Вы здесь

Саляхана со’’явы’’, вадювы’’

Роза Канюкова сайӈорма мальӈгана ӈацекысь. Фото ЭКЦ

Маня’’ яханана хуркари’’ тенз’ мэта хибяри’’ хынёси’’ӈобкана иле’’, нидо’ няць хуркари’’ манзаяха’’на манзара’’. Тарем’ пилибт’ ӈась, тарем’ нерняна ӈод’ ӈэбнанда тара’’. Ӈопой яхана илесь’ ӈамгэм’ тярпаӈгува’’.

Округханана тарця ӈэсы’’ таняць, хуний по’’ ваерась яӈгумдабэй’’. Тарця ӈэсыхына со’’явы’’, вадюданвы’’, сяӈгова илевы’’ хибяри’’ харто’ нюдя ямдо’ пилибт’ сейханандо’ лэтбидо’. Сяӈгова ӈэсыдо’ тю’’у илбавы’’ нидо’ тенейдо’, пыдо’ иламдо’ теда вадюданна’’ ӈацекехэ’ ваде’’ӈадо’. Яӈгумдабэй’’ ӈэсы’ тер’’ хибяри’’ маркана харто’ яндо’ тер’’ ӈобкана ма’’лась землячество’’ сертаби’’. Тарця землячество’’ маля сидя юкад’ ва’’ӈа’’. Хибяри’’ харто’ со’’явы яндо’ историям’ ма’’лаби’’, сайнормы’’ ненэциедо’ тензебтемби’’, сайнормахана яӈгумы’’ нито’ нюбе’’ илелътемби’’. Харто’ яндо’,ӈэсыто’ нямна книги’’ падби’’, сидяӈг’’ ма’’лаби’’.

Округханана клуб землячеств’’ таня, хуний харто’ паӈгудо’ теневана’’ нидо’ ӈобкана ма’’лабсетыдо’. Тюку по’ ӈод землячество’’ ма’’лёва ваерась. «Арктикам’» нюбета культура’ хардахана нюдя’ пэвдэй ирий’ си’’ивумдей толыркана хибярина ма’’лыць. Тюку по’ хамандавы ма’’лёвамдо’ Победа си’’ив ю’’ пон’ ӈэдтадонзь. Хибярина харто’ ӈэсыхатато’ хэвы’’ ненэцието’ нямна вади’’ мэ’’ӈаць, манэ’’лабтабидось: ханзер’’ округна ӈэсыхына саю’’ похо’’на хибярина илець, манзараць.

Нельмин’ саля тер’’ нина’’ харто’ землячествомдо’ сян по’’ тяхана сертадось, тикы’ пуд пилибт’ ма’’люрцеты’’. Тюкумэвахана харто’ стендамдо’ хамандаць, сайнормы по’’ мальӈгана ӈацекы’’ ӈэвы’’ нидо’ ма’’лаць. Роза Ивановна Канюкова тарця нита’’ нямна ӈока’’ вади’’ ма’’лась, сидяӈгадо’ сертась. Нида нерня’ пэртяӈэ’ Людмила Булыгина тара, харто’ манзаяндо’ нямна тарця вади’’ хэтась: - Няхар’’ по’’ тарця манзаява’’ пэрӈава. Сайнорман’ хэвы’’ хибярина нямна лаханаваць. Нисянато’, иринато’ нямна нина’’ лаханаць’’. Хибя’’ сайнормахана мэць’’ ваде’’янаць. Ӈока’’ хибярина’’ оленно-транспортный  эшелонхана мэць’’.  Ембдярона’’ манэ’’лабтаваць, хибярина ханзер’’ невхэна ембдыць. Сайнорма мальӈгана нина’’ ӈаву ӈаворӈаць, тикым манэ’’лабтаваць. Ябто’ юр танясь, нянь норма хурка ӈэса’’ тикым матурнаваць. Хэвхана турта’’ хибяри’’ ӈокаць, хусувэй сер’ нямна хонаркуць.

Роза Ивановна Канюкова ӈока таранам’ тэврась, фотографии’’ тась. Харта таняна вадам’ мэ’’ӈась.  Роза Канюкова, Федосья Кауц, Людмила Булыгина, Федора Вылка, Александра Выучейская, Анастасия Помылева Нельмин Салямдо’ нидо’ юрбю’’, нерня минредо’.