Яра ирийна маттамдэй’ яӈганя толыркана округна толаӈго’ хардана ӈэрм’ ненэцие’’ отделкана манзарана’’ нина’’ тамна ӈопой ныланавам’ хамандаць. «Толаӈго книга» клуб’ ма’’лёвадо’ ваерась. Тюкумэвахана нина’’ ӈацекы’’няюв’ манзараць.
Толаӈго’ хардан’ ( округна библиотекан’) евако’ хардахана вадюданна’’ ӈацекы’’ ма’’лаць, тикахад’ санаторно-лесной школахана тоходанна’’ ӈацекы’’ таняць. Ӈэрм’ яхана илена’’ хуркари’’ тенз’ мэта’’ ненэця’’ хусувэндо’ харто’ фольклордо’ таня’’. Вадако’’, лаханако’’, хуркари’’ сё’’, ярабц’’, хынс’’ ӈэдакы’’. Тарця вадако’ невхы похот’ няна’’ тэвыдаць. Теда ӈацекына школахана тоходанась вадако’’ харвась’ толабидо’. Тюкумэвахана ненэця’ вадако’ нямна «Толаӈго книга» клубхана лаханаць. Няръяна маркы санаторно-лесной школахана округна’’ ӈэсыхыт’ товы’’ ӈацекы’’ тоходана’’, поӈгнандо’ ненэця’ ӈацекэця таня’’. Тоходанвахана пыдо’ харто’ вадамдо’ тохолаби’’. Тикада сава, ӈацекы’’ харто’ вадавнандо’ лаханаван’ харва’’. Санаторно-лесной школахана илена’’ ӈацекы’’ «Писяко» вадаком’ масьтевыць, сиддо’ тарця серкана воспитательто’ Парасковья Егоровна Кауц нядаби. Толаӈго’ хардахана ма’’лавы’’ хибярихи’ ӈацекы’’ вадаком’ манэ’’лабтаць. Хусувэй ӈацекэнд’ харта рольда’ танясь. Ӈацекы’’ нись’ вэварахамбю’’, варёмдо’ мэць лаханорӈаць. Сянаковадо’ ивнандо’ ӈэдарахась, вададо’ сававна хайнась.
Санаторно-лесной школахана манзарана’’ нина’’ ненэця’ вадамдо’ нерня’ пэрмадо’ манзаянандо’ ӈади’’,ӈацекыдо’ харто’ вадавнандо’ лаханась тохолабидо’. Тарця серкана ӈацекыдо’ нядабада’’ тохолкода Наталья Николаевна Луканова, воспитатель Парасковья Егоровна Кауц манзараӈаха’. Пыди’ толаӈго’ хардахана манзаранахат’ благодарность – падарм’ ня’’амӈахась. «Писяко» вадакохона сянаковы’’ ӈацекы’’ ӈарка хибярихит’ сава вади’’ намдаць. Тикы тарця ӈацекы’’- Оля Канюкова, Юля Бобрикова, Олеся Талеева, Лариса Майкова, Алёна Ардеева, писякоӈэ’ сянаковы Александра Соболева, Семен Талеев. Ӈацекы’’ пэдоваць. Мал’’ пыдо’ санаторно-лесной школахана тоходана’’. Сава вада’ хавна , пыдо’ благодарность’’ ня’’амаць.
«Толаӈго книга» клуб’ манзаям’ пэртя нина’’ хусувэй ирийхана ненэцие’’ ма’’ламби’’. Тюкумэвахана вадако’’ нямна вадидо’ хамадавыць, хурка’’ вадако’’ таня’’? Тикым’ ӈацекэхэ’’ Надежда Николаевна Талеева ваде’’ӈадась. Тамна нина’’ «Ӈэрмний’’ я’тер’’ вадако’’» нямна стенд’ хамадаць, ханяна вадако’’- книги’’ манэ’’лабтаби’’. Таняна хусувэй библиотекан’ товы хибяри’ нянанда тарана вадаком’ хоӈгу, харвабнанда вадакомда таминда толаӈгуда.
Тарця сомбой ма’’лёва округна библиотекахана ваерась. Ӈацекына харто’ вадавнандо’ лаханаць, ӈарка хибяри’’ инзелець. Тарем’ округна санаторно-лесной школахана ӈацекы’’ вадамдо’ тохолабидо’. Сава нядаӈгодидо’ тохолкодидо’, воспитательто’. Ӈоб’ нерня ӈод’ тарем’, харвась ӈобнзер’’ манзарая’’.
