Ханярина мюсерта’’ ненэця’ сямянд’ ӈарка яляӈэ’ ты’ ялям мэ’’ӈа’’. Ямалкана мюсертина’’ ты’ ялямдо’ нара тось мэ’’ӈадо’. Сямянд’ нюртейӈэ’ хаби’’ яхана ныланасьты’’, тикы Шурышкарский район’ тер’’. Тюку ирийхана пыдо’ ты’ ялямдо’ мэта’’.

Я’ мал ӈахы’’ похот’ нянэй ненэця’’, хаби’’, тасу’’ хаби’’ илесь я’. Тарця хибяри’’ явнандо’ тыдо’ пэрць мюсерӈа’’; халям’ пэрӈа’’, ханисэйм’ ня’’амарпи’’. Я’малкана ӈокханда мат’’ юр’’ ёнар’’ мян тэдо’. Тэта’’ ненэця’ хэвхы округхана ханярина мюсерӈа’’, харто’ тыдо’ пэртидо’ тянё ни’’ӈа’’.

Хэвхы округханана тет юр’’ ёнар’’ мян толырто’ тянё’’ ненэця’ иле’’, Мат’’ яӈганя ёнарто’ вымна мюсерта’’ ненэця’. Ӈокаювдо’ Ямальский районхана тыдо’ пэрӈа’’.

Нянэй ненэця’ тыдо’ лэтбась иле’’. Ты’ – сямянд’ таранадо’. Ненэця’ масьты’’: тэдм’ небянд’, янд’ тотрев лэтбад’. Ты’ ненэцям’ ӈавламбида, ембпида, сёнзянда мюйм’ ядимдаби. Ты’ ненэцянд’ илм’ таром’ минре.

Выӈгана мюсерта’’ ненэця’ ӈарка яляӈэ’ – ты’ ялямдо’ мэцьты’’. Тарця ялямдо’ Я’малкана мюсерта ненэця’ нара’ това’ сер’ мэ’’ӈадо’. Сян’’ ӈэдалавам’ пирдалесь мюсерта’’ ненэця’ ӈарка ялям’ мэ’’манзь хардан’ тэворцеты’’. Надым’ маркана ёнар’’ хасую’’ ёнар’’ хасуюр’’ си’’ивумдей поход’ ты’’ ялямдо’ мэ’’ӈадо’. Тюку по’ ӈод мюсерта’’ ненэця’ таняна ма’’лаӈгуд’. Мэта’’ пова Россиянана «Мяд’ тер’’ поӈэ’ таславы». Тарця пом’ мэць вындер’’ мяд’ тер’’ ӈод пуняна ни’’ хаюд’. Нерняна’ тонда ирий самляӈг’ яӈганя мат’’ яӈганя толыркана Надымкана ты’’ ялямдо’ мэта’’. Тарця ялян’ «Кочевая семья» округандо’ конкурс’ ваераӈгу’’. Я’мал хусувэй районхад’ ненэця’ мяд’ терсавэй пирдырманзь’ тута’’, мядондидо’ Ханты-Мансийский округхад’ танеӈгу’’.

Тазовский раойнхана вындер’ ненэця’ ныланавась март’ ирий пудана яляхана ма’’лаӈгуд, Антипаютахана ты’’ сие ниць ирий’ юдимдей – ӈоб’яӈганя яляхана ма’’лаӈгуд, Гыдахана ты’’ ялямдо’ товнда ирийна сидя ю’’ няхарамдэй яляхана мэтадо’.

Тюку ирий’ пудана яля’’ мальӈгана Шурышкарский районхана мюсерта’’ ты’’ ялям’ мэта’’, пыдо’ округханана таневнда ныланава ялу’’ хусувэй по’ нэмбидо’. Хэвхы’ округ еркы маркана’ ӈод ты’’ ялям’ мэцьты’’, Тюку по’ Саля’хардахана ты’’ялядо’ ты’’ саполана ирий сидя ю’’ хасуюдимдей яляхана ваераӈгу’’. Яр Саляхана илена’’ хибяри’’ ты’’ ялямдо’ ты’’ ниць ирий самлязимдей яляхана мэтадо’, районхана мюсерта’’ ненэця’ тикы ялян’ Яр Салян’ тэвӈгуд. Хусувэй пирдырмахана ныхыдо’ манэ’’лабтаӈгу’’. Тюкумэвахана ӈарка яляхана Францияхад’ товы’’ мядондидо’ танеӈгу’’. Ӈани’ я’ тер’’ хибяри’’ ӈэрм’ ненэцие’’ ям’ манэ’’ман’ харва’’.

Я’мал нюдя я’ ни’’ӈа’’, хойхана мюсертидо’ ӈод тянё ни’’ӈа’’. Ӈодьбянда ты’’ ялудо’ тюку ирийхана пяӈгудо’, сямянд’ пуданидо’ маля ты’’ ниць ирийхана ӈарка ялямдо’ мэтадо’. Тарця ялудо’ мэць ненэця’ таӈы’ мюсерць яхато’ ямдаӈгуд’.