Маня’’ округханана маля ӈахакуд’ ӈацекына’’ е’’эмня «Пунушкам’» нюбета журналкоцям’ этно-культурный центрхана манзарана’’ нина’’ сертамби’’. Таняна хуркари’’ мэкад’ ӈавори’’ падби’’. Ӈарка хибярина падвы’’ манзая’’ танесеты’’, ӈацекы’’ ӈод падвы’’ манзаи’’ таняна хобсетыва’’. 

Ненэця’’ вадавна падвы’’ манзаи’’ журналкана хобсетыва’’. Пудана ӈадимы журналкана Роза Ивановна Канюкова манзая’’ таня’’. Тикы нява’ вадамда саць мэнена не, ида’ хари’’ вадана нерня илева’’ нямна пилибт’ няркнасеты. Пыда харта ненэця’ вадавна падна, тикахад’ ханяӈы’’ мэкад’ манзаи’’ луца’’ вадахад’ ненэця’ вадан’ падбасетыда. Тюку яля’ ӈопой тарця манзаямда толара’’. «Лабтэйко» вадако’. 
Яв’ вархана лабтэйко ӈа. Яв’ маравна тямдэ’’ сантырӈа. Лабтэйкон’ мацеда. Лабтэйкон’ тойтырӈа.
- Хибя лабтэйко’ мюня иле? 
- Мань халякодм’, пыдар хибян? 
- Мань тямдэ’’кодм’. Ӈобкана илехэней! 
- Ӈэёв! Ӈобкана илехэней. 
Хов, ӈобтикы маравна писяко варна. Лабтэйкон’ тойты, юнра: - Хибя лабтэйко’ мюня иле? 
- Мань тямдэ’’кодм’, пыдар хибян? 
- Писякодм’. Ӈобкана илехэней! 
- Ӈэёв, ӈобкана илехэвов’’. 
Ти няхар’’ӈэ илелъяд’’: халяко, тямдэ’’ко, писяко. 
Хов, ханяд ӈэбта ӈо’’ лабтэйко’ хэван’ пияко тоса то. Лабтэйкон’ тоса тоебты. – Хибя лабтэйко’ мюня иле? 
- Мань писякодм’. Пыдар хибян? 
- Мань пиякодм’. Ӈобкана илехэвов’’! 
- Ӈэёв, илехэвов’’.
Ти, халяко, тямдэ’’, писяко, пияко ӈобкана иле пядо’. Хов, яв’ марахана нохоко ӈадимя. Лабтэйкон’ тэвы’, тойтырӈа. – Тюку лабтэйко’ мюня хибя иле? 
- Мань пиякодм’. Пыдар хибян? 
- Мань нохокодм’. Ӈобкана илехэвов’’! 
- Ӈэёв, илехэвов’’.
Ти, лабтэйко’ мюня халяко, тямдэ’’ко, писяко, пияко, нохоко самляӈгӈэсь ӈобкана иле’’. 
Хов, яв’ варувна тёнеко нихыры. Лабтэйкон’ тэвы’’. Лабтэйком’ тоебта. – Хибя лабтэйко’ мюня иле? 
- Мань нохокодм’. Пыдар хибян? 
- Мань тёнякодм’. Ӈобкана илехэвов’’! 
Ти, халякоЮ тямдэко, писяко, пияко, нохоко, тёняко ӈобкана иле пядо’. Хов’, яв’ варувна сармикэця халмана. Лабтэйкон’ тэвы’’. Сава’’ ӈабто лабтэйкоход миӈа’’. Лабтэйкон’ тоерӈа. – Хибя лабтэйко’ мюня иле? 
- Мань’ тёнякодм. Пыдар ӈань’’ хибян? – Мань сармикэцядм’, тэва ямбком’. Ӈобкана илехэвов’’! 
- Ӈэёв, ӈобкана илехэвов’’.
Сармикар няндаси няӈгрё лабтэйко’ мю’ тюӈгута пяда. Тарцям’ манэкава халяко тямдэко’ ня’ ит’ мулкадаӈаха’. Писяко я’ ваӈган’ сакада. Пияко вано’ ӈыл’ вэхэда. Нохоко пэ ваӈган’ лыӈгарэй’’. Тёняко ӈобтарем’ ваӈготан’ мирна сакада. Сармикар ӈань’’ тюку тендад’’ ӈавраӈэ пэрмыда нёраку’’ӈа.
Ти, та малда