Яханана тарця хибярина ӈока , хуний сяӈгова’ тэровы манзаяхато’ тохось илевандо’ ямбан харто’ манзаидо’ минре’’. Тарця хибярина хуркари’’ манзаи’’ пэртя’’ поӈгана таня’’. Тарця хибярина лекарь’’ поӈгана тянё ни’’ӈа’’. Ӈокаювдо’ маня’’ теневына’’, танейна’’. Хаӈгурпана’’, някундо’ ядсетыва’’. Теневава’’, пыдо’ сидна’’ нядаӈгу’’. Пыдо’ нядандо’ сенз’ ӈэвава пере.

Хусувэй по’ саво ирийхана лекарь’’ хэбидя ялям’ мэцьтыва’’. Тюку по’ ӈод тарця ялява мадаваць. Хибяри’’ савумдабада нина’’ минрена манзаито’ ӈарка ялям’ тюку по’ саво ирийна самляӈг’ яӈганя толыркана мэ’’ӈадось. Тикы яляхана лекарёна’’ сейхад’ ӈэда’’ вади’’ намдурӈаць, хибяхова мядонзэй ня’’амвакы.

Хуркари’’ манзаям’ пэрма сибиць ни’’ӈа’’, хуркари’’ манзаям’ ив ер пэрць тара. Хибяри’’ савумдабда’’ нина’’ манзаядо’ ӈани’ тоенана сер’. Пыдо’ нядандо’ хибяри ил’ пере. Ёльцянда хабцям’ сэвтесь, хибярим’ савумдась. Округна еркы маркана, хусувэй ӈэсыхына манзаидо’ теневана нина’’ манзара’’, поӈгнандо’ тарця хибяри’’ таня, хуний ӈока по’’ ямбан тамбир’ тоенана манзаяхана манзара’’. Хусувэдо’ минрена манзаямдо’ сямянд’ сава, тарана манзаяӈэ’ тасламбида. Округна лекарь’’ поӈгана маня’’ нина’’ тянё ни’’ӈа’’, хусувэдо’ сава ихиня манзаидо’ пэрӈа’’, хибяри’’ савумдаби’’. Тюку яля’ тарця нина’’ нюмдегун: Няръяна маркана маля ӈока по’’ ямбан ӈацекы лекарьӈэ’ С.Ф. Талеев, Т.Н. Бобрикова манзараӈаха’, О.Н. Телекова минрена манзаяда тарана, хава, сё, пыя хабцям’ савумдабада нява; инфекцияхана сидя юкад’ вата по’’ямбан лекарьӈэ’ М.А. Филиппова сававна манзара, тивак хабцям’ пэртя поӈгана А.А. Канюкова маля понку манзара. Нельминхана манзаидо’ теневана не’’ мал японку манзара’’, тикы лекарь’ мято серм’ пэртя Э.С. Торопова, фельдшерӈэ’ таранадо’
А.Н. Талеева. Пёшахана маля пон’ Л.Н. Вылка манзара, пыда ӈацекы’’ савумдаби. Округханана тарця лекарьна иле’’, хуний теда маля ни’’ манзара’’. Ӈокаювдо’ сян юд’’ мян по’’ ямбан ныхыдо’ нись’ сяй’’ манзараць, ӈока хибярим’ хабцяӈгад’ нэкалӈаць. Тарця хибярихина сямянд’ сава вада’’, ӈарка вада’’. Индигахана ӈарка лекарьӈэ’ маля пон’ Н.П. Назаренко тарась; округна ӈэсыхына пон’ манзаравы Т.В. Осетрова, Няръяна маркана сэв’ лекарьӈэ’ А.И. Ледкова манзарась. Тарця хибярина маня’’ тенейна’’.

Лекарь’’ саць тарана манзаям’ пэрӈа’’. Пыдо’ манзаядо’ незел ни’’ӈа’’, тарем’ ӈод хибярина тарця манзаяхана манзара. Хусувэйдо’ ив’ ер манзаяндо сырта’’. Тюку яля’ хэбидя яля’ ед округна лекарька’’ сямянд’ сава вадина хэтбива’’: манзаямда харвась’ пэрӈара’’, хаӈгурта хибяри’’ нёя’’ ӈокамдан’, харта сензда ӈада’’, мята’ тер’’ нёя хаӈгур’’, сидда’’ нядабая. Илевамда ябда минрера’’. Сава ихиня хусувэй някунда товы хибярим’ ядтабида’’.