Маня’’ ты’’пэртя’’ яханана иленава’’. Тэхэт’ хойхана мюсерта’’ ненэциена илм’ пере’’. Ты’ по’’ ямбан ненэцям’ ӈавламбида, ембпида, ядэлада. Округханана тыбэртина’’ хусувэй выӈгана тыдо’ пэрць явнандо’ мюсерӈа’’.

Ты’ пэрма серкад’ перена ӈарка ялява яханана маля ӈахэт’’ таня’’. Ты’ ялям’ округханана яндаха’’на маля синдтет’ юкад вата по’’ ямбан мэцьтыва’’. Тюку по’ ӈод тарця ялян’ хамякова’’ маля миӈа’’. Округна администрацияхана ӈэрм’ ненэцие’’ серу’’ тасламбада нина’’ ты’ ялян’ хамякова е’’эмня оргкомитетхана манзаравнда ненэцие’’ таслаць. Пыдо’ ты’ ялян’ хамякова серу’’ таслабувда’’. Оргкомитет’ нюртей ма’’лёвадо’ маля танясь. Еся’’ ты’ ялям’ мэ’’ма е’’эмня ӈахакуд’ округна бюджетан’ паклевы’’. Тикы’’ есяхат’ ты’ яляхана тиртя’’ӈано салдавы’’ ӈэӈгу’’, тикахад’ ты пэртяха’ мядонзэйм’ тэмдавам’ салдаӈгу.

Тыбэртина ӈарка яля’ яханана неняӈг’ ирий пудана’’ толыркад’ пилю’’ ирийна юдимдей яля’ ӈэсонд’ минзьты’’. Тюку по’ ӈод тарем’ ӈэвнда’’. Нюртей хибярина ты’ ялямдо’ мэ’’манзь нерняна товнда ирийна пудана яляхана ма’’лаӈгуд’. СПК «Ерв», «Харп», «Няръяна ты», «Ижемский оленевод», «Канин», «Дружба народов» манзарана’’ харто’ ӈахы’’ ныланава яханандо’ ма’’лёда’’. Нюдя яхана тыдо’ пэртя’’ ненэця’’ ӈод ӈарка ялядо’ танеӈгу. Хусувэй семейно-родовой общинахана манзарана’’ хэбидя яляхана ма’’лаӈгуд’. «Ямб’ то» няюв’ ӈод маркад’ тиртя’ ӈано ӈэдалаӈгу’’, маркад’ хибяри’’ таняюв’ ӈани’ тэворта’’. Харто’ тыдо’ пэртя’’ нина’’ маркад’ товы’’ нидо’ ӈатесетыдо’. Хынокад’ хибяри’’ тобнандо’ ихиняндо’ маймбцо ӈэсьты’’. Тюку по’ ӈод харвабнанда культура’ манзаям’ минренина’’ таня ӈэдалёрта’’.

Маркана илена’’ хибяри’’ ӈод’ ты’ яляхана ма’’люрць торомы’’. Тамальӈгана маркад’ хахаярка илена’’ хибяри’’, невхы похона хойхана манзаравы’’ ветеран’’ ӈобкана ма’’ласьтыд’. Тарця яля’ пилю’’ ирийна юдимдей толыр’’ ӈэсонд’ ваерасьты. Ты’ ялям’ ӈатесетыва’’. Ӈобкарт’ хой’ манзаям’ пэртя хибярива тарця яляхад’ хадёбнанда ни’’ тара’’, ӈобкартадо’ юрвы нибнанда ӈа’’. Хой’ илм’ мэта’’, теневана’’ ӈобкана ма’’лась няхато’ маймбасьты’’. Нидо’ ядабтась невхы’’ похо’’на’’ иле’’мидо’ тензебтебасьты’’. Теда манзаранина’’ по’ ямбан манзара’’мидо’ няхато’ ваде’’та’’, нерня манзаравамдо’ таслабгу’’. Тыпэрма серкана нерденя’’ хибярина сава вади’’ намдӈгу’’, мядонзэйм’ ня’’амӈгу’’. Тарця яляхана ханярина сянакова’’ ваерасьты’’, ненэця’’ сямянд’ меретидо’ нюмдеӈгу’’. Хибярина поӈгнандо’ пирдырта’’: хан’ тя санарта’’, тынзям’ моепаӈгу’’, сюрберта’’. Хойхана илена’’ нито’ сею’ маймбтева’’ е’’эмня ты яляхана хынота’’, тарана’’ ненэця’’ хоян’ тэворта’’. Ӈарка яля’ ед хамандавы сёдо’, тарабцодо’, лахарёдо’ тэвраӈгу’’.

Ты’ яля това ӈэсонд’ времява’’ тамна таня. Хусувэй сава вадам’ хэтван’ харванар’ газетахана падная, хойхана мюсерта’’ нита’’ нямна вади’’ падада’’. Сейхад’ миндя’’ вадида хэтада’’.