Округханана ӈока’’ тарця хибярина иле’’, хуний илевандо’ ямбан ӈарка манзаям’ пэрӈа’’. Хуний’’ манзара’’, харто’ сертабадидо’ нерняри’’ минрейдо’. Харто’ пыдадо’ нерня нись пэр, харто’ манзаидо’ нись вадес.
Тарця ненэцие’’ поӈгана мань’ Филипп Никитич Ардеев нюмдеӈгудм’. Нянэй ненэць. Холгов’ тер. Холгов ӈохона мюсерта ненэця мякана соябэй. Тюку по’ Филипп Никитич си’’ив ю’’ самляӈг помда ядабта. Хусувэй хибяри тотрев’ пыда школахана тоходанась. Школанда’ пуд тамна нерня тоходанвась Няръяна март товысь. Округна еркы маркана педучилищем’ ёльцевысь. Тохолкодаӈэ’ хэсь, маркана тохолковамда ёльцесь, нянэювна манзарась пядась. Филипп Никитич Красной ӈэсыхына манзарась, тикахад’ харта ӈэсынанда илена’’ ӈацекы’’ тохолкодаӈэ’ тарась. Ханяна нибнанда манзара, ханярина минрена манзаянда ив’ ер сырцеты. Теда ӈод пыда тарця хибяри. Си’’ив ю’’ самляӈг понанда ӈопой яхана нисьты’ хасена. Пыда мел’’ ненэць. Хусувэй сертабада манзаянанда тёмбека ӈэсьты, манзаида саць сававна сертавы’’ ӈэсьты’’.
Сидя юкад’ вата’’ по’’ тяхана ся’’ня маркана этно-культурный центрава ӈадимясь Филипп Никитич таняна манзарась, тамальӈгана пыда ӈудахата’’та’’ ӈока сомбой сувенир’’ ӈадиберӈаць. Пена’’, хоба’’ пускэцяхат’ сомбой манзаи’’ сертабись. Тедахова пыда пирувнанда манзарана яӈгован’ хабе. Ӈарка мастер’’. Филипп Никитич манзаи’’ ӈока хуркари’’ маркана танеда выставкахана маниесьтына’’, Тарця серт’ тохолавы хибярида таня’’ма’’. Ӈани яхана илена’’ хибяри’’ ӈод Филипп Никитич манзаи’’ теневыдо’. Ӈани яхана, ӈани маркана выставка-ярмарка танябнандо ханяӈэна мел’’ нява таня ӈод’ тэворцеты. Харта манзаида манэ’’лабтабасьты, мастер-класс’ сертабасьты.
Филипп Никитич харта вадамда теневана, харта ямда саць сахарамбада. Холговханда’ хусувэй по’ тэворцеты. Ӈохонанда ӈобкарт’ лохокоцяко, ӈобкарт’ токоця, яхакоця, якоця яӈгован’ хабе, ханяна мэвада яӈгу.
Тюку по’ ӈод харта со’’явы, вадювы яханда ты’’ ниць ирий’ нюртей яляха’’на хэвась ятна. Та’ ямбан таняна сертавнда манзаяда маля ӈока.
Филипп Никитич иламда мэёвна мэта, харта ямда мэнена, харта нюда’’ сава хибяриӈэ’ вадавы. Пыда яханана теневана ненэць. Тикы’ хавна ӈани’’ я’тер’’ сававна теневадо’. Со’’яма ялянанда ӈока ихид’ миндя’’ вади’’ намдась.
Тюку ирийна сидя ю’’ нябимдей яляхана округна этно-культурный центр мякана маркана илена’’ хибяри’’ ӈани’’ ма’’люрӈаць. Тюкумэвахана Филипп Никитич ма’’лавы’’. Товы’’ хибяри’’ нянда сава вадидо’ хэтаць.
Филипп Никитич со’’яма яля’ ед хамандавы ма’’лёйм’ «Илебц» театрхана сянакода’’ нина’’ нэдось. Надежда Талеева, Валентина Тайбарей ихид’ ӈэда сём’ мэ’’ӈахась. По’’ тяхана Филипп Никитич харта ӈод «Илебц» театрхана сянакусь. Со’’яма ялянанда нида’’ манэць ихинянда сава ӈэдархась. Тохолкода, мел ненэця таӈок по’’ ямбан сертавэда тянё вуни’’ӈа’’. Тохоламбавы’’ хибярида ханярина иле’’. Краснойхана илена’’ Филипп Никитич тенедо’, мэнедо. Тохолкодандо’ со’’яма ялян’ ӈокаӈэ’ товыць. «Нянэй не» фольклорной группахана яӈгарта не’’ харто’ вадидо’ мэ’’ӈаць, мядонзэйдо’ тэвраць. Филипп Никитич Ардеев мэбета хибяри, теневанида тянё ни’’ӈа’’. Со’’яма ялянда нянда’’ лаханана’’ ӈокаць: округна ервхад’ вадам’ Галина Медведева тэврась, маркы ервхат’ Ольга Старостина, Александр Коловангин лаханаӈаханзь. Округна депутаткад’ лаханавы Ольга Каменева. Нянэй ненэцяӈгат’ лаханавы’’ Алексей Ардеев, Галина Тайбарей, Роза Канюкова, Валентина Зганич, «Илебц» театр, «Нянэй не» фольклорной группа.
Маня’’ сава теневана нява 75 помда мада. Нерняна сертавнда серуда тамна ӈока’’, планда нюдя ни’’ӈа’’. Тад’ нерня ӈод, илевада сававна миӈая, сенз’ ӈэя, пон’ тамна харта явнанда маям ехэрась ядэрӈая!
