Округна хусувэй школахана тохолкодина манзара’’. Хусувэй тохолкода харта предметм’ пэртя, мал’’ пыдо’ ӈацекына тохоламби’’. Ӈокаюв ӈэсыхына ненэця’’ вадам’ пэртя’’ тохолкодина’’ таня’’. Ханяӈы тохолкодина маля пон’ манзара’’. Тохолкода’’ ӈацекына тохоламби’’.

Тикы’ хавна хусувэй тохолкода харта сян’’ манзара’’ – таӈок тоходана’’. Пыдо’ тоходанвась курсха’, семинарка’ ӈэдалёрцеты’’. Округна ӈэсыхына манзарана’’ тохолкодина е’’эмня тоходанва’ сер’ Няръяна маркана танесеты’’. Центр’ образования мякана манзарана’’ хибяри’’ тохолкодина’’ е’’эмня тарця тоходанви’’ хамадабсеты’’. Ненэця’’ вадам’ минрена’’ тохолкода’’ ӈод тарця курсха’ турцеты’’. Тарця тоходанвам’ маля ӈока по’’ ямбан Людмила Яковлевна Талеева нита’’ е’’эмня хамадабсеты’’. Тикы нява методистӈэ’ манзаранава. Тюку по’ ӈод маркана центр образования мякана тохолкодина тоходанаць. Ненэця’’ вадам’ пэртя нина’’ ӈарка пэвдэй ирийна сиднтетимдей яляхад няхарамдэй яӈганя толыр’’ ӈэсонд тоходанаць. Мат’’ яля’’ ямбан ӈока несэй ӈамгэм’ нина’’ намдаць, манэ’’ӈаць. Хусувэй тохолкода харта ӈод манза’’рамита нямна вадам’ минресь. Ома, Бугрино, Нельмин Нос, Андег, Индига, Выучейской, Каратайка, Усть Кара ӈэсыхыт’ товы’’ тохолкода’’ таняць, маркана манзарана’’ тохолкодина тикахана манзараць.

Тены’’ похона ӈацекына ӈокаюв’ луца’’ вадаривна лахана’’. Ханзер сидя вадам’ мэта ӈацекы’’ няюв манзарась? Тикы нямна Усть Кара ӈэсы школа ервота Марина Григорьевна Хатанзейская лаханась, пыда ненэця вадан’ ӈацекы’’ тохоламби. Ханзер’’ ненэця вада урокхана кроссворд’’ мэ’’ӈа’’? Тикы нямна вадам’ ненэцие школа-интернат тохолкода Матрена Ивановна Талеева няхата хэт’’нась. «Ненэця’’ хобцоко’’нямна манзаям’ Выучейскойхад’ товы тохолкода Татьяна Николаевна Канева лаханась. Ненэцие’’ культурам’ ханзер’’ ӈацекэхэ’ урокхана тэврамбидо? – тарця серу нямна Парасковья Ивановна Выучейская лаханась. Ома ӈэсы школахана манзарана тохолкода Изольда Викторовна Мишукова хэтадась: школаханандо’ ниня’’ тохолкова мальӈгана ненэцие вадамдо’ ханзер’’ мэ’’ӈадо, хурка манзаи’’ тамальӈгана сертамби’’.

Тохолкова по’ пеля ямбан центр образования САФУ филиал няюв’ ӈобнзер’’ манзара’’. Ненэця’’ вада семинаркана тоходанвы тохолкода’’ малӈэ’ сертификат ня’’амаць. Тарця тарана падарм’ тохолкодаха’ Надежда Валентиновна Подшивалова тэврась, пыда тамальӈгана тохолкодаха’ ӈока тарана’’ вади’’ хэтась.

Тохолковамдо’ ёльце’’махад’ хусувэй тохолкода’’ сававна манзараванда’ ед’ грамотам’, мядонзэйм’ ня’’-амась. Теда округна тохолкода’’ мякандо’ ӈэдалэйдаць, нерняна сиддо’ ӈарка манзая’ ӈате’’. Ӈани’’ похо’’на тоходанвась ма’’лась, тамна несэй ӈамгэм’ няхато’ вадець тэвраӈгу’’.