Едэй словарьм' мядонзэйӈэ ня’’мава’’. Луца’ вадахана тарця вада’ хара таня: «Сямянахат сава мядонзэй – тикы книга’’. Тенад’ мань нянан тарця, книгахад хусувэй таранам’ хова пир, тарабата ӈани’ толаӈгур. Манзъяхана мэта книга’’, мирто’ яӈгу, книгаси’’ манзараб’’ сиби ни ӈа.                       

Юнета профессорма’’ Мария Яковлевнава’’ ӈацекы’’ е’’эмня сертавы книгида ӈока’’, тикы’ книга’’амна школаханан ӈацекын’ тохоламбидм’. Теда’ юнета  тохолкода’’ тохолкодава’’ саць тарана словарьм’ серта. Тарана вади урок’ е’’эмня таняд’ мэва пир. Ӈацекы’’ын ня’ тасламбаӈгува хурка вабц’ ватовна вада падбэй (Канин, Ӈарка я, Нюдя я). Невхы’’ похо’’на’’ вадам' теневана ӈацекы’’, Холговхад тоходанванзь турта’’, саць сававна небянато’ вабц’ вадам’ мэцьты’’. Диктантм’ падбабнана’’ манзьты’’: « Матрена Ивановна, саць мер’ нён лахан, маня’’ ханяӈы вади нисьтына’’ хамада’’». Мань сито’ хамадамбидм’, пыдо’ няхар’’ ненэця’ мунм’ ( сидя тасерм’, ӈ ) лаханабто’ нидо’ хэтмбю’’. Нензя’ тарця, Холговхана, Нюдя яхана, Канин яхана иленя’’ хибяри’’ ненэця’ вадам’ теневана’’ харто’ небянато’ вабц’ вадам’ мэць лахана’’. Илевахана хусувэй хибяри  ибкава’’ небянда вадам’ теневабта тара. Няха’’на  тэвба’’на’’, хар’’на’’ вадаривнана’’  маймба  лаханаван харвасетыва’’. Хар’’на’’ вадакова’’ выӈгы лохорта яхакоцяраха.

Теда’ нюртей  урокха’’нан  тоходанна’’ ӈацекэхэ’’ ненэцие’’ вабц’ вади, диалектха’ е’’эмня (вындер  ненэця’’, пэдара ненэця’’)  урокм’ сертасетыдм’.  Пыдо’ теневабто’, словарьмана тарана вади тасламббато’. Ненэцие’’ вадава’’ лаханавахана саць илека, паской, хуркари ӈэсьты. Ӈацекы’’ лаханабто’– тикы нянан майбцо!

Маня’’  хар’’на’’  вадава’’ сахарамбдаӈэ саць тарця  книгам’ ӈарка мядонзэйӈэ толабива’’. Ненэця' вадам' минрена тохолкодаха’’на тарця книга сава нядаӈгода ӈэӈгу.

Мария Яковлевнахана’’ саць ӈарка вадам’ хэтмбидм’! Ӈоб’’ нерня’ книга падбю’’, ябда, сензувна сибяцювна  илевар миӈая.