Маня’’ нина’’ хуркари’’ манзаяхана манзарась ӈокаювна пэртя’’ манзаяхато’ ив’ ер сырцеты. Хусувэва харта манзаямда сава ихиня минребсетыда, ныхымда малӈэ’ манзаяханда масьтебсетыда. Тарця нина’’ округна’’ толаӈгова мякана манзара. Ӈэрм’ ненэцие’’ отделкана манзарана’’ нина’’ манзаям’ маниева’’. Ӈока’’ пыдо’ хамандавы мероприятияха’ тэворцетыва’’. Та’ мальӈгана ӈод’ таняна манзарана’’ нина’’ манзаравада ни’’ нулаӈг. Ваеравы’’ яля’’ пирка’’на тарця ма’’лёвахана Серафима Дуркина мэвысь. Тикы нямна падвэмда тэврась.
Тюку по’ округна’’ сидндет ю’’ пода панӈгу. Тикы’ нямна хуркари’’ мероприятия’’ ӈэсьты’’. Округ’ тавна культурам минрена некуцина’’ хусувэй ӈэсыхы’’на таня’’. А.И.Пичковм’ нювм’ нюбета ненэцие’’ еркы толаӈгова’ хардахана ӈэрм’ тенз ненэцие’’ отделкана сидя нехэ’ манзараӈаха’. Тикы: Зоя Степановна Ивакилева няби Надежда Николаевна Талеева. Ненэця’ вадавна сававна лаханаӈаха’. Пыди’ выӈгана соябэхэ’, вадювэхэ’. Зоя Степановна Ӈаркаяндер, «Путь Ильича» колхозхана нисяда, небяда мюсерпэй’’. Надежда Николаевна ( харта тензда Сэротэтта ӈэвысь), Ямал’ выӈгы’ няд тобэй. Тикы выӈгана хибярита ня’ ядэрпэй. Нида’’, теда лаханая, харто’ явнандо’ тыдо’ пэрць мюсерӈа’’. Надежда Николаевна «Илебц» ненэцие’’ ӈахат сянаку. Няхар’’ ненюкцяда ӈани’ театран’ ядэрӈаць. Пыда тамна ненюндя не’ ӈацекым нянанда содасеты. Не’ ӈацекы нюдякохаданда ненэця вадан’ инзеле, тарем’ ненэця’ вадам намдорць, вадмбой лаханась тохода.
Толаӈго’ хардахана манзаранаха’ сидя нехэ’ хуркари’’ мероприятия’’ сертасетыхы’. Тоходанна’’ ӈацекы’’ тоходаналван хэсьтыхы. «Толаӈго книга» клубм’ нэӈаханзь’. Ненэця’ вадавна лаханана не’’ ханзьтыхы’.
Неняӈг’’ ирий сидндетимдей толыркана «Харт ӈацекэмд’ саван тохоламбад», луца’’ вадавна тарем’ со – «Учи своё дитя добру» – таремъюв’ нюмдевы мероприятиям’ таняна манзарана’’ нина’’ хамадаць. Надежда Николаевна ӈока сава вади’’ ханзер’’ ӈацекы’’ вадаба, тохолаба тара тикым’ хэтась. Дарина ненюда лаханамам’ «Былина о материнской любви» толась, тарця лаханавам’ паднана Инга Артеева пададась. Нина Баркулёва «Хадахан мам» лахана’’мам’ толась. В.Н.Ледков юнета паднана лаханамам’ «Хынос’’ма, хынос’’» ненэця вадавна Фаина Ледкова хэтадась. Мероприятиям’ минрена Надежда Талеева «Ибакоця мерця» П.А.Явтысой падвы хынобцм’ ханась. Матрёна Талеева небянда е’’эмня падвыда намдаваць. Галина Григорьевна Тайбарей падвы ӈо’’ мероприятияхана соць. Тарця’ сейхана сава мероприятие округна’’ библиотекахана ваерась. Неняӈг’’ самляӈг’яӈганя толыркана Ненэцие’’ округна е’’эмня устной журнал’ таняӈгу. Сидя ю’’ ӈопой толыркана «Ненцы Архангельских тундр» А.Евсюгин падвы книга юбилейда ӈэӈгу, тикы нямна лаханартава’’. Товы’’ хибяри’’ сава вади’ Надежда Талееван’ хэтаць: – Ӈоб’’ нерня’ тарем ма’’лаӈгахава’’.
