Та’ ёльцянд’ тэвась округна хибяри’’ ӈокаювдо’ ныланасьты’’. Ныланава’’ мальӈгана хибярина ханяхова ӈэдаласьтыд’. Ӈацекына’’ ныланава’’ ӈод хусувэй по’ таславы’’ ӈэсьты’’.

Ханяӈы’’ хибярина’’ ныланавамдо’ иба’ я’ яв’ вархана мадабасьтыдо’, ханяӈына пыдадо’ савумдавась санаторийха’ ӈэдалёрцеты’’. Ханяӈына, перенидо’ ӈани’’ яхана танеда’’, няхато’ мядоманзь’ тэворцеты’’. Таӈы мальӈгана маня’’ илесь яхана ӈод’ яндахат’ турта’’ хибярир’ тянё нисьты’’ ӈа’’. Хибяхова’’ мядоманзь’ турцеты’’, хибяхова’’ серуто’ поӈгана округва’’ манэ’’мась тэворцеты’’. Яхана’’ товы’’ хибяри’’ культурахана манзарана’’ нина’’ ядтабсетыдо’. Округна этно-культурный центр’ мякана ненэцие’’ культурам’ нерня пэртя’’ нина’’ нянэювна тарця серкана манзарасьты’’. Тюку та’ «Илебц» театрхана сянакода’’ нина’’ ни’’ нылана’’. Пыдо’ март’ ӈани’’ яхад’ товы’’ хибяри’’ ядтабсеты’’. Тарем’ саво’ ирийхана маня’’ яхана СЗФО регионхат’ депутат’’ серу’’ пэртя’’ хибяри’’ турӈаць. Манэ’’ӈадось ханзер’’ маня’’ округханана депутатна’’ манзара’’, хурка Закон’’ яхана таня’’. Нерня ӈобнзер’’ манзаравидо’ тасламбиць. Пыдо’ туристической центран’ ӈэдалёрмадо’ танясь, таняна «Илебцхана» сянакода’’ нина’’ харто’ программамдо’ манэ’’лабтаць.

Неняӈг ирий’ самлязимдей яӈганя толыр’’ округна со’’яма яля. Тюку по’ сиднтет ю’’ мат’’ помда ядтаваць. Таӈок по’’ ямбан округханана ӈока’’ едэй ӈэсы’’ ӈадимя’’, округна еркы мар’ сэвхана маниесь хусувэй по’ ӈарумдана. Хибярина хуркари’’ манзаяха’’на манзара’’, ӈацекына едэй школаха’’на’’ тоходана’’. Нюдяко’’ ӈацекына’’ е’’эмня ханярина садик’’ сертаби’’. Ил’ хусувэй по’ несэюмдана’’, савумдана’’. Маям’ ехэрась илевава’’ мэ’’ӈава’’. Округханана палытана’’ манзаямдо’ минре’’, тарця манзаям’ пэртя’’ поӈгана хуркари’’ тенз’ хибяри’’ таня’’. Пыдо’ нянэй ненэцие’’ культура’ нямна вадам’ намдван’ харвасеты’’, мядоманзь’ культурам’ пэртя нина’’ ӈатесетыдо’. Округна яляхана «Илебц» театрава палытанаха’ ӈэдалёрӈась. Таняна сиддо’ маймбась ядтабиць.

Нерняна ты’ яля’ ёльць. Тарця яляхана ӈод’ нина’’ ханяхова’’ ӈэдалаӈгуд’. Нянэй ненэця’’ «Илебцхана» сянакода’’ нидо’ ӈатейдо’.