Маня’’ яханана паднана’’ нина’’ тянё ни’’ӈа’’, ӈокаювдо’ ӈэрм’ тенз’ мэта’’ хибяри’’ ӈэбнандо’ ӈод луца’’ вадавна падна’’. Нянэювна харто’ вадавнандо’ паднавы’’ нина’’ П.А. Явтысый, В.Н. Ледков; теда паднана серм’ минрена’’ поӈгана ненэця’ вадавна паднанина’’ М.И. Талеева, Г.Г. Тайбарей, С.П. Дуркина, Е.П.Тайбарей.  

Тены’’ похо’’на ханяӈы луца’’ вадавна паднана’’ нина’’ манзаи’’ ненэця’ вадан’ сертабасьтыдо’, тарця серм’ е’’эмня конкурс’ танесеты’’. Пуданамэвна ваеравы конкурсхана Алексей Пичков манзаи’’ ненэця вадан’ сертабада’’ манзараць. Алексей Ильич мэбета паднанась, пуданда’ хаювы манзаида маля тянё ни’’ӈа’’. Вадам’ минрена’’ хибярина пыда манзаида ненэця’ вадан’ падбидось. Стих’’, прозам’ ненэця’ вадан’ сертабавы нина’’ носиндалава’’ ирийна хасуюдимдей’ яӈганя яляхана этно-культурный центр’ мякана ма’’лабидось. Тарця ма’’лёвам’ паднана манзаям’’на’’ манзарана Любовь Царькова нэдась, ӈока ихид’ миндя’’ вади’’ манзаравы’’ хибярихи’ тэврась, мядонзэйм’ тярпись. Роза Ивановна Канюкова жюрина манзарась, мась: - Тарця тарана манзаи’’ нерня ӈод’ сертаба тара’’. Мэкадувна луца’’ вадавна падвы’’ манзаи’’ ненэця’ вадан’ падбась. Тарця манзаям’ сертава е’’эмня хибярина таня’’. Теда ваеравы конкурс’ тикым’ манэ’’лабтада. 

Манзаидо’ конкурсан’ тэвравы’’ хибяри’’ поӈгана теневана’’ нина’’ ӈокаць. Паднавы’’ нина’’ тарця вади’’ хэтаць: -  Тарця конкурс’’ ибкова’’ ёльце тара’’ним’. Маня’’ ӈацекына паднавась табадабина’’. Мань’ Анна Валеюв’ тюкон’ паднась, тикахад Николай Варницынув ӈани паднась. Алексей Пичков «Суюкоця» стихотворениямда ненэця’’ вадан’ сертаваць.

Мань’ тикы’ хавна прозам’ ненэця’’ вадан’ сертабимась. Ӈацекы теда сабе лахана’’ я’’амадо’, ӈодьбянда ся’’ня луца’’ вадахад’ харто’ вадахандо’  ӈамгэвкоцям’ сертаӈгу’’, маниеӈгудо’ сертавэмдо’. Ним’ манд’: пир’’ӈавов’. Иняндо’ саварха’ нив’ ӈэӈгу’’. Тикахана паднаван’ тамна’ тяха харваӈгу. Мань’ ӈод харн’ падвын’ ӈацекехэ’ хэтбасьтын’. Няндо’ масьтым’: хари’’ вадавна паднась тара, тикахана ӈэвда’’ сававна манзараӈгу’’, инда’’ӈу’’ таминдя саваркавна манзараван’ харваӈгу. Тарця паднава сер’ ёльце тара’’. Паднана Матрёна Талеева мась.  

Тамна ӈопой вадам’ мэ’’мы Надежда Талеева: - Алексей Пичков саць юнета паднанась, луца’’ вадавна паднана ненэць ӈэ’’нисяв’. Саць’ савовна паднасава’’. «Сятукамда» хусувэй нисядав’ толабю’’. Таняна паднанава ӈацекы ӈэвамда нив’ манэ’’лабтамбю. Маня’’ ӈод хойхана вадюданвы’’ ӈацекэӈэ’ вэнекоця’’ ӈэбто’ ӈод’’, нохокоця’’ ӈэбто’ ӈод, писякоця’’ ӈэбто’ ӈод нисянана’’ ӈань’ тэврабсеты’’. Мань’ ӈань’ тарця то’’олхам’ ӈоб’ тикы. Нисяв’ ӈань’ тарцям’ тэврасьту’’ нив’. «Сятукм’» сян’ луца’’ вадавна толабасьтыв’. Тикахад’ инян’ мадм’: нянэй вадавна серта’’ ӈань’ пиртанакэв’. Сертав’ тикад’. Ёльце’’ тюкода’’ мэкад’, толахарцюв’: - Нисяв’ тэхэт’’ тованда мальӈгана ӈудита’ ниня манзанадакоцям’, ейнанакоцям’, насанарман’ харванакоцям, няръяна лаӈгахалкоцям’ няни’ тэврась. Ӈодико’ то’’олха сэвкуцида няркна хэвнямна мандэлырӈа. Мань’ хамадав’: тикы тёнякоця ӈэвы. 

Тарця манзаям’ сертабавани’ ёльцяӈгана мадм: ӈана’’ тарця манзаям’ сертабась пябни’ таравакы. Хойхана иле’’мин тензебтебимась, нисяв’ инян’ ха’’аврамась.  Тикы манзаями’ нерня минреӈгув’, «Сятукм’» малӈэ ненэця’ вадан’ сертаван’ харвабцов таня’’. Мал’’ сертаӈгув’.