Тюку по’ неняӈг ирийна самлязимдейяӈганя толыркана маня’’ округна со’’яма ялям’ мэтава. Тарця яляха’ хамякова’’ миӈа’’. Маня’’ яна сиднтет ю’’ самлязимдей пом’ сава ихиня ядабтамбива’’.
Округва сэвхана маниесь’ хусувэй по’ ӈарумдана, едэй харад’’ ханярина ӈадимберӈа’’. Хибярина харто’ со’’явы ямдо’ сахарамбась манзаидо’ минре’’, нюкцидо’ вадамби’’. Иламдо’ нерня минредо’. Тэкоцина тамна хусувэй выӈгана сиднтет ю’’ самляӈг по’’ тяхы’ тотрев’ тамна хусувэй выӈгана хадырӈа’’, ты’’пэртина варёмдо’ мэць тыдо’ пэрӈа’’, хойхана мюсерць иле’’. Округна со’’яма ялям’ ядабтабвахана газетахана паднана нина’’ падвыдо’ тэврамби. Роза Ивановна Канюкова сямянд’ нядаӈгодава. Тюку’ мэвахана тарця падвым’ ӈэдарась.
«Няръяна вындеркана» ӈэда тюку’похы апрель’ 24 толыркана маня” нямнана” падвы юнхана Игорь’ Кошин’ няркнана вади толаманзь. Ненэсянда ӈод’ хусувэй тэнз хибярир (народ) – харта вадавнанда лаханорта, харта толыр”мананда иле. Луцит-луца вада, ӈысмит-ӈысма вада, ненэцит-ненэця вада. Ӈоб” харта тэнзанда пелям’ ётар хари” иле тэнзамда ёць мян”ӈа. Ӈока манзьтым’ вадава” перебта тара.
Маня” ненэцяӈэсь няхар” яӈга яхана илева”. Сидябёй яӈга округӈэ хаебэйӈэсь нямнана” таблицахана тасламбира”.
ЯНАО’ ненэцие” титульнойӈэ пон” перець, тамна понъе переӈгу”, ненэй вадавна, пяк вадавна лаханортида саць ӈока. Маня” яханана” серта вуни тарця ӈа’. Луцина” малмбоё” харто’ вадамдо’ мэ”ӈа”. Ӈысмина” харто’ поӈгнандо’ харто’ вадавнандо’ лахана” (тикыд ӈацьмбойдо’ харто’ вадавнандо’ лахана тохоламбидо’, хар”н намдамась). «2010 похы национальной состав переписи народа» манэ”ӈара”.
Ненэй вадавна лаханортар маня” яханана” саць мер” тянёмдана пяда. Сян яӈганя по’ тяхана серта тарця вунись ӈа’. Маня, закон ехэранаӈэсь, школа-ха”на, детсадха”на манзаранаӈэсь ха”-лина” тикы вэва серъям’ пирда”ле я”маваць. Тамальӈгы ненэця” депутатна”, «Ясавэй’» манзаранина” ханяна мэса”? КМНСна” управление’ манзарана”, юристдо’ тяхы губернаторна” консультант ӈаводо’ тяхы похо”на пэрца? Ханзеркарт” няна”, ненэй вадам’ школаха”на, детсадха”на минренаӈэсь хибяхарт нись нядаӈгу’. Маня” округва” Таймыр тотрев, Коми Пермякской яхана илена’’ ӈысма’’ тотрев таси’ танаць мянта”.
Саам” гимнхана тарця” сава” вада” таня”: «Язык свой только золотой храни, и предков древних слог запомни». Малмбоё”, хусувэй округханана” иленя”, тикы вади тенейда”.
Роза Канюкова падвы
