Тарця пьесам’ Матрена Ивановна Талеева падась, нябимдей пелямда толада’’.

Тыне нусь хаи, ӈудам’ тидкуць яв’ няю сырӈа, индта ӈахат нэкалӈада, пям’ юпа пя. Вэн’’ мадлыд’’, хасавада ӈадимя. Пале ханамда ва’ хэван сярада, ненда’ няю нись паромбю’’, ядалъй, сяӈода мяд’ няю ӈа. Пале,сомбой сэдвы, ной мальцянда’ нимня паской нида сяры, ӈэванда’ ниня неняӈг’ сава. Пыда ябтако пирцяко сядота хасава., Тыненда’ хэван то, я’ ни ӈамды’’.

Пале: Ӈацекыни’ ханяна мэта’’? Мякана хибяхарт нися тур? Тына яв’ няю ӈэдарэян, таняна ханзурка, ӈумда ӈока, неняӈгахат, пилёхот нылаӈгуд. ( Лэркабт’’ ӈацекэдрев маймба лахана) Тыне, няхар’’ ябтом’ ядаманзь, сидя ӈа’’ ӈо’ пидям’ ходм’, сар’’ню’ ханан’ нерняна нядэй’ поӈгана ӈа’’ ӈацекыни’’ пуна мят’ татыдо’. Нян инзелен, ӈамгэвна ир ядэрӈада? Мэсь ӈэява пям’ юпа, пуна ӈацекы’’ пям’ хамадаӈгу’’, ӈамдыд’’, нылад’’.

Тыне: Ӈацекыни’’ нерманзь хаяць. Хибяхарт турта яӈгусь. Не’ нюни’ ня лаханакуманзь. Вадида сейхан’ сававна теба, нянанд’ ӈод’’ тарця вада’’ сава ӈэӈгу’’. Пыда тамна ӈацекы, хэвханани’ илевамда майбцоӈэ мэӈада, ӈацекэхэна тарця нив ӈа. Пыдъеда невхы’ ӈэмя серо’ вунида тенева’’, ваторама’ вадам’ мада вэва ӈэдакы? ( Хасаванда’ няю сылы). Сит нисядарев сахарамби, сяӈа. Ненэй нисянда яӈгума ӈока поӈэ хая, тет опкуцядась, хасава’ нюн мат’’ пода панысь.

Пале: Ваторама вадам’ мадаба ни серос’’ ( янамбовна вахалй’’). Мань ӈод’’ нянд илеванзь тоба’’ан’ ӈацьмбой наныманзь. Пыдар нисяр, небяр, някыд’’ тарем’ тасладонзьню’’. Пыдар ёнэй’ папар Мань мэвнда пирибцяв’ пыян’ ӈэлад ханасьданю’’. Тикым’ юрар’’? (ӈаркавна ма).

Тыне: Юрхава нив юр’’. Нянд’ хаепа хэба’’ан мале сидя ӈацекэвась, мань ӈод’’ ӈацьмбоймась, тет ӈацекым’ нянд’ соябтадм’. Ӈарка хасава’ нюв Хавряв’ сянд’’ небян’ хэвхана илеӈгуда, нелева’ӈарӈэ мале хая. Наны ватохонандо’ нелеба тара. Пыдар ӈо’’ невхэна неле’ ватор товыкы, нян илеванзь тобат’’. Мика’ папан’ ӈацекыда’’ мал’ не’’, ӈарка не’ нюди’’ вадабада, мале сававна нядаӈгодакы.

Пале: Тэхэвыд ӈокаць, нензя тарцясь. Нись ӈани немаханан Сэрнем’ манэӈадм’, няюн’ сюрмбадаханда хибяри’’ нямадо’, хурадо’, ханадо’. Мань ӈударин’ таня вэӈгалы’’, немав’ хая. По’’ ваера’’, ӈани’’ невхы’’ немаханан’’, сеюв’’ есьволы’’. Невхэна сава иленя’’ сян’’ недо’’ ӈэсьтыню’’. Ӈэвтана’’ тоб’’ не’ нюми’’ нив мит’’, тамна вадёданая, ӈани’’ ӈацекыни’’ нюдярка’’, сит Салями’ нядабаӈгу. Ӈацекы’’ын’ небя, тарем’ сава?

Тыне: Немавахана ӈамгэм’ нинда манэт’’. Сэрнем’ ныхыри’’ нидонзьню’’ хана’’. Не’ нюми’ таня вадёданая. Пыдар ӈо’’ невхэна си’’ым няданась, мань мякан’ илеванзь тонась, вы’ яханана писядетна’’ хибяри’’ таневакы’’, хибяхартан нинась инзеле. Сэра’ не ӈэб’’ саць вэва. Небян’, нисян’ хэвхана иб’’ сидя ӈацекэв няць илеӈговакэдм’. Валакада хусувэй не’ харта мята, нюда, ӈацекыта’ нися – ты’ пэртянда таняб’’ тякахана ябдаӈгу. Теда’ мань саць ябдадм’, вы’ явнани’ мюсерӈани’. Я’ мал’ няд юн тосьню’’, Сэрне’ папан’ня тет не’ нюм’ вадабихи’, тюку ян’ нихиню’ мий’’.

Пале: Хурка сякнати’ тюку ян’ тутӈаханда’’. Сэрнем’ теда’ вунив’’ ӈате’’, харта тэравы илевада, таня таняна илеяха’, не’ нюди’’ сававна вадамбаяха’. Валакада невхы’ ватом’ юрвада вэва, нисянда, небянда вадам’ ӈамгэхэртаӈэ нивада пэр’’, пыди’ нян ваторӈадись. Сэрне саць вэваковна сертада, ӈока хибярим’ ярда, нисяда, небяда ӈока вэвако вадам’ писядетна’’ хибярихыт намдвакэхы’. Мань вэсакохо’ ня вунидм’ нену’’. Харт ӈо’’ ваерамы серм’ нирув’’ тенева’’.