Округханана хуркари’’ тенз’мэта’’ ненэця’’ культурахад’ перена’’ серу’’ этнокультурный центрхана манзарана’’ нина’’ нерняри’ пэръядо’. Нянэй ненэця’’ ӈод’ хари’’ культурамдо’ тю’’у минрена’’ хибярина таняна манзара’’. Харто’ манзаяхато’ ив’ ер сырта’’ нина’’ ненэцие’ отделкана манзарана’’.

 Пыдо’ сидна’’ ӈобт’ ма’’лабсеты’’, е’’эмняна хуркари’’ ныланави’’ хамадабсеты’’. Маня’’ тарця сава серт’ торомбэва’’, ӈодьбянда хусувэй хэбидя ялям’ маймбась ӈатесетыва’’. Ты’’ ниць ирийхана ӈока’’ хэбидя’’ яля’’ таняць, ӈока’’ ныланави’’ нина’’ е’’эмняна хамадаць. Хусувэй ма’’лёвахана’ хибярина ӈока’’ ихиня’ сомбой, несэй ӈамгэм’ намдсеты’’, манэ’’цеты’’.

Ваеравы ирийна еркы’’ толыр’’ мальӈгана культурам’ пэртя нина’’ ихиня’ сомбой ма’’лёвам’ ӈани’ хамадаць. Тюкумэвахана «Мяднтеран’ вада» - «Родной язык в моей семье» семейный турниран’ ненэцие’’ ма’’лаць. Тарця мэкад’ мероприятием’ хамадаць. Тарця ма’’лёва хурка ӈэса’’, ӈамгэм’ таняна нина’’ манэ’’лабтабиць’’? Хурка серкана мяд’ тер’’ нина’’ ныхыдо’ хорпиць?

Тены’’ похо’’на хари’’ яхана илена’’ нянэй ненэцяӈэ’ тарця илан’ тэвына’’ – хари’ вадава юрбива’’, хари’’ вадавна лаханана’’ хибярина хусувэй по’ тянёмдана’’. Иб’ од ӈацекына школахана тохолабина’’, иб’ ӈод радиона’ вадава со’’, иб’ ӈод газетахана страницава таня, иб’ ӈод хибяхова’’ ненэця’ вада курсхана вадам’ тохолабван’ харвани’ тохолабсеты’’. Валакада тарця серкат’ ӈамгахэрт’ ни’’ сояӈга. Хусувэй по’ вадам’ теневанина’’ тянёмдана’’. Культурам’ пэртя нина’’ ӈод вадана нерня илевам’ харто’ хамадавы манзаяханато’ манэ’’лабтабидо’. Ты’’ ниць ирийхана «Мяднтеран’ вада» ма’’лёвам’ хамадаць. Таняна мяд’ тер’’ хибяри’’ ма’’лаць’’.  Хуний харто’ мякнандо’ вадамдо мэ’’ӈадо’, харто’ лаханана’’, ӈацекыдо’ тохолаби’’. Маркана ӈод’ тарця хибярина таня’’, хуний харто’ вадамдо’ мэнедо’, теневадо’, тю’’у пэрӈадо’. Тюкумэвахана ваеравы ма’’лёвахана няхар’’ мяд’ тер’’ манэ’’ӈаваць’’, хуний хамандавы манзаянато’ ваде’’ӈадось’ – ханзер’’ хари’’ вадамдо’ мякнандо’ мэ’’ӈадо’, нюдо’ ханзер’’ тохолаби’’, ӈамгэм тикы е’’эмня сертаби’’.

Няхар’’ мяд’ тер’’ теневанамдо’ манэ’’лабтабиць, пыдо’ малӈэ’ маркана илена’’ нина’’, сававна теневана’’ хибяри’’. Маркана манзара’’, нюдо’ вадаби’’, паӈгудо’ тене’’, вадамдо’ мэне’’. Няхаркад’ сидядо’ Канин’ выӈгад’ перена’’, не’’, хуний таняна сояць, вадыць, хой’ илӈгана илевы’’. Таняна мюсета’’ хибярина тенад’ хари’ вадамдо’ мэ’’ӈа, нюдо’, нюто’ ню’’ вадамдо’ намдурӈа’’. Маргарита Мирова, Маргарита Латышева, Людмила Канюкова, Вероника Талеева хари’’ нюдо’ тэврась конкурсхана пирдыӈаць. Малӈэ’ пэдоваць, хусувэдо’ ӈока’’ мэкад’ ӈамгэм’ хамадавыць. Нюкцидо’ ӈод пэдова’’, харвась’ манзараць, небянадо’ нядабиць. Нертейӈэ’ тарпвы’’ Вероника Ивановна Талеева мяд’ тер’’. Пыдо’ ив’ ер тарця конкурсан’ хамяковы’’. Харто’ паӈгудо’ тенева’’, невхы’ ил’ нямна ӈока ӈамгэм’ ваде’’ӈаць, мэкад’ лаханаком’ манэ’’лабтаць.

Тарця ихиня’ сомбой сер’’ нерня ӈод’ танябнандо’ сава ӈэӈгу’’, маня’’ ӈатеӈгуна’’.