Товнда ныланава’’ яляхана сельской хозяйствохона манзарана’’ хибяри’’ минрена манзаито’ ӈарка ялям’ мэта’’.

Тарця яля’ това’’ нерцюна Россияна’’ премьер-министр’ Михаил Мишустин агромпромышленной комплексхана манзаранаха’ государственной награды мипись.

Маня’’ яна’ тер’’, тыбэртя Назар Талеев таняна мэсь, пыда «Заслуженный работник сельского хозяйства РФ» знакм’ ня’’амась.

Назар Александрович – тыбэртя, илеванда ямбан’ хойхана мюсерта, мале’’ тет’’ юкад вата по’’ ямбан’ мэёвна манзарана’’. СПК «Евр» «Няръяна вындер» нюбета КФХ’ нерм’ пэртяӈэ тара.

Талеев’ тэнз’ мэта’’ тыбэртя’’ Варандейской хойхана саць ӈахы’ похот мюсерӈаць, таняхад Назар Александрович паӈг’ пере’’. Пыдо’ мэёвна илена’’ хибяри’’, ямдо’ теневана’’, тыдо’ сававна маниена’’.

– Маня’’ нисянана’’, небянана’’ Варандей’ няна мюсерӈаць. Нисяв’ Вылка Пётр Николаевич, небями’ Мария Максимовна, Ледков’ Гавриил Иванович, Парасковья Алексеевна, Вылка’ Василий Арсентьевич, Нина Васильевна, Талеев’ Александр Алексеевич, Августа Ивановна – Назар’ небя, нися. Мал’’ пыдо’ «Харп» колхоз’ 12 бригадахана манзараць, – тарця вади’’ Виктория Вылка хэтась. – Мякана илеваць, явнана’’ мюсерӈаваць, вадываць, ӈобкана тоходанаваць. Маня’’, хойхана вадювэӈэ’ , теда нина’’ сахарамбась ӈопой ӈэсына илева’’, манзарава’’. Назар Талеев ӈарка наградам’ ня’’ама, маня’’ тарця серт’ маймбива’’. Нянда сава вади хэтбидм’!

Назар Александрович Талеев’ манзаямда теневана ненэць, инда’ вато’ хибяри, илм’ мэнена, ӈобкарт’ хибяри вадам’ нида минзипой мадаӈгу. Пыда илевамда сибицяӈэ хэтаӈгу’ нир’’.

Пухуцяда’ мер’’ яӈгумы, нюдякоӈэ хаювы не нюкцямда харта вададась. Тюку ялян’ хэтась не нюда Екатерина Назаровна Ледкова – харта мята’ тер’’ пэртя, вэсакода Дмитрий ӈани’’ тэхэ’’на’’ мэна. Пыдо’ нисяндо’ ня ӈопой серм’ минрена’’.

Назар Александрович тенева’’, по’’ ваерась ты’’ явнанда мюсерта’’. Нюда’’ тыбэрӈа’’, нюта’’ ню’’ хойхана вадюданась таня манзараванзь тута’’. Тарем’ ӈэбнанда ты’ ил’ пилибт’ таневнда.

Ӈоб’’ нерня’, Назар Александрович!