пыда Саля’тер не, «Вы’ ту» семейно-родовой община нерм’ пэртя.
«Кочевье Севера» фестивалькана Екатерина Тайбарей харта падвы сёда’’ мэ’’ӈась, таняхад’ пыда сидя диплом’ тэврась, выставка-ярмаркам’ хамандавы ООО «Абориген Экспо Тур» специальный приз’ ня’’амась.
Тикахад’ маня’’ округна экспозициям’ ӈани саву’’ӈадонзь’, таняна округва’ манэ’’лабтадонзь ханзер’’ ненэця’’ саю’’ похо’’на’’ илеса’’. Конкурсхад’ нябимдей местам’ тэвраць.
Ваеравы ярмарка-выставкахана хуркари яхад тэвравы манзая нокаць, нока мел хибярр ятдахат товыць. Тикахад’ хусувэй таняна манзаравы хибяри сава вади’’ намдась, мядонзэйм’ ня’’мась. Нерняна товнда похона тарця ма’’лёва нани таненгу. Харвабнанда нани сокольки… центрхана яндахат товы ненэцие ма’’лангу. ..
Теда хибяри таняюв маля хамякось пянгудо’.