Яра’ ирийна сидя ю’’ няхарамдэй яля’ хэбидя яляӈэ’ таславы. Тарця ялям’ маля ӈока по’’ ямбан мэ’’ӈава’’. Ява’ лэтбада хибярина’’ ӈарка яля’. День защитника Отечества – луца’’ вадавна хэтась ӈарка яля’ тарем’ нюмдевы.

Ява’ лэтбава’’ ӈарка сер’’. Ява’ лэтбада хибяри’’ я’ сяр ниня’’ ханярина иле’’. Хусувэй по’ хасава’’ ӈацекына’’ армиян’ хан’’ӈа’’. Таняна ям’ сахарамбава серт’ тоходанасьты’’, ям’ лэтбава манзаи’’ минресьты’’. Тедахова ханярина хынёси’ илева’’. Пудана ӈарка сайнорма ваера’’махад’ маля си’’ив ю’’ пом’ тюку по’ ты’’ ниць ирийхана ядабтаӈгува’’. Тикы саць ӈарка яля’, теда маля хамяковина’’ ханярина миӈа’’. Пудана ӈарка сайнормахана мэвы’’ хибярина маля ӈармбэй хибяри’’, хусувэй по’ тянёмдана’’. Ненэця’ поӈгана нянэй сайнормахана мэвы’’ нина’’ маля малӈэ’ яӈгумбэй’’. Тарем’ ӈод хусувэдо’ ихиняна пилибт’ иле, пыдо’ по’’ тяхана хынёсяда илм’ яхана’’ тэвраць. Тарця ненэця’ е’’эйӈэ’ ява теда вадюданна’’ ӈацекы’’ лэтбидо’. Хасава’’ ӈацекына сиднтет’ яӈганя подандо’ панась армиян’ хан’’ӈа’’. Тюку ялян’ лаханась, армияхана мэна’’ хасава’’ ӈацекына хусувэй ӈэсыхына таня. Небянадо’, нисянадо’ по’ ямбан нюкцидо’ мякнандо’ ӈатесетыдо’. Ӈэрм’ яхана соявы, вадювы хасава ӈацекына тарця вади’’ нисьты мэс’’: мань’ армиян’ хэван нидм’ харва’’, нидм’ хант. Ямдо’ лэтбавась ӈацекына хан’’ӈа’’. Яра’ ирийна сидя ю’’ самлязимдей толыр’’ – ява лэтбада хибярина ӈарка яля. Тикы яляхана тарця хибярихина сямянд’ сава вади’’ мэтава’’. Хусувэй хибяри мякана тарця нидо’ таня’’, хуний сяӈгова армияхана мэць, ямва лэтбавась ядэрӈаць. Тад’ нерня ӈод, тарця хибярина яханана таняя, тикахана ӈацекына ӈамгахэртат’ нись’ пин’’ вадюдаӈгу’’. Ям’ лэтбада нина’’ сенз’ ӈэя, хусувэй серкана ябӈая. Сава ихиня товнда ӈарка ялямдо’ ядабтая’’.