«Илебц» театрхана сянакода’’ нина’’ ваеравы ирийхана Несь’ ӈэсын’ тэворӈаць, таняна илена’’ ненэцие’’ нито’ няюв ма’’люрӈаць. Несьхана ӈока мел’’ хибяри’’ иле’’, пыдо’ ӈуданато’ сертавы’’ манзаидо’ культура’ хардахана хамандавы выставкахана манэ’’лабтабидось.

Тикахад’ хынокад’ не’’ таняна иле’’, пыдо’ ӈод театрхана маркад’ товы’’ нито’ е’’эмня сё’’ мэ’’ӈаць. Канин’ выӈгы Несь’ ӈэсыхына мэвандо’ нямна няна Серафима Дуркина тарця вади’’ падась: – Несь ӈэсына’ маля нюртей яля тобна’’ культура’ хардахана выставкам’ сертаваць. Мань хар’’н сэдвын’: ӈухуко’’, ной ё’’иня’’ туцам’, кладчм’, судыр’’, нюдяко падком, ӈацекы е’’эмня паным, мальцям ӈыдарадамзь, манэ’’лабтабидамзь. Нина Баркулева сэдвы’’ манзая’’ таняць. Тамна культура’ харад ӈаркта Наталья Латышева сертавы хамадяр’’ ӈокаць.

Яля’ пэвсюмбы’ пеляхана концертан’ хибяри’’ ма’’лэйдаць. Ӈэсыхына илена’’ хибяри’’ сававна ма’’лэйдаць. Сиднтет юкад’ вата хибяри’’ тованӈгабясь. Сидна’’ ёльце’ сававна ядабтабиць. Маць: – Сава концертм’ няна’’ манэ’’лабтада’’. Ненэця’’ вадавна сававна лаханада’’, сидда’’ мал’ хамандамбиваць. Ханяӈы’ сцена’ хэван тоць. Тарця хибяри’’ поӈгана Евдокия Васильевна Канюковам’ нюмдеӈгудм’, пыда маля ӈарка не, сцена’ хэван’ тось сём’ ханась. Пуна хэвханана сидяӈгм’ сертаваць. Театрхадана’’ мядонзэйӈэ’ хар’’н сэдвы тэв’ ми’’ӈаваць. Пыдо’ ӈани’ театрхана’’ мядонзэйм’ таць – «Канинской ембдяркана ембмы сянаком’» ня’’амаць.

Март’ ирийна няхар’’ ю’’ нюртей толыркана Анна Егоровна Сулентьевна сидна’’ ӈэсывна ядалась, луца’’ вадавна хэтась е’’эмняна – обзорной экскурсиям’ сертась. Нум’ хардахад пяваць, тарця хардадо’ нивы манзара’’. Манзаранадо’ яӈгу. Ибкава етя Нум’ харад пэрмы е’’эмня илелава’ харад’ хэвхананда сертабэй. Валакада манзара’’. Манзараванзь тобэй’’ нись пон’ манзараӈгу, ӈани’ пуня’ хэсьты. Ти’ тарем’ Нум’ харад хэкур’’ тотрев ну. Нум’ харад пуд’’ Комарово нюбета районан’ хаява’’. Ӈэсы ӈарка мал’ манэ’’мы серта вуни’ ӈа’’. Хутор Бутово, Лахтинская, Ненецкой ӈэсы тамна ӈани’ танявондо’. Комарово няна’ Евдокия Васильевна Канюковам’ ядабтава’’. Тикы нямбара не сиднтет ю’’ ӈопой пода, ёльце’ мер’’ ядэрӈа, таӈок подамда нин’ хэтӈгу’’. Невхэна мань хадав’ ӈани’ тарцясь, ёльце’’ ядэрць мэнедась. Евдокия Васильевна сидна’’ мядоманзь хардаханда хаӈась. Сидна’’ сававна мядолабтась, сомбой ханюй ӈамзахана ӈаябарӈаваць, пуна’ сяйӈаваць. Ила’ нямна лаханакурӈаваць. Ихиняна ёльце савархась.

Яля’ пэвсюмбы някуна «Сава не» ансамбльхана хынота’’ не’’ ня’ ма’’лэйнаць. Сяймана сер’ тол’ тяхана лаханакурӈаваць. Ханяӈына’’ сём ханасеты’’. Мал’ ма’’лавы’’ не’’ сё’’ мэ’’ӈаць. Няхата’’на’’ сё’’ мэць тоходанаваць. Пыдо’ пензер’’кана сянако’ тохован’ харваць. Маць: – Сидна’’ сё’’ мэць, пензеркана сянакось тохолаидаць.

Несь’ ӈэсыхын’ сававна ӈэдалёрӈаваць, ӈока несэй ненэцие’’нина’’ торомдаваць. Хынокад’ нина’’ ядтаваць, ӈобкана ма’’люрӈаваць. Ханяри’’ тобнана’’ сидна’’ сомбовна ядабтбиць, нядаӈговась’ паромбасеты’’.

Людмила Бобрикова харад’ терха’ ӈарка вадам’ хэтбива’’, пудана сидя яля’’ пыдо’ хардаханандо’ сеӈгаваць. Ӈарка вадам’ культурандо’ харад ӈарктан’ Наталья Федоровна Латышеван’ хэтбива’’: – Ненэйм хон’, сидна’’ Несь ӈэсын’ тэвран’, тикы е’’эмня нянд’ ӈарка вада, мал’ сава ӈэя, ӈоб’’ нерня’ няха’’на ӈэдалёркава’’, тикы пудана ядабта’’мава нёя ӈа’’.

Несьхана ханярина сидна’’ ёльце сомбовна ядабтамбиць, мал’ хибярихи’’ сава сёнзя, ӈарка вада’’.