Валентина Нёликовна Няруй Ямалкана илена не. Пыда ӈока по’’ ямбан тохолкова ( образование) серкана манзара. Тохолкода. Илеванда ямбан тохолкова серм’ харвабтадась, теда ӈод ӈарка хибяриӈэ’ хэсь ивнанда ӈэда манзаямда нида хаембю. Манзаямда нерняри пэрӈада.
Маня’’ округханана манзарана’’ тохолкода’’, хуний харто школаханато’ нянэй вадам’ пэрӈа’’, Валентина Нёликовнам’ теневадо’. Тикахад’ институт образования мякана манзарана нина’’ тикы нямдо’ ӈани’ савовна теневадо’. Нянэювна манзь: пыдо’ ӈопой манзаям’ пэрӈа, манзаядо’ ӈобняд миӈа. Нидо’ нядабась манзара’’. Ӈобт’ ма’’лась ибедорцеты’’: нянэй вадам’ савовна тохоламбава’’ е’’эмня хурка учебник’’, хурка пособие’’ сертась тара. Тарця манзая’’ ӈэбнандо’, хуний хуркари яхана илена’’ нянэй ненэцяӈгана хамандавы’’ ӈэбнанда. Ӈацекы’’ ӈод харвась хари’’ вадамдо’ тохолабнандо’, лаханаван’ харвабнандо’.
Тюку ирийна си’’ив яӈганя толыркана Валентина Нёликовна Няруй мат’’ ю’’ пода пангу. Тет юд’ мян по’’ ямбан тарана манзаямда тю’’ури пэрӈада. Таӈок по’’ ямбан сертавэда тянё вани’’ӈа’’. Илан’ нянэвна сырта не. Минрена манзаянанда ӈод’ пиликов несэй ӈамгэм’ пюрцеты. Округандо’ нюдяко ӈэсымна ӈока ӈэдалёрцеты. Ӈацекехэна манзарана’’ нида’’ нядабасьтыда, хусувэй тарана серт’ табадабсетыда. Ханяӈы тохолкодита няюв’ ӈобнзер книги’’ падбасеты. Яр Саля ӈэсыхына манзаямда теневана тохолкода Валентина Михайловна Сэрпиво манзара, тикы тохолкода няюв’ В.Н. Няруй «Ненцы: уроки предков.» научно-методической пособием’ падӈаханзь’. Тохолкода’’, нися’’, небя’’ е’’эмня падвы манзаяди’ сидя ёнар’’ няхарамдэй похона тарпыць.Тарця сейхана сомбой книгам’ тохолкода’’, ӈацекехэна манзарана’’ манзая’ нядаӈгобцаӈэ’ мэ’’ӈадо’. Тикы’ хавна Валентина Нёликовна тохолкодита манзаи’’ нямна видеофильм’ сертабасьты. Маля сян’ тарця манзаяда таня. Хойхана соявы не тены’’ илевахананда ӈод’ хоян’ тэворцеты. Та’ мальӈгана ныланава’’ ялуда мэ’’мась ханяӈэна нянэй мят’ тэворцеты. Хоян’ тось, Валентина Нёликовна, манзаяда ихинянда ӈэсьты. Нянэй мякана илена’’ нида’’ лаханакурць няцьтыда, тадтавы’’ манзаи’’ сертабасьты, паднасеты.
Тюку ялян’ хэтась: Валентина Нёликовна Няруй ӈарка хибяри. Тохолкода, тохолкоди’’ тохолкода, учёной, кандидат педагогических наук. Сяӈгова мякад’ ныхыри’ ханавы не ӈацекы тамбир’ мэбета хибяриӈэ’ хая. Илеванда ямбан нисянда Нёлёко Хавывич Яптик, небянда Сэрне Григорьевна Сусой табековна нерняри миӈа. Нисяюда, небяюда таӈы ямбан халям’ пэрмэхэнзь; сыра ӈани тэкоцидо’ пэрць вымна мюсермэхэнзь. Валентина нюртей не нюкцяди’. Сямянд ӈарка не нюкцямди’ илеванди’ ямбан сава серкана, сава вадахана нядамбиди.
