Санкт Петербург маркана ӈока яна’ тер’’ хибяри’’ тоходанаць, ханяӈыдо’ теда таняна иле’’, манзара’’. «Нятва» нюбета землячество округхадана тарпвы’’ хибяри’’ ӈоб’ня ма’’ ламби, тикахад’ округна Представительство манзара. Округна ӈацекы’’ теда ӈод тарця паской маркана танеда университетхана, институтхана тоходана’’.
Ты’’ сие ниць ирийна сидя ю’’ маттамдэй яляхана маркана илена’’ хибярина Институт народов Севера мякана ма’’люрӈаць. Хусувэй таня товы хибяри харта сейхад минда вадида Мария Яковлевна Бармичан’ хэтыдась. Тюку по’ Санкт Петербург маркы Герцен нювм’ нюбета университет профессор Мария Бармич сиднтет ю’’ помда ядабтась. Маня’’ яханана соявы, вадюданвы, тоходанвы, манзаравы нява маля самляӈг юкад вата по’’ ямбан ӈарка маркана иле. Ӈока по’’ ямбан пыда институт народов Севера мякана манзара. Ӈэрм яхад’ товы’’ ӈацекы’’ няюв теда ӈод манзара. Ӈока хибярим ненэцие’’, нганасан’’, энец’’ вадан’ тохолась. Мария Яковлевна Бармич тохоламбавы хибяри ӈэрм яхана ханярина таня, ӈокаювдо илевандо ямбан ӈацекы’’ тохоламби’’, хибяхова наука манзаям’ пэрӈа’’, хибярихова радио’, телевидение’, газета’ манзаям’ пэртяӈэ’ тара’’. Ханярина манзарана’’ хибяри’’ харто’ тохолкодамдо’ сава ихиня тенедо’, сахарамбидо’. Ӈарка тохолкодандо’ со’’яма яляхана ханяныдо’ Санкт Петербург март турӈаць. Мария Яковлевна со’’яма ялям’ ты’’ сие ниць ирий’ сидя ю’’ маттамдэй толыркана ваерась. Тикы яляхана ӈока сейхад ӈэда вади’’ тохолкодава намдась. Мария Яковлевна таӈок по’’ ямбан’ сертавы манзаяда ӈока. Пыда студент’’ нюв манзараванда’ хавна тамна наука манзаям’ пэрӈа, школахана тоходанна’’ ӈацекы’’ е’’эмня тарана учебник’’ падби, хуркари тарана пособие’’ сертамби. Ненэцие вадана нямна ӈокавна манзарана. Пыда мэбета вадада хуркари ма’’лёвахана сосьты. Мария Яковлевна илеванда ямбан ненэцие вадава нерня пэрӈа, вадамда мэнена нява мал тикым тохоламбада хибярихи’ тэврамбида.
Тюку мэвахана Мария Яковлевна со’’яма яляхана хуркари’’ яхад’ товы’’ ненэця’’ ӈокаць. Ямалкад’ округандо депутат’’ манзаям нерня пэртя Сергей Николаевич Харючи товысь, пыда ӈока сеян’ мэёвна еримберта вадам’ хэтась. Я’мал ӈэвахана мэнахад ӈарка вадам’, мядонзэйм’ тэврась. Таймыркад’ товы’’ хибяри’’ таняць, вадам’ мэ’’мы Дарья Болина. Мария Яковлевна тохоламбавы хибяри Таймыркана ӈока, хусувэдо’ сейхад миндя’’ вадидо’, мядонзэйдо’ ӈэдаравыць. Маня’’ округна делегация’ ӈоб нюдя нись’ ӈа. Округна депутатхат’ вадам’ Александр Белугин хэтась, «Ясавэй» ассоциацияхад вице-президентӈэ тарана нява Юлия Ледкова лаханась, округна администрация ӈэрм’’ тенз’’ ненэцие’’ управление манзаям’ пэртяхат’ Марина Тайбарей сава вади’’ мэ’’ӈась.
Мария Яковлевна Бармич со’’яма яляхананда яндат’ товы’’ ӈокаць. Не нюда, перенида’’, манзарась нята’’ нида’’, студентада’’ хэвхананда мэць. Тад’ нерня ӈод, тамна ӈока по’’ ямбан маня’’ тохолкодава сававна илея, нёя хаӈгур, ябдая, манзарая. Тохоламбада ӈацекы’’ нянда хусувэй по’ турӈая!
