Матрена Ивановна Талеева округханана теневана, мэбета не. Тохолкода, паднана. «Тыта» таремъюв’ нюмдевы пьесам падась. Падвы манзаяда нюдя ни’’ӈа’’. Янамбовна малӈэ’ газетаханана падвы ӈэӈгу. Тюку яля’ М. И. Талеева падвы пьеса’ самлянзимдей пелям’ толара’’.

Мят’ Еване тю, еся хыдяхана ӈарка матормы яв’ хало, тамна няръяна тирябям’ едкохона тавы, передниканда’ ӈалад сэрако варъяда пэм’ ӈадимде. Микаханда миӈада. Стол’ ни паской хыдхана тирябям’, халу мэ, ед’ мюд ӈамзи няда, стол панӈа. Мядомари сер’’.

Мика: Ти, ӈани няха’’ на тэвына’’, тына’’ сенз, тына я’ таня, нюна’’ вадёдана’’. Нум’ сидна’’ нядамби, халяком’, ӈамзаком’ хусувэй яля ӈаворӈава’’! Ӈамгэ тамна хибярихина тара? (ӈаркавна хэтада, хумкамда илада).

Пале: Иб’ тарем’ ӈа. Няв – сава няв, вадид’’ нензя тарем’ ӈа’’, пыдар Еванер невхы’ ватовна мяканд’ илеванзь тось. Мань ӈани’ Тынен’ мякана тюку яля’ ӈэсонд’ иледм’. Ибкава хар’’н мя’’ан мю’ невхы’ ватовна ватормы’ нев’ таван харвадм’. По’’ ваера’’, невхы’ нисянд’, небянд’ ваторома’ вадам’ пилибт’’ тенев’’. Ӈамгэм’ нян хэтӈгуда’’?

Луке’ пухуця: Вы’ яханана таты’’ танебэй’’, таты ӈэва – майбцо ни ӈа’’, татыӈэ’ илемяв’ сиби нись ӈа’’. Теда’ невхы сёв’ мэтадм’, инзеледа’’ ( сём’ мэӈа).

Тыне: Небёв! Пыдар сит татыӈэ мэса? ( пысамби.) Ӈадьбянда илемамд’ нисьтыр’’ вадес’’. Саляков ӈадьбянда ватормэрню’’. Салякоев, таты’ ӈэван харваӈгу нив? Теда’ манасьню’’ едэй ватовна хибяри’’ иле’’. Пален’ ня ӈобт’’ паднами’ падрами’ таня. Едэй похо’’на тарця падар’’ ныхыда яӈгу, сусадава пир, едэйвана неле, хаепа’ хэва пир’’, ӈани тарця падарм’ сертава пир’’.

Луке’ пухуця: Тидов! Не’, Мань ярабцарха илемяв’ мале мэпэй’’. Нюн’’ ябдава’’, тын’’ танева, нисянд’ илева – мань илеван’ ямбан ӈарка ябвась. Нисяр си’’ым сяӈась, нядабасьты. Пыда яӈгуманда нерцюна пыдар е’’эмнянд’ ида ядэрцеты, вадида нянди’ тэвраӈгун, инзеледа’’: не’ нюми’ Паленда’ ня юдмян’ вата по’ илеӈаха’, нюди’ ӈобнзер’’ вадамбихи’, тыди’ ӈока’’. Пале’ июв харта тасламда, валакада теневая, сидя нем’ няць илева’ сиби ни ӈа’’. Ихинян’ теда’ сава, хэтувнда вадам’ хахати’ тэврав’’. Мань ӈод’’ татыӈэ си’’ым’ мэбто’ тет яӈганя повась, нисян’ нябаку хасаван’ миӈаць. Пыди’ нюди’ яӈгувысь, ню’’ яӈгува выӈгана саць вэва, хибя нядаӈгода.

Пале: Ти, теда’ хэтувнда вадам’ намдав’’, ят’ мань хар’’н теда’ таслаба’’ан тара? Ню’ яӈгова саць вэва, мяд’ мюй ӈацекэхэ’’на панпата тара, Салям’ татыӈэ мэб’’, тамна ӈацекэця’’ таняӈгу’’, нядаӈгодава’’ ӈока ӈэӈгу. Мань ныхыри’’ Салям’ мэван нив’’ харва’’, Саляков’ мэнев’’, хар’’н вадав’’. Ив’ ханзели’’ ядэрцеты, сёнзяв’ вомзьты. Хибя Салян’ невхы ваторамам’ вадетада?

Тыне: Небян’ хавна хибя вадетадада’’, невхэна нянд’ ваторабти’, ӈамгэвна иди’ ядэрмакы, нибтя пыдар тарця ваторамам’ юрвамд’ ӈатевэкэхэ’? Пыдар тикым’ нир юр’’, нир ӈо’’ юрӈгу’’.

Луке’ пухуця: Пале, Мань мяканди’ тарана серкна тутадм’, Салян’ ня хар’’н лаханакудадм’. Тыне, нисянд’ ня сит сянзь тарем’ ваторанись. Хари’’ иле’ ня яӈгоб’’ саць вэва, ӈацекэцяха’ нисяси’ вадюданӈгухусь. Нит’’ харто’ илевадо’, мани’ хэвханани’ ят’ ханян иле’’, хасаваси’’ ханя’ хантасан’’. Пале тарця ваторама’ яӈгувы ӈэб’’ нивакы пыдар мяканд’ илевась то’’, невхы ватовна’ ибкава’’ тарем’ ни серос’’, харти’ ӈод’’ теневади’’. Пале: Мань тикы ваторамаси’’ нелеӈгодвакэв’’. Вы’ яхана нем’ мэва’ мер’’ вуни ӈа’’, хусувэй ненд’ мирта’ миць тара. Тамна юн ӈо’’ мер’’ хэсьты’’, вэваку юн – мэвнда пирибтяв’ марлабтав’’, писядетна’’ ӈокаць.