Маля сян’ по’’ ямбан хор’’ ирийва хэбидя яля’ нэмбида. Россиянана ӈармбэй хибяри’’ яляӈэ’ таславы. Тикы яляхана ӈарка няха’’на’’ сейхад’ ӈэда’’ вади’’ мэцьтыва’’, пыдо’ е’’эмняндо’ мядонзэйм’ хамадабсетыва’’.

Маня’’ округханана, маркана ӈэя, хуркари’’ ӈэсыхына ӈармбэй нина’’ яляхана ханярина ихиня сомбой сер’ танесеты. Ӈарка нина’’ ӈобкана ма’’ласьтыдо’, няндо’ сейхад’ миндя вади’’ хэтбасьты’’, е’’эмняндо’ сё’’ мэта’’ хыноцеты’’. Округханана ӈармбэй хибярина ервуна’’ ӈод нисьтыдо’ юрбю’’. Пенсияхана мэна’’ хибярина хусувэй по’ няхармэвна еся’ няд’’мам’ ня’’амарпи’’. Тарем’ ӈэбнанда нив’ тара’’. Хусувэй ӈармбэй хибяри хари’’ манзараваханда округва тю’’увку’ пэрӈась, ӈока ныхымда минрена манзаяханда масьтебидась.

Тюку по’ хор’’ ирийна нюртей яляхана мань’ Саля’хардахана’ мэдамзь. Тикы маркана’ ӈод тарця хэбидя яляхана ӈарка ненэциедо’ нивыдось’ юр. «Наследием» нюбета хардахана ӈэрм’ тенз’ ненэця’’ ма’’лыць. «Ямал потомкам» ассоциация’ манзаям’ пэртя’’ ӈармбэй нидо’ ма’’лаць, нито’ е’’эмня ихиня сомбой ныланавам’ хамадавыць.

Розалия Ивановна Ильина ӈарка не. Илеванда ямбан манзаравада тянё ни’’ӈа’’. Пода маля ӈока’’ма’’. Тарем’ ӈэбнанда ӈод’ манзаясю’ нисьты, пэртя серта пилибт танесеты. Теда «Ямал потомкам» ассоциацияндо’ Совет старейшин серм’ пэртяӈэ’ тара. Манзаянанда ӈацекы’’ нида’’ хусувэй серкана нядамбида.

Ильина: Сертамбада манзаянана пунянана минда ӈацекына нядамбю нинам’’. Хусувэй яля’ нибнанда ӈа’’ӈод, ӈобт’ тэвормава’’ ӈока ӈэ’’нив. Пудана’’ тет’’ по’’ ямбан етри’ ӈобт’ тэворӈава’’. Ӈавнанда пухуцяӈэ’ хэвы’’ ненэця’’ мякнандо’ нисьты’’ ӈамдю’’, малбуй’ пэртя манзаидо’ танесеты. Тюку яля’ малбуй тюкон’ ту’’ ним’’, лахарёдо’ хомби’’ма’’. Тикад’ тюкоход’ хэ’’мяхадандо’ масьты’’: илми’ ӈопой пова ӈацекэркаӈэ’ хая. Ӈамгэ е’’эмня тарця тара? Хусувэй ненэця сяӈгова пухуцяӈэ’, вэсакоӈэ’ ханта. Тикахана ӈобт’ ма’’лабнанда, манд’ нив: ӈа’’ ӈэвынё, хибякоцяхова си’’ми’ манэ’’ӈанё. Тюку яля’ товнда’’ ветеран’’ ӈока ӈэбнандо’ тара’’ нисяв’, ханяӈыдо’ тось маля нидось пирас’’. Ханяӈыдо’ маля яӈгумы’’,ханяӈыдо’ маси’ ӈани’ ян хэвакы’’. Маркана мэна’’ малбуй’’ тосьты’’. Пыдо’ илӈы’ ненэця’’ поӈгана мэбнандо’ идо’ савуворӈа.

Мань’ ӈамгэ’ е’’эмня тарця манзаям’ пэрӈав? Мань масьтыдм’: нибнани’ серта тарця манзаям’ хибя сертаӈгуда? Тарця луца’’ вадавна манзь – лозунгами’ мэць, нерня миӈадм’. Ӈоб’ нерня миӈава’’. Няна’’ сырць ӈацекы’’ ненэця’’ тарця ӈэӈгу’’, саванё. Ӈармбэй ненэцие’’ яляхана хусувэй районхана ненэциедо’ ма’’ламбидо’. Ханяӈы’’ клубхана ма’’ласьтыд’, ханяӈы ветеран’ мяканда хэсьты’’. Хаювы похона тарця ялява савовна ваерась. Маня’’, маркана иленаӈэ’, нянэй мят’ тэворӈаваць. Тым’ хадамбиваць, сяйм’ ӈаворӈаваць, хоюмна ядэрӈаваць. Нянэй тарем’ ма’’лёвава ӈули’ сава ӈэ’’нив. Ти’, тарем илева’’, ныхына’ пирувна манзарава’’.