Тюку по’ округна школахана манзарана’’ ненэця вадам’, краеведением’ минрена’’ тохолкода’’, тикахад ӈацекы’’ сава мядонзэйм’ ня’’амаць. Тикы едэй сертавы’’ манзаяхана, тохолковахана тарана’’ луца’’ вадавна хэтась – пособия’’.
Тарця манзаи’’ сертавэхэ’ Роза Ивановна Канюкова, Мария Яковлевна Бармич. Тикы няхаюни’ округна тохолкоди’’ е’’эмня саць сава нядаӈгодаха’, тохолкода’’ ӈод пыди’ сидди’ тенева’’. Ӈока ӈобкана манзарасьты. Тюкумэвахана тарця книга’’ ӈадимя’’, хусувэй школан’ маля тэвравы’’. Нябимдей класс’ е’’эмня Роза Ивановна комплект хамандавысь. Ненэця вадам тохоламбава е’’эмня – тохолкова серкана тарана учебной пособие «Ненэця’ вада», тикахад’ «Сянако тоходанава’’ манзарась’мэта тетрадь, тамна таранада «Паднава» – прописи. Тарця пособиевна нябимдей классхана тоходанна ӈацекы’’ ненэцие вадам’ тохолабгу’’ – паднаӈгу’’, лаханаӈгу’’. Тарця комплект’ манэць мань’ маиваць. Роза Ивановна тамна ӈопой саць ӈарка манзаям’ серта. «Ненэця’ вада» пособие мю’’ паклевы’’: обучение грамоте ( вадам’ ехэрана тоходана’’), литературное чтение, правила письма. Пособие’ саць паской, тарана материалда ӈока. Манзара’ мэта тетрадьда ӈод тарана манзаяхана пан’’ӈа, «Паднавана» хуркари упражнения’’. Тарця комплект’ маниесь тара. «Методической пособие е’’эмня Р.И.Канюкова тамна методической рекомендации падвысь.
Мария Яковлевна Бармич ӈацекы’’, тохолкода’’е’’эмня падвы книгида саць ӈока. Тюкумэвахана округна школаха’ тарця пособие’ тэвыць – «Ненецкий язык 10-11» углублённый курс. Сидя юркад’ вата страницахана тоходанвахана тарана ма’’лавы материал ӈока. Тарця пособиевна тохолкода’’ манзараӈгу’’, тикахад педколледжхана тоходанна студентхана тара’’, паднава серм’ минрена’’ хибярина ӈани тара. Ненэця’ вада – лексика, фонетика и графика, морфология, словообразование, части речи, синтаксис мал тикахана таня’’, тохоламба е’’эмня ӈопой ян’ ма’’лавы’’.
Ти’, тарця мядонзэйм’ нянэй ненэця’’ тюку по’ ня’’ама. Тарця пособия’’ ӈадимя’’ е’’эмня есям’ администрацияна ӈэрм’ ненэцие’’ манзаям’ пэртя управление’ ховысь. Тюку яля ӈарка вадам’ Р.И. Канюкован’, М.Я. Бармичан’ хэтбим’. Сензди’ ӈади, пыдари’ саць мэбета хибяриди’, ненэця’ вадава няданди’нерняри миӈа!
