Едэй по’ тось несэй сер’ яханана маля ваераць. Маня’’ яна’ тер’’ хари’’ ява’ манэ’’лабтавась ӈарка март’ тэворӈаць. Тюку’ мэвахана округна хибяри’’ Санкт-Петербург’ март’ ядэрӈаць.

Ваеравы по’ ӈарка пэвдэй ирийхад’ Санкт-Петербург’ маркана Рождественской ярмарка миӈась. Тарця ярмаркан’ таняна илена’’ хибяри’’, мядоманзь’ турта’’ хибяри’’ маля торумбэй’. Тюку по’ тарця ярмарка сиднтетимдеймэвна яндат товы’’ ненэцие’’ ма’’лась. Маня’’ округва нюртеймэвна тарця ма’’лёван’ тэворӈась. Делегациява нюдя’ нивысь’ ӈа’’. Маня’’ нина’’ Петербург’ марад’ Пушкинской площадьхана нянэй мядм’ мярвыць, нянэй мядм’ манэ’’ман’ харвана’’ ӈокаць. Хусувэй мят’ товы’’ хибяри хонарковада тянё нись’ӈа’’. Ӈарка маркана илена’’ хибяри’’ ӈэрм’ тенз’ ненэцие’’ ила’ нямна ӈока ӈамгэм’ теневаван’ харва’’. Нянандо’ мякана мэва ихиняндо’ савархась. Тикы’ хавна мят’ товы’’ хибяри’’ ты’’ ӈамзахад’ пиревы евэйм’ хорпиць, ты’’ ӈамзам’ ӈаворӈаць. Ханяӈы тарця ӈаворм’ илевандо’ ямбан нюртеймэвна ӈавормакы’’.

Маня’’ округна мел’’ хибяри’’ ӈод харто’ ӈудаханато’ сертавы’’ манзаидо’ таняна манэ’’лабтамбиць, ӈарка март’ тэвравы’’ ӈаворидо’ мирдапиць. Хуркари’’ сувенир’’, пиви’’, сави’’ харванар’ тэмдась пир’’ӈась. Няръяна маркад’ тюку’ мэвахана мел’’ няхаюна Лада Сумарокова, Александр Ледков ядэрӈахась. Маркы мел’’ нина’’ хавна Красной’ ӈэсыхы сэдорана’’ таняна манзараць. Наталья Пырерко харта манзаида пирдапись, тикахад’ ӈэсынандо’ манзарана’’ нита’’ манзаи’’ манэ’’лабтабись. Александра Егоровна Выучейская, Виктория Петровна Вылка манзая’’ таняць. Маня’’ яхадана тэвравы’’ ӈавори’’ савовна тэмдабидонзь. Ӈока хибяри’’ Няръяна маркы ӈамза’ комбинатхад” ханавы’’ ӈавори’’ манэ’’сарӈаць. Нянэювна тарця ӈавор’’ маня’’ округхадана сяӈгова’’ хэвы’’ нина’’ тэмдабиць. Пыдо’ тарцям’ маниесь харто’ яхандо’ турмы’’ то’’олхаць, маймбиць. Округна ила’ нямна товы’’ нидо’ хонрабиць.

Тикы’хавна сё’’ мэта’’, тарана’’ ненэциена харто’ программадо’ таняна танясь. Округна этнокультурный центрхад’ ненэцие театр «Илебц» Санкт-Петербурган’ тэворӈась. Ӈока по’’ ямбан театрхана сянакода’’ нина’’ харто’ манзаидо’ манэ’’лабтаць. Ярмаркан’ яндат’ товы’’ хибяри’’ нянэй ненэцие’’ вадам’ намдурӈаць, хусувэй манзая’’ няндо’ мэкадархась. Округна еркы маркад’ тамна «Маймбава», «Юность Севера», «Сударушка» мэбебцомдо’ мэ’’ӈаць. Ханярина маня’’ округхадана товы’’ хибяри’’ Санкт-Петербургхана сава ихиня ядабтабиць.

Ӈокханда Рождественской ярмаркан’ тюку по’ сидя миллион’’ хибяри’’ турмыць. Мядонда’’ Россияна ю’’ яхад’, ӈани’ яхад’ тобэй хибяри’’ тарця серт’ маймбиць.

Тюку по’ округна сиднтет ю’’ самляӈг пом’ ядабтагува’’, ӈарка ялуна округна ӈэвахана’ мэнана вадавна Петербургхана тамна танеӈгу’’. Таня хибяхова ханта.

Сидяӈг’ сертавы