Хэвхы округхана хуркари’’ тенз’мэта хибяри’’ иле’’, поӈгнандо’ ӈэрм’ тенз’мэта ненэця’’ ӈод таня’’. Харто’ илесь янандо’ нянэй ненэця’’, хаби’’, тасу’’ хаби’’ илевамдо’ минредо’. Малӈэ’ пыдо’ харто’ вадамдо’ мэ’’ӈа’’, хари’’ культурамдо’ лэтби’’, хари’’ паӈгудо’ тенева’’.

Тикы’ яханана илена’’ нина’’ ӈод’ культура’ серудо’ нерня пэръядо’, тикы нямна хуркари’’ фестивальдо’ мэцьты’’. Тарця ма’’лёваха’ ӈани’’ яхад’ турта’’ ненэця’’ ма’’лабсеты’’. Тюку ирийхана  ӈод’ тарем ӈэвась’ мэ’’. Хэвхы округна еркы маркана Саля’хардахана «Душа тундры» нюбета этнофестиваль’ ваераӈгу. Яндахат’ товы’’ ненэця’’, хари’’ тенз’ культурамдо’ нерня пэртя’’ хибяри’’ няхар’’ яля’’ ямбан манзараӈгу’’. Тарця фестиваль’ манзаямда саво ирийна си’’ивумдей яӈганя’ толыркана нэӈгуда. Яндахат’ товнда’’ мядондидо’ нина’’ ӈате’’. Этнофестиваль’ манзаямда тюку ирийна хасуюдимдей яӈганя яля’ ӈэсонд’ минреӈгуда. Хари’’ паӈгудо’ тенена’’, хари’’ вадамдо’ минрена’’, хари’’ культурамдо’ сахарамбада’’ хибяри’’ ӈока’’ яхат’ товась’ ятна’’. Хари’’ манзаидо’ манэ’’лабтавась Я’малан’ ма’’лаӈгуд’. Няхар’’ яля’’ ямбан ӈока’’ культурно-массовой мероприятия’’ ваераӈгу’’, хуний ӈэрм’ ненэцие’’ фольклорм’ минре’’. Яндахат товы’’ мел’’ ненэця’’ харто’ манзаидо’ тэвраӈгу’’. Хуркари’’ манзаи’’ сертабавась’ няхататто’ тоходангу’’, мастер-класс’’ танеӈгу’’.

Фестиваль’ яля’’ мима’’ мальӈгана Саляхардахана «Мир ремёсел» нюбета ярмарка манзарагу, хуний хэвхы округ’ еркы маркана танеда «Дом ремёсел» хардахана манзарана’’ мел’’ хибяри’’ хамададось. Таняна хуркари’’ манзаи’’ манэ’’ма’’ пир’’ ӈэӈгу’’, хусувэй харванар’ ихинянда мэёвна’ тэбвы манзаям’ тэмдась мянтада. Тикы’ хавна «Забытые ремесла» творческой лаборатория манзараӈгу.

Округандо’ Центр национальных культур мякана ӈарка’’ концерт’ ваераӈгу, ханяна Ямал’ хусувэй яхад’ товы’’ хынокад’ ненэця’’, коллектив’’ хыно’’та’’. Тарця серкана я’’авлада’’ хибяридо’ Гала-концертхана сёдо’ мэта’’, хуний этнофестиваль’ пудана яляхана ваераӈгу. Тамна тикы яля’’ мальӈгана «Мастерица Ямала» конкурс’ мэта’’, таняна сямянд’ мел’’ нем’ тэрабаӈгу’’, хуний хусувэй серкана сюдбя ӈэвамда манэ’’лабтаӈгу’’.

Тамбир’’ ӈарка фестиваль’ Саляхардахана нертеймэвна манзараӈгу’’. Мядонда’’, хари’’ культурамдо’ тю’’увкури’ пэртя’’ ненэця’’ Курганской, Тюменской, Кировской областьхад’, Ханты-Мансийской округхад’, Ямалкад’ ма’’лаӈгуд’. Маня’’ округна хибяри’’ӈод’ таняна ӈате’’. Харвабнанда хибяхова’’ ӈэдалаӈгуд’. Тамбир’  фестивалькана мэкад’ ӈэвась’ пэрӈа’’.