Ненэй ненэцяи’’ яля падаркана по ӈэвам лимбя ирыхад миӈа. Луца падаркана едэй по пэмярихид лимбя иры еркана ю’ самбляӈгумзей ялян тэвмахад нув’’ панхана хаерад ӈэва лакамбой’ вэхэбтэй. Тикаӈэ тайкуд маниеб тиван  харвана лимбя тодрев ӈади ненэцяи’ сэвхана’. Тикы иры ӈадьбата тарем нюмзевы ӈэдакы я’ мидкад. Хаерадм сэван манэсомахад ненэй ненэцяи’ яля падаркана едэй пон тэв’’’. Тикан сямян явна ядерта сармик’ ӈэдакы, ненэцяи’ едясипой ӈани ӈоб пом’ мадамаханту вули малаӈэ маимби’. Тад нерня хаерта ӈотаӈод ялэ тиӈгына навэд тю пяӈгуда. Яна ний ӈоб тарем янабовна ялэмта. Иб сыранта тамна ну ялэ тебта ёр’’ворб ӈод, ненэця ялянта’ тю пява сер ниту’ мядомана ядерӈа’, хуркари сава мядонзэй хомбаӈгу пон нявыду манеивыду’’ няхтату’. Хурина невхи яля падракана тад ӈадиманта ялям амгэ толха ӈэвам тарць ненадо, пун’ вадавна тасламбиду ненэй’  ненэця’.

Лимбя иры еркана янта латдан хурина ӈарка’ я сыра парандэй – тантаб’’ та’ ёльцяӈгана ёрякая ӈув’ вадёвам пэрӈа. Хаерад нув пахаӈгана ӈадима яляхана нумта ӈэрм ӈэбтананта – тованта танта’’ ядембаӈгу, нумгад хад тикы яляхана хаморп, иба ӈэвнанта – та’’ ханзо по ӈэӈгу. Лимбя иры ямбан иба няад пили пон нумта мин мимбнанта – танда ямбан хэ’’ мунота’’.

Мале яра иры пуданахана хаерта навэд тю’уна хая. Ну ялэ’ тебта лимбя Иры пудана яля ёльцянт хадсяда нув’ ӈэбнанту, хаерта пилипон ӈадяб – танта ёльцяӈгана сарё нув ӈокаваханту ӈэӈгу. Лимбя ирыхына  етри ӈэрм ӈэбнанта – та’’ ямбан ядембада, ебдя’ ялэ ӈэвам пэрӈа.

Я’ маха’ тяхарина хонёвы хаерако

Тей яля’ тарпвы’’, ти пыда яделы’’.

Вы’ ямна вэдепа тире’’ сер’ танта.

Янта тер сидебинё’’, ям’ ти ялэмтамби.

Вы’ яна’’ нерокоця’’ малридо’ ӈод’ ӈади’’

Хаер’ ня’ енты’’нё’’.

Хурина сырэй Иры яля пэвсюм няана сармик’ ӈоберё ӈыхи яхна собнанту – тебтад няана нумта ӈэрмаӈгу. Сармик’’, ты’’ ӈорта’ ӈэрё няана ӈокаявана манталаӈэ ядербату – сыра ямбан ӈокавахнанту ӈэрм нуво’ пэрӈа. Хурина ванда ты’ пэвсюм няана ӈобт няхтату пэйрё ваналпату – хад яляна парандэй ниня ваналбату – нумта ибемта. Сырэй нумгана нохо’ писяко’ ваӈготату мюд ӈадимб – ӈоб тарем иба нуво товам пэрӈа. Лохамбада сяй ед’’ сёнта мюд хаал сюдарць ӈадиберць пэва – ӈэрм ялэ’ товам пэрӈа. Иры ӈэвахад пилипон мерця яля’ ӈэб’ тад  ӈадиманта, яра ирыхана тецьда нув’ соховахнанту ӈэӈгу’.

Ӈарка пэвдэй вы’ яни нимня яднакораха,

Вы яни ялм янпадараха,

Танзерарка хадм сюрлабтавы,

Нердани ня’ пия тотрев

Нён вэӈгалаӈг.

Носи’ ядмако нёд тонтабю.